Imaykayuq mana alli runakunata castigananpä ninqan
2
¡Allaw! Qamkunaqa punurpis mana allikunata rurayänallaykipämi yarpachakuykäyanki.Munayanqaykita rurayänaykipä munayyuq karmi patsa waraskiptin yarpäyanqaykinö llutanta ruraykäyanki.
2 Tsaymi jukpa chakrankunata munapar qechuykäyanki.
Runa mayikikunapa wayintapis qechuykäyanki.
Tsaynö rurarmi warminta y tsurinkunatapis ñakaykätsiyanki.
Herenciantapis mana kuyapaypami qechuykäyanki.
3 Tsaynö kayaptikimi Tayta Dios nin:
“Noqapis yarpachakuykänami qamkunata castiganäpä.
Castigaptï manami imanöpapis qeshpiyankitsu.
Pasaypa ñakatsiptï runa tukuynikikunapis mä maypashi aywanä.
4 Vincishuqnikikunami kushipäyäshurniki cantapar niyäshunki:
‘Allirächi pasaypa ushakäyashqayki.
Diosnikikunami chakraykikunata entregayämashqa.
Qamkunata vincirmi qechuyashqä.
Chakraykikunapis noqakunapanami kaykan’.
Tsaynö nirmi wiyatsipäyäshurniki cantapäyäshunki”.
5 Tsaynöpami Tayta Dios rikatsimanqantsik nacioncho qamkunataqa pipis herenciata aypuyäshunkinatsu.
6 Tayta Dios tsaynö castigananpä kanqanta willakuptïmi runakuna nikäyäman:
“Qam niyämanqaykinöqa manami imaypis päsayämanqatsu.†
7 Jacobpita aywaraqkuna kayaptïmi Tayta Dios noqakunawan ajanantsu.
Castigayämänanpä kanqanta willakuptikipis payqa manami castigayämanqatsu.
Alli runakuna kayaptïmi payqa imaypis yanapayämanqa”.
8 Tsaynö niqkunapämi Tayta Dios nin:
“Qamkunaqa kuyanqä runakuna kaykarmi conträ shäriykäyanki.
Guërrapita wayinkunaman añaw kutikuq runakunapatami latsapankunatapis qechuykäyanki.
9 Kuyayllapä wayinkunata qechuyänayki raykuqmi warmikunata qarquykäyanki.
Tsaynöllami wawankunapa herenciankunatapis qechuykäyanki.
10 “¡Qamkunata manami rikaytapis munätsu!
¡Kaypita juklla aywakuyay!
Kay nacionchöqa mananami täyankinatsu.
Qamkunami jutsayuq kaykäyanki kay nacioncho jutsa ruraylla kananpä.
Tsaymi chipyaq ushakätsiyäshayki.
11 Wakinkunaqa llullakurmi niyan:
‘Tayta Diosmi bendicionta churamunqa vïnupis y ima machätsikuqpis atska kananpä’.
Tsaynö nir pipis willakuptinqa profëtayki kananpä kushishqami chaskiyanki”.
Kuyanqan runakunata Tayta Dios salvananpä ninqan
12 “Jacobpita aywaraq runakuna,
kawaykar quëdaqkunataqa imayka üshata juk patsaman qoriqnömi nacionnikikunaman yapay kutitsiyämushayki.
Kutitsimuptïmi wallkaqlla karpis atskaqnö büllata rurar kushikuyanki.
13 Juklä nacioncho kayanqaykipita kikïmi nacionnikikunaman pushayämushayki.
Marka punkupa yarquyaptikipis manami pipis tsapäyäshunkitsu.
Mandaq reynikikuna karmi puntaykikunata kikï aywashä”.