Jerusalénman Diosta adoraq aywayänanpä ninqan
2
Kaychömi qellqaraykan Amóspa tsurin Isaíasta Tayta Dios revelanqan. Tsay revelacionchömi rikatsirqan shamuq watakuna Judá nación y Jerusalén marka imanö kananpä kanqantapis.2 Shamuq watakunachömi Tayta Diospa wayin kaykanqan jirkanqa wakin jirkankunapita mas respitashqa kanqa.
Tsaymanmi maytsay nacionpitapis Tayta Diosta adorayänanpä runakuna aywayanqa.
3 Tsaynöllami Sión jirkanpita Tayta Diospa yachatsikuyninta maytsaymanpis apayanqa.
Jerusalénpita patsami palabranta willakuyanqa.
Maytsay nacionpita Jerusalénman runakuna aywarmi niyanqa:
“Tayta Dios akranqan jirkanman llapantsik witsäshun.
Jacobpita aywaraq runakuna yärakuyanqan Tayta Diospa wayinman yaykushun.
Tsaychömi kikin yachatsimäshun mandamientunkunata imanö cumplinantsikpä kanqantapis.
Tsaynöpami pay munanqannö llapantsik kawashun”.†
4 Atska nación runakuna chikinakuyaptinpis Tayta Diosmi arreglanqa.
Tsay nacionkuna jatun kaptinpis paymi juzganqa.
Juk markawan juk marka guërrata manami rurayanqanatsu.
Guërracho pelyayänanpäpis manami kamarikuyanqanatsu.
Maytsaycho runakunapis espädankunapitami arädupa planchankunata ruratsiyanqa.
Lanzankunapitanami ösita ruratsiyanqa.†
5 Jacobpita aywaraq runakuna, shayämuy.
Tayta Dios nimanqantsikta cäsukur kawashun.
Mana cäsukuqkunata castigananpä ninqan
6 Tayta Dios, kuyanqayki runakunami rupay yarqamunanlächo taq runakunanö suerti qatiq kayta yachakuyashqa.
Tsaynöllami filisteo runakunanö brüju kayta yachakuyashqa.
Jäpa runakunawan takukarmi paykunanö llutanta rurar kawaykäyan.
Tsaynö kayaptinmi Jacobpita aywaraq kuyanqayki runakunata kacharirqayki.
7 Judá nacioncho runakunapa qorinkuna, qellayninkuna y imayka riquëzankunapis atskami kaykan.
Cawallunkunapis y guërra carrëtankunapis yupayta mana atipaypämi kaykäyan.a
8 Tsaynöllami maytsaychöpis ïdulunkunata rurayashqa.
Kikinkuna rurayanqan ïdulutami qonqurikuykur adoraykäyan.
9 Tsaynö rurarmi penqakuypä kaykäyan.
Taytay, paykunata ama perdonaytsu.
10 ¡Qaqakunapa uchkunkunaman y patsa rurinmanpis pakakuyay!
¡Mantsariypä, chipipiykaq y munayyuq Tayta Diospita pakakuyay!†
11 Runa tukuqkunatapis penqakuymanmi churanqa.
Chölu tukuqkunatapis rugakatsinqami.
Tsay junaqqa Tayta Diosllatami pïmaypis alabayanqa.
12 Llapanta mandaq Tayta Dios castiganan junaqmi chölu tukuqkunata, mana cäsukuqkunata y runa tukuqkunatapis tsoqpakatsinqa.
13 Líbanucho jatunkaray cedru qerukunatapis y Basáncho encina qerukunatapis Tayta Diosmi ushakätsinqa.
14 Altu jirkakunatapis jatun jirkankunatapis ushakätsinqami.b
15 Amparakuyänanpä ruratsiyanqan jatun törrikunatapis ushakätsinqami.
Marka tsaparaq murällakunatapis ushakätsinqami.
16 Tarsispita shamuq kuyayllapä büquikunatapis ushakätsinqami.
17 Tsaynöpami runa tukuqkunatapis penqakatsinqa.
Y chölu tukuqkunatapis rugakatsinqa.
Tsay junaqqa Tayta Diosllatami pïmaypis alabayanqa.
18 Tsay witsanqa runakuna adorayanqan llapan ïdulukunatami illakätsinqa.
19 Mantsariypä, chipipiykaq y llapanpä munayyuq Tayta Diosmi runakunata castigananpä kay patsaman shamunqa.
Tsayta rikarmi pasaypa mantsakar qaqakunapa uchkunkunamanpis y patsapa uchkunkunamanpis pakakuyanqa.
20 Tsay junaqqa qoripita qellaypita rurayanqan ïdulunkunata manana adorarmi ukushkuna y tsiktsikuna kayanqan uchkukunaman jitaykuyanqa.
21 Pasaypa mantsarirmi qaqakunamanpis y machaykunamanpis pakakuyanqa.
Tsaynö pakakuyanqa chipipiykar munayyuq Tayta Dios castigananpä shamuqta rikarmi.
22 Runakunamanqa amana yärakuyaynatsu.
Runakunaqa jamaynö ushakaqllami kaykäyan.