Judá runakunawan Jerusalén runakuna castigashqa kayänanpä ninqan
3
¡Kay ninqäta llapaykikuna wiyakuyay!Llapanta mandaq Tayta Diosmi Judá nacionta kacharinqa.
Jerusalén markatapis mananami yanapanqanatsu.
Tsaymi tsaycho taqkuna mikuyänanpä mikuypis ni upuyänanpä yakupis kanqanatsu.
2 Tsaynöpis manami kayanqanatsu valienti runakunapis ni soldädukunapis,
juezkunapis ni profëtakunapis,
suerti qatiqkunapis ni mayor runakunapis,
3 mandaq capitankunapis ni respitashqa runakunapis,
yätsikuqkunapis, alli yachaqkunapis ni brüjukunapis.
4 Mandaqninkuna kayänanpämi tsayrä yachakuq chölukunallata y wamrakunallata churayanqa.
5 Kikinpurami pasaypa chikinakur kawayanqa.
Vecïnunkunawanpis jukninwan jukninwanmi pelyayanqa.
Chölukunapis awkinkunata mana respitarmi chikiyanqa.
Mana väliq runakunapis yachaq runakunapa contranmi shäriyanqa.
6 Tsaynö kaptinmi taytanpa wayincho kaykaq wawqinta ninqa:
“Jatikunaykipä latsapallaykipis qampaqa kaykanrämi.
Mana alli kawaypita jipiyämänaykipä mandaqnïkuna kaykullay”.
7 Wawqinnami jurarnin ninqa:
“Tsaytaqa ¿imapätä awnishaykipis?
Manami noqapapis mikuynï ni latsapäpis kantsu.
Kay markapa mandaqnin kanäpä ama churayämaytsu”.
8 Jerusalén marka ushakätsishqami kanqa.
Judá nación runakuna pasaypa mana alli kawaymanmi chäyanqa.
Tsaynö ñakayanqa manakaqkunata parlayanqanpita y llutankunata rurayanqanpitami.
Tsaynöpami paykunaqa Tayta Diospa contran rikakuyashqa.
9 Jutsata rurayanqantaqa qaqllanpis willakuykanmi.
Jutsata rurarpis manami penqakuyantsu.
Sodoma runakunapa jutsankunanömi jutsankuna maytsaymanpis musyakaykan.
¡Allaw, kikinkunami ashiyashqa castigashqa kayänanpä!
10 Alli runaqa allita ruranqanpitami kushishqa kawanqa.
11 Jutsa ruraqkunaqa ¡imanörä kayanqa!
Paykunaqa pasaypami ñakayanqa.
Mana allita rurayanqanpitami castigashqa kayanqa.
12 Kuyanqä runakuna, mandayäshuqnikikunami engañayäshurniki llutanta ruraykätsiyäshunki.
Ñakatsishuqnikikunaqa wamranöllami kaykäyan.
Autoridä kaymanpis warmikunallami yaykuykäyan.
13 Tayta Diosqa kuyanqan runakunata juzgananpämi kaykan.†
14 Tsaymi mayor runakunata y mandaqkunata Tayta Dios qayatsir ninqa:
“Üva chakrätami qamkunaa pasaypa ushaykäyanki.
Muchuqkunata suwapäyanqaykitapis wayikikunamanmi qoriykäyanki.
15 Kuyanqä runakunata ¿imanirtä tsaynö ñakaykätsiyanki?
Imaynaqkunatapis ¿imanirtä tsaynö manakaqman churaykäyanki?
Llapanta mandaq Tayta Dios karmi tsaynö nï”.
Jerusalén warmikunata castigananpä ninqan
16 Mastami Tayta Dios nin:
“Sión warmikuna pasaypa chïna tukurrämi ñukikashqa puriyanpis.
Imanöllapis qemtsipaykäyäshunkimi.
Chakinkunacho watakuyanqan adornunkuna suenananpämi tushuykaqnörä puriyanpis.
17 Tsaynö kayanqanpita qaracho qeshyawan castigaptïmi qara putuyashqa penqakuypä puriyanqa”.
18 Jerusalén warmikunata castigarmi Tayta Dios ushakätsinqa chakincho jatiräyanqan adornunkunata,
ganchunkunata y coröna niraq adornunkunata,
19 wallqankunata y pulcërankunata,
chakinman watakuna pulcërankunata y tseqllanman watakunan wachukunkunata,
perfüminkunata y suertipä tsararäyanqan wayrurunkunata,
21 sortïjankunata y senqankunaman jatikuyänan arëtinkunata,
22 kuyayllapä latsapankunata y jakunkunata,
vëlunkunata y cartërankunata,
23 espëjunkunata y fïnu tëlankunata,
umanman shukutakuyänan tëlakunata y aqshukuna jakunkunatapis.
24 Tsay witsanmi perfümiwan mushküyänanpa trokin pasaypa asyäyanqa.
Wachukunpa trokinmi waskalla kanqa.
Shumaq pilltakushqa kayänanpa trokinmi aqtsaynaq qara putu kayanqa.
Kuyayllapä latsapakunata jatikuyänanpa trokinmi qachqa latsapata jatikuyanqa.
Kuyayllapä qaqllankuna kananpa trokinmi melanaypä qeri ushashqa kayanqa.
25 Jerusaléncho taq ollqu kaqkunatami espädawan wanutsiyanqa.
Pelyay yachaqkunapis guërrachömi ushakäyanqa.
26 Markaman yaykuna punkukunapis llakikurmi waqayanqa.†
Jerusalén markapis runan jaqirishqa warminömi rikakunqa.