Kahaꞌikakauma Tabura Baiꞌoi Kahabaꞌorona.
2
Au nanuatae wai katoꞌiobina au eꞌu aroꞌari hanona aea homana wai paumiai,
mai aꞌikakauma haukia weiakia Laodikeai ṯemiaho haukia paukiai,
mai au tohaꞌu aꞌi teiha ꞌapuanaꞌu haukia abomo paukiai.
2 Eꞌu raona tohana hanona aokia ketabura mai raonaꞌauai katebahamomo,
weiana aokia kea,
obo kateobo harai keaomo Tirama ena ꞌabi bunikia kateꞌiobinakia,
weiana hanona Keriso.
3 Keriso aonai hanona aotipa mai aobero kepukia ikoikiai weia ebuninakia.
4 Au wai ṉahinabe aihonimi hau ha aoani ꞌabikiai aꞌi meꞌoinimi marikina.
5 Au hauꞌu hanona wai heremiai ahaꞌi,
ia aubaꞌu hanona wai heremiai,
iamo emi aka hanona tebero abomo Keriso tuaꞌikakaumana mai taburami weiana naihanakia hanona naonamo.
Keriso Haunai Kotau Toꞌo Hanona Mauri Tohana Koaꞌina.
6 Ua buonai,
wai Keriso Iesu aba toaꞌina emi Obiapaka,
bariu hanona ia aonai katomiaho.
7 Wai katokori ꞌini ia aonai matoha matiu ꞌanoai niramu ꞌabana,
ia ahanai emi mauri katoba koriꞌauna matoha itu ꞌabana,
pou namona tabaꞌiobinimi aꞌikakaumanai katotabura ba rani ikoinai ia katobanamona.
8 Katoꞌima ꞌima harainimi,
hau ha kehore maearima ekia aotipa baꞌiobikiai mai baiꞌoikia ꞌabikiai aꞌi meꞌoinimi,
baꞌiobi weiakia hanona maearima ekia aotipa hoahoakiai timai haeamona auba kiꞌa obokia hanopaka aonai tipoki haukia herekiai timai,
ia Keriso ꞌeunai ahaꞌi.
9 Pokina Tirama ena mauri hoahoana maikoina hanona Keriso hauanina aonai nemiaho.
10 Wai emi bahamomo Keriso aonai hanona mauri namona maikoinai aba toaꞌina.
Keriso hanona poki aubakia ikoikiai mai hiabu aubakia ikoikiai arakiai nemiaho.
11 Keriso aonai wai hanona aba itare toaꞌina,
itare weiana hanona maearima imakiai aꞌi tebabaina,
ia itare weiana hanona hauani ena hoahoa kiꞌa obokiai herekiai katokapare,
weiana hanona Keriso ena itare.
12 Wai emi ꞌuere robeai hanona Keriso kipokia tehorenimi,
haeamona emi aꞌikakaumai Keriso kipokia Tirama ena hiabuai tomikiri mue,
hiabu weiana ehore Keriso ꞌariai ebamikiri muena.
13 Wai hanona ꞌuainai aubai toꞌari pokina emi kiꞌa paukiai mai wai rama haeai haumi hauanimi kiꞌa obona aꞌi tetarena,
ia bariu Tirama ehore Keriso kipokia ebamaurinimi,
eka kiꞌa ikoikiai ehina haonakia.
14 Eka babai kiꞌa obokia irereꞌau haukia buoka pahabua haukia ia ehore ekakinakia,
eaꞌi obonakia matiu ibiri ropo ubinai ekoko ꞌaunakia.
15 Matiu ibiri ropo weiana ꞌubinai Keriso ehore poki aubakia mai hiabu aubakia ekia hiabu ikoikiai eaꞌi boinakia ehe amatainakia maearima wairakiai eba haumaeanakia.
Aika Hanona Keriso Kipokia Aba Haꞌari.
16 Ua buonai hau ha aniani ꞌao inuinu paukiai,
marea tatukia,
ꞌao nawa koriahi aonamona tatuna,
ꞌao Beraura robena,
weiakia paukiai aꞌi temeꞌuahinimi.
17 Taba weiakia ikoikiai hanona aiaiana ꞌabana wairai katerama,
ꞌa tohatohana hanona Keriso.
18 Maearima weiakia kipokia aokia tibaꞌaiaunu baiꞌoina mai aneru ṯekuti ainakia haukia ekia raonaraona ꞌabikiai wai aꞌi temebaꞌehonimi,
weiakia hanona kipokia ekia mahabanai ꞌabiꞌabikiai tiapa,
iamo anikia ahaꞌi.
19 Ia hanona Keriso herenai teꞌeho,
Keriso hanona hauani arana,
ia ena ihaꞌini aonai hanona hauani maikoina nitabura,
ibakai mai oꞌeoꞌe ikoinai niaꞌi ꞌininakia,
ba niapaꞌua harai Tirama ena nuatae taearanai.
20 Wai Keriso kipokia auba kiꞌa obokia hanopaka ena mauri tipoki aina haukia herekiai aba toꞌari raninai,
taba buonai wai hanopaka ena rauhubu tuaꞌi taeanakia ihobona matoha wai hanopaka ꞌeuna,
21 ṯotibaha,
“Aꞌi katokai ꞌapuana,”
“Aꞌi katoani hobona,”
“Aꞌi katoaꞌi ꞌapuanakia”?
22 Weiakia ikoikiai hanona anikia kateahaꞌi abomo katepua pokina ia hanona maearima tebabai mai tibaꞌiobiai rauhubukia.
23 Rauhubu nahomakia ihaihakia hanona aotipa ꞌabikia ꞌabana,
weiana maearima tihore aneru ṯekutiai taburanakia aokia tibaꞌaiaunu baiꞌoina kipokia hauanikia tiba haiaranakia,
iamo aka weiakia hanona ekia baraibarai ahaꞌi pokina raona kiꞌa obona maearima aonai kekarahi hauna kebaꞌorona hanona aꞌi ketaina.