Maytsay nacionpitapis Jerusalénman Diosta adoraq aywayänanpä ninqan
4
Shamuq watakunachömi Tayta Diospa wayin kaykanqan jirkanqa wakin jirkankunapita mas respitashqa kanqa.Tsaymanmi maytsay nacionpitapis runakuna aywayanqa Tayta Diosta adorayänanpä.
2 Tsaynöllami Sión jirkanpita Tayta Diospa yachatsikuyninta maytsaymanpis apayanqa.
Jerusalénpita patsami palabranta willakuyanqa.
Maytsay nacionpita Jerusalénman runakuna aywarmi niyanqa:
“Tayta Dios akranqan jirkanman llapantsik witsäshun.
Jacobpita aywaraq runakuna yärakuyanqan Tayta Diospa wayinman yaykushun.
Tsaychömi kikin yachatsimäshun mandamientunkunata imanö cumplinantsikpä kanqantapis.
Tsaynöpami pay munanqannö llapantsik kawashun”.†
3 Atska nación runakuna chikinakuyaptinpis Tayta Diosmi arreglanqa.
Tsay nacionkuna jatun y mayjina karucho kaptinpis paymi juzganqa.
Juk markawan juk marka guërrata manami rurayanqanatsu.
Maytsaycho runakunapis espädankunapitami arädupa planchankunata ruratsiyanqa.
Lanzankunapitanami ösita ruratsiyanqa.†
Guërracho pelyayänanpäpis manami kamarikuyanqanatsu.
4 Tsaynö kaptinmi runakuna pitapis mana mantsariypa kawayanqa.
Üva jachapa y hïgus jachapa chakincho añawmi jamapäyanqa.†
Llapanta mandaq Tayta Diosmi tsaynö kananpä kanqanta nin.
5 Wakin marka runakuna diosninkunaman yärakuyaptinpis noqantsikqa munayyuq Tayta Diosnintsikmanmi imaypis yärakushun.
Israel runakuna markanman kutiyänanpä ninqan
6 Tayta Diosmi nin:
“Tsay junaqqa chakin pakishqa y oqrakashqa üshakunata qoriqnömi castiganqä Israel runakunata qorimushä.
7 Chakin pakishqa üshanö kayaptinpis
y juklä markaman qarqushqa kayaptinpis
markanman kutir munayyuq kayänanpämi yanapashä.
Nirkurnami Sión jirkanpita imayyaqpis paykunapa mandaqnin rey kashä.†
8 “Sión marka, üshakunata rikachakuna törrinö karmi Tayta Dios kuyanqan runakunata alli rikaykanki.
Qamqa yapaymi munayyuq kanki.
Kuyanqä Jerusalénpitaqa yapaymi reykuna mandayanqa.
9 Tsaynö kananpä kaykaptinqa ¿imanirtä wachay nanaywan qayaraq warminö qayaraykanki?
¿Manaku mandashuqniki rey kan?
¿Yachaq runakuna wanushqaku?
10 Tsaynö kaptinpis qamcho taq runakunata jäkuq jirkakunapa prësu aparmi Babilonia nacionman chätsiyanqa.
Ay Sión, tsaynö kananpä kaptinqa pasaypa llakikur wachay nanaywan qoshpaykaq warmi qayaranqannö qayaray.
Juklä nacionman apayäshuptikipis contraykikunapa makinpitami Tayta Dios salvayäshunki”.
11 Kananqa atska nación runakunami qorikaskir contrayki shäriyashqa.
Paykunaqa willanakurmi nikäyan:
“¡Sión ushakaykaqta rikar kushipäshun!”
12 Tsay runakunaqa manami tantiyayantsu Tayta Dios imata yarpaykanqantapis.
Manami musyayantsu trïguta wirunanpä ëraman qoriqnö paykunata qorir castigananpä kanqanta.
13 Tayta Diosmi nin:
“Sión, trïguta trillatsir päjanta ushakätsiyanqannö tsay nacionkunata ushakätsiy.
Noqami yanapashayki fiërru waqrayuq y bronci shilluyuq törunö kar atska nacionkunata ushakätsiyänaykipä.
Nirkurmi suwar apakuyanqan riquëzankunata qorimunki.
Tsaytanami kay patsapa duëñun kaptï noqa Tayta Diospä apamunki”.