Mana alli autoridäkunata castigananpä ninqan
3
Tsaypitanami nirqä:¡Jacobpita aywaraq runakunapa autoridäninkuna!
¡Israel runakunapa mandaqninkuna!
¡Shumaq wiyayämay!
¿Manaku tantiyayanki alli kaqta rurayänaykipä kanqanta?
2 Qamkunaqa allikunata rurayänaykipa trokinmi mana allikunata ruraykäyanki.
Tsaymi runa mayikipa qaranta shipraqnö y tullunpita aytsanta shiplliqnö kaykäyanki.
3 Tayta Dios kuyanqan runakunata mikuqnömi kaykäyanki.
Qaranta shipraskir tullunta pakiqnömi kaykäyanki.
Caldukuyänaykipä aytsanta roquqnömi maltrataykäyanki.
4 Tsaynö kayanqaykipitami mañakuyaptikipis Tayta Dios yanapayäshunkitsu.
Ajanätsir jutsata rurayanqaykipita rikaytapis manami munayäshunkitsu.
Llulla profëtakunata castigananpä ninqan
5 Llulla profëtakunami Tayta Dios kuyanqan runakunata engañaykäyan.
Paykunaqa imatapis aptapaq kaqpäqa bendición kananpä kanqantami niyan.
Mana aptapaq kaqpämi itsanqa maldición kananpä kanqanta niyan.
Tsay llulla profëtakunatami Tayta Dios nin:
6 “Qamkunataqa imata ruranäpä kaqtapis manami musyatsiyäshaykinatsu.
Imanö kananpä kaqtapis manami willayäshaykinatsu.
Tsaymi tsakäpakushqanö kar imata willakuyänaykipä kaqtapis musyayankinatsu”.
7 Tsay llulla profëtakunaqa pasaypa penqakuychömi kayanqa.
Tayta Dios mana tantiyatsiptinmi imata willakuyänanpäpis shiminkuna pashtanqatsu.
8 Noqatami itsanqa Tayta Diospa Espïritun yanapaykäman pay munanqannö willakunäpä.
Tsaymi valornï kan Israel runakuna mana cäsukuq kayanqanta y jutsayuq kayanqanta mana mantsariypa willakunäpä.
Jerusalén marka ushakänanpä ninqan
9 ¡Jacobpita aywaraq runakunapa autoridäninkuna!
¡Israel runakunapa mandaqninkuna!
¡Shumaq wiyayämay!
¿Imanirtä demandukunata shumaq arreglayankitsu?
¿Imanirtä leykunatapis cumpliyankitsu?†
10 Tsaynö kayaptikimi Jerusaléncho mana alli ruraykunalla y wanutsinakuylla kaykan.
11 Autoridäkunapis sobornuta apapaqnin kaqpami janan shäriyan.
Sacerdötikunapis qellaypä raykuqllami yachatsiyan.
Profëtakunapis qellaypä raykuqllami willakuyan.
Tsaynö kaykarmi niyan: “Tayta Dios yanapaykämantsikmi.
Ima desgraciapis manami päsamäshuntsu”.
12 Tsaynö kayanqaykipitami Sión jirkana imayka barbichashqa chakranö rikakunqa.
Jerusalén markata ushakätsiptinmi raqällana rikakunqa.
Templutapis juchutsiyaptinmi jachakunallana tsaycho wiñamunqa.†