Paulo Ena Marere
KOLOSE
Haukia Herekiai
Banamo ꞌAbina.
1
Au Paulo,
Tirama ena nuatae paunai Keriso Iesu ena iuhubeau hauꞌuai naeao,
mai uahoꞌabaka Timoteo ohi,
2 Tirama ena robe haumi Koloseai ṯomiaho uahoꞌabamai Keriso tuaꞌikakaumana haumi ṯarere benimi.
Ṯabahubaꞌari Tirama aika Hamaka ena aokoꞌo hoana mai baibua hanona ahamiai kemiaho.
Paulo Ena Bahubaꞌari Kolose Haukia Paukiai.
3 Ai wai paumiai ṯabahubaꞌari ranikia ikoikiai,
eka Obiapaka Iesu Keriso Hamana Tirama ṯabanamona.
4 Pokina poumi aba taona,
Keriso Iesu tuaꞌikakaumana abomo Tirama ena robe haukia ikoikiai turaonaꞌau ainakia.
5 Aꞌikakauma mai raonaꞌau neiana hanona emi buabeniai nimai,
buabeni weiana hanona wai ꞌeumi kupai nemiaho,
ba neiana hanona ꞌabi tohana pouna namona aba ꞌuaina tona aonai toaꞌi ꞌinina,
6 pou namona weiana hanona aba emai heremi.
Hanopaka maikoinai pou namona neiana aba erama otaraina niꞌomu mai nebuaꞌa,
ihobona wai Tirama ena aokoꞌo hoana ꞌuruna tona mai obona tobo haraina rani weiana koriꞌuaina emai mo bariu wai baiatamiai erama.
7 Epafra herenai ꞌiobi weiana toaꞌina,
ia hanona emai raonaꞌau hauna ai kipokia taꞌara taꞌi,
Keriso ena aka harai hauna wai heremiai ai atamaiai,
8 ba ia ehore ai ehina benamai emi raonaꞌau hanona Auba Robe aonai.
Keriso Ena Mauri Mai Ena Aka.
9 Ua buonai ai hanona wai paumiai ṯabahubaꞌari toꞌo baihana rani weiana poumi taona aonai emai mo bariu.
Ai Tirama ṯanoina Auba Robe kehore ꞌiobi mai aobero maikoina kebenimi,
Tirama ena aotipai kebabonunimi ena nuatae katoꞌiobina.
10 Ba wai hanona Obiapaka ena nuatae maurinai katomiaho,
weiana ia aona ibanamona akakia ikoikiai katobabai,
aka namokia haeai haeai ikoinai katobabai buabuami katerama ba emi ꞌiobi Tirama herenai hanona keapaꞌua.
11 Ena hiabu ikoinai weiana ena nuabi hiabunai nimai haunai keba taburanimi ba wai katokori ꞌini katobakiro ikoikiai aokiai mai aonamomi.
12 Abomo hamaka katobanamona,
ia hauna ehore ebaꞌorunimi itau weiana ena robe haukia kipokia katoaꞌina ena ea aiarana aonai.
13 Tirama ehore wapura ena hiabu aonai eba maurinaka,
haeamona emaiainaka nahuna weiana niraonaꞌau aina hauna ena obia aiarana aonai.
14 Weiana Iesu paunaia aika ebamaurinaka eka kiꞌa ehina haonakia.
15 Keriso hanona aꞌi nahaihana Tiramana ihaihana,
ia eramaꞌuai ba terama tabakia ikoikiai ꞌubikiai.
16 Pokina Keriso paunai Tirama ehore taba ikoinai kupai mai hanopakai ebaramanakia,
nahaihanakia tabakia mai aꞌi nahaihanakia tabakia,
obia haukia,
hiabu haukia,
poki haukia,
mai rauhubu haukia,
weiakia kupa tipoki aina haukia Tirama ehore taba ikoikiai ebaramanakia ia paunai mai ia ꞌeuna.
17 Keriso hanona aba emiaho ba taba ikoikiai terama,
ba ia paunai taba ikoikiai ꞌekakiai ṯemiaho.
18 Keriso hanona ꞌara,
Tirama ena marea haukia hana hauani,
ia hanona mauri pokina ꞌari mikirimue hobohobona,
ua buonai taba ikoikiai aokiai ia hanona waira ꞌakinai.
19 Weiana hanona Tirama kipona ena nuataeai,
ia kipona ena mauri mai ikoina nahuna aonai kemiaho.
20 Ba Tirama enuatae nahuna paunai taba ikoinai kupai mai hanopakai keba hamomonakia katemai ia herena.
Nahuna matiu ibiri ropo ubinai eꞌari hanona baibua ebabaina.
21 ꞌUaina raninai wai mai Tirama hanona baiatami epaꞌa ena ꞌou haumiai toao pokina emi babai mai raona kiꞌa paukiai.
22 Ia bariu hanona nahuna hauanina ena ꞌari paunai bahamomo akana ebabaina ba wai keaoainimi robe haumiai katoao wairanai katomahamaha mai emi beho ꞌabikia aꞌi kehinanakia.
23 Ua buonai aꞌikakauma hanona wai emi mauri aꞌenai keao,
weianai katokori ꞌini harai pou namona aba tona hauna ena buabeniai aꞌi tomoibiu.
Pou namona neiana hanona maearima ikoikiai herekiai teiroro aina hanopaka aonai,
weiana ehore au Paulo eaoainaꞌu aka hauꞌuai naeao.
Paulo Eaka ꞌari Tirama Ena Marea Haukia Paunai.
24 Bariu eꞌu hauhaiara wai paumiai hauna naonamo aina.
Au Keriso ena hauhaiara harina ehabona ia hauanina weiana Tirama ena marea haukia paukiai hauna hauaniꞌuai nahoaina.
25 Tirama ehore au ena marea haukia ekia aka hauꞌuai ebaonaꞌu,
hoa neiana ebenaꞌu ena poki hanona wai kabarainimi,
Tirama ena ꞌabi kairoro aina keaomo kabaore haraina ꞌeka maikoina aonai.
26 Ena ꞌabi weiana hanona ꞌuainai emai bariu maearima ikoikiai herekiai ebunina,
ia bariu hanona ebawaira tina haraina ena robe haukia herekiai.
27 Tirama enuatae ena raona bunina rama haeai haukia herekiai ebawaira tina hanona aea enuabi aiho hauna ena maearima kebaꞌiobi ainakia,
raona bunina weiana hanona Keriso wai aomiai nemiaho hauna,
ba wai hanona ena nuabi katobuabena kipokia katowatena.
28 Ai hanona Keriso pouna ṯairoro aina maearima ikoikiai herekiai,
aotipa haeai haeai ṯarobenakia mai ṯabaꞌiobinakia weiana maearima ikoinai katenamo harai Keriso aonai ba katabaibeni Tirama wairanai.
29 Aka neiana paunai au nakaꞌari mai naroꞌari Keriso nihore tabura mai hiabu au aoꞌuai hauna nibaibeni.