Miori Uaho Mai Hama Hina.
6
Miori mai uaho e,
hinami hamami aiakia katokaꞌainakia,
pokina neiana katobabaina hanona ebero Obiapaka wairanai.
2 Hinami mai hamami katomariki ainakia.
Weiana hanona Puka robena ena rauhubu ꞌabina koriꞌuaina haeamona mai ꞌabiꞌuaina.
3 ꞌAbiꞌuai hanona neiana,
emi mauri kenamo mai hanopakai emi miaho maurina hanona kehomaꞌa.
4 Hama hina e,
nahumi aꞌi katoba opuerenakia,
ia Obiapaka ena bairobe ai mai ena baꞌiobi ꞌabikiai katoba apaꞌuanakia.
Taꞌaraꞌi Hauna Mai Poki Hauna.
5 Taꞌaraꞌi haumi e,
hanopakai tipoki ainimi haukia aiakia katokaꞌaina mai marikimi abomo aomi tohakiai mai taꞌumi,
ihobona Keriso aiana tukaꞌaina ꞌabana.
6 Kateihanimi aokia katoba aonamonakia paunai aꞌi katoaka,
ia Tirama ena nuatae akana katobabaina mai aomi ikoinai,
ihobona Keriso ena taꞌara tuaꞌina haumi ꞌabana.
7 Aomi namonai katoaka,
ihobona Obiapaka ena aka tubabaina ꞌabana,
ia maearima ekia aka ꞌabana ahaꞌi.
8 Pokina wai aba toꞌiobina Obiapaka hanona taꞌaraꞌi haukia ꞌao taꞌara aꞌi tiaꞌi haukia reꞌa maearima ha ha aka namokia tibabai haukia ꞌarakia kebenakia.
9 Poki haumi e,
taeara ihobonai katobabai harai emi taꞌaraꞌi haukia herekiai,
ia aꞌi katobataꞌunakia,
katoꞌiobina ia mai wai emi poki hauna hanona hamona kupai nemiaho,
ia hanona maearima ikoinai ekia babai ihobokiai mo neihanakia ia tai haꞌi nitaina.
Tirama Ena Huari Tabakia Kahabatotonakia.
10 Eꞌu ꞌabi orena hanona neiana,
Obiapaka kipokia katobahamomo ena hiabuai kebahiabunimi,
ena taburai katotabura.
11 Tirama ena huari tabakia ikoinai haumiai katoba totonakia,
ba tiaporo ena aotipa akakia katokaiabu harainakia.
12 Pokina aika hanona maearima aꞌi nahahuarinakia,
ia auba kiꞌa obokia weiakia auba ekia poki haukia,
hiabu aubakia,
hanopaka wapurana neiana tipoki aina aubakia,
mai huari aubakia kiꞌa obokia kupa mai hanopaka baiatanai ṯemiaho haukia kipokia nahahuari.
13 Weiana buonai bariu Tirama ena huari tabakia ikoikiai katoaꞌi taeanakia haumiai katohore ꞌaunakia,
pokina rani kiꞌa obona kemai raninai wai hanona aba katokori ꞌini,
ba huari weiakia katobaore harainakia murinai hanona ꞌekamiai katokoroti mai taburami.
14 Ua buonai katokori ꞌini,
ꞌabi tohana katohinana hanona huami ihaina huamiai katohai ꞌinina,
mai aka bero hanona haharami iꞌaeana haharamiai katohore ꞌauna.
15 Mai katobaꞌoru harai pou namona weiana baibua nibaramana hauna katoiroro aina aomi ikoinai hanona emi tamaka ꞌabana katoabaꞌauna.
16 Weiakia ahakiai rani ikoinai aꞌikakauma ketina katoaꞌi taeana,
weiana hau kiꞌa obona ena paki mai irubakiai nibakokinimi hanona katobaꞌoronakia.
17 Tirama ena bamauri hanona katoaꞌi taeana emi huari baurabauranai keao,
mai Tirama ena ꞌabi weiana Auba Robe nibenimi hauna katoaꞌina emi karebai keao.
18 Rani ikoinai Auba Robe ena hiabuai katobahubaꞌari,
taba haeai haeai ahakiai mai emi nuatae ikoikiai bahubaꞌari ai Tirama katonoina.
Aomiai neiana kemiaho katomaha noꞌa rani ikoinai Tirama ena robe maearimakia ahakiai katobahubaꞌari.
19 Au abomo ahaꞌuai katobahubaꞌari,
weiana rani tabakiai au kairoro ranikiai Tirama ꞌabi kebenaꞌu weianai hanona kanuakoꞌo pou namona aonai tebuni ꞌabikia kabawaira tinanakia.
20 Au hanona Tirama kipona euhunaꞌu pou namona neiana kairoro aina ba weiana paunai au wapura itunai namiaho mai tabiriꞌu,
katobahubaꞌari weianai panuakoꞌo pou namona pairoro aina Tirama ena nuatae ihobonai.
21 Tukiko,
uahoꞌabaka raonaꞌauna mai Obiapaka ena taꞌara iaꞌina hauna namona,
taba ikoinai aba kehina benimi weianai wai aba katoꞌiobina au hanona aea homaꞌu haeamona taba nababaina.
22 Nauhuna niwahi heremi ena poki hanona neiana,
wai kato ꞌiobina ai hanona aea homamai,
weianai aomi peba taburanakia.