4
Poki haumi e,
emi taꞌaraꞌi haukia bero mai namo taearanai katoꞌimanakia,
pokina toꞌiobina wai abomo emi poki hauna ha weia kupai nemiaho.
Aoka Kebero Kahabahubaꞌari Toꞌona.
2 Katobahubaꞌari toꞌo baihana,
tubahubaꞌari aonai mai aomi beronai Tirama katobanamona.
3 Ai abomo ahamaiai katobahubaꞌari ba Tirama kehore emai taeara kekaikauna ena ꞌabi katairoro aina Keriso ena ꞌabi bunikia katairoroai,
aka neiana paunai au wapura itunai namiaho.
4 Katobahubaꞌari ba au ꞌabi neiana kairoroai karahi haraina aka neiana hanona au ebenaꞌu kababaina.
5 Katoaobero emi hoahoa katenamo aꞌi tiaꞌikakauma haukia herekiai emi aka ranina aꞌi katobaore ꞌabaeana.
6 Rani ikoinai maearima aona ibanamona ꞌabiꞌabinai katobaꞌabi ꞌabi harainakia matoha kikimaru aniani abiabina nibanamona ꞌabana,
weiana ia ekia raona ꞌabikia katobamue harainakia.
Paulo Tukiko Mai Onesimo Euhunakia.
7 Tukiko kehore au pouꞌu maikoinai kehinana,
ia hanona uahoꞌabaka eka raonaꞌau hauna ha,
ia abomo aia ibabua ꞌauna hauna ha,
ia hanona au ꞌabaꞌu ha Obiapaka taꞌarana ṯaꞌi haeamo.
8 Ṉauhuna niwahi heremi ena poki hanona ai emai miaho neia hauna pouna kehinana,
ba wai aomi kebataburana.
9 Onesimo nauhuna Tukiko ohi tiwahi,
ia abomo aika uahoꞌabaka eka raonaꞌau mai aia ibabua ꞌauna hauna ha,
ia hanona wai kipokia tomiaho haeamo.
Ia katehore taba neia tirama haukia ikoikiai heremiai katehinanakia.
Banamo ꞌAbina Orena.
10 Aristako au ꞌabaꞌu ha wapura ituna aonai ena banamo neuhuna niwahi,
mai Banaba uana Mareko abomo ena banamo netiu ahina wai heremi.
(Baꞌiobi aba toaꞌina Mareko kewahi raninai katoaꞌi taeana.)
11 Iusto atana ha Iesu abomo ena banamo nibenimi.
Iuda haukia neiakia teaihau ꞌakimo kipokia ṯaka haeamo Tirama ena obia aiarana pouna ihinanai,
ia ekia aꞌituri hereꞌuai eapaꞌua kiꞌa baha.
12 Epafra wai hatiaꞌami ha Keriso Iesu ena taꞌaraꞌi hauna ena banamo nibenimi,
ia hanona rani ikoinai nibahubaꞌari toꞌo baihana wai paumiai katokori ꞌini aomi kekiro mai aomi ikoinai Tirama ena nuatae akana ibabaina aonai.
13 Au wai nahina benimi Epafra hanona wai paumiai,
mai weiakia Laodikea mai Hieropoli haukia paukiai niaka ꞌari.
14 Eka raonaꞌau hauna Luka muramura hauna mai Dema,
ekia banamo tibenimi.
15 Eꞌu banamo uahoꞌabaka Laodikeai ṯemiaho haukia katobenakia,
abomo Numufa mai Tirama ena marea maearimakia weiakia ena ituai titoꞌu haukia katobenakia.
16 Marere neiana katotuabina kepua hanona katotiu ahina Tirama ena marea maearimakia Laodikeai ṯemiaho haukia kate tuabina,
marere weiana Laodikeai nimai hauna wai katotuabina.
17 Akipo katohina bena katotibaha,
“Oi emu aka Obiapaka ebeniꞌo hauna akana kobabai haraina keaomo kobaorena.”
18 Banamo neiana hanona au Paulo kipoꞌu imaꞌuai arerena.
Aꞌi katoreana au hanona mai tabiriꞌu namiaho.
Nabahubaꞌari Tirama ena aokoꞌo hoana heremiai kemiaho.