Miqueas
1
Moreset markacho taq Miqueastami revelacionkunacho Tayta Dios rikatsirqan Samaria markata y Jerusalén markata ima päsananpä kanqantapis. Tsaynö rikatsirqan Judá nacioncho Jotam†, Acaz† y Ezequías† rey kaykanqan witsanmi.Samaria runakunata Tayta Dios castigananpä kanqan
2 Maytsay markakunacho taqkuna, Tayta Dios ninqanta llapaykikuna wiyayay.
Munayyuq Tayta Diosmi sagrädu templunpita patsa jutsata rurayanqaykipita shimpiyäshunki.
3 Taykanqanpita shamurmi jirka puntakunapa purinqa.
4 Jaruptinmi ninacho cëra tsulluqnö tsay jirkakuna tsullunqa.†
Pampakunapis atska yaku aywar raqratsanqannömi raqrayashqa quëdanqa.
5 Llapan tsaykuna kanqa Jacobpita aywaraq runakuna jutsata rurayanqanpitami.
Israel runakunami Samaria markacho jutsata ruraykäyan.
Judá runakunapis Jerusalénchömi ïdulukunata adoraykäyan.
6 Tayta Diosmi nin:
“Samaria markata chipyaq juchutsiptïmi üvata plantayänallanpäna sirvinqa.
Ruminkunata raqrapa qarputsiptïmi cimientullanna quëdanqa.
7 Contrankuna shamurmi Samaria runakuna adorayanqan ïdulunkunatapis pasaypa pakir ushayanqa.
Qerupita rurashqa sagrädu kaqkunatapis llapantami kayayanqa.
Prostitütakuna gänapakuyanqan yuraq qellaywanmi tsay ïdulukuna ruratsishqa karqan.
Contrankuna shamurmi tsay ïdulukunata tsullutsir qellayta fundiyanqa prostitütakunawan kakur pägayänanpä”.
Miqueas llakikunqan
8 Tayta Dios tsaynö castigananpä kanqanta musyarmi llakikurnin ikikyarrä waqaykä.
Qalla chakilla y qallapächullami llakishqa puriykä.
Tsaynöpis chacal aullanqannömi pasaypa waqaykä.
Avestruz qayaranqannömi qayaraykä.
9 Samaria markapa qerinqa ima jampiwanpis manami alliyantsu.a
Tsay qeriqa Judátapis shukushqami.
Judá mayïkuna täyanqan Jerusalénmanpis chashqami.
10 Tsaytaqa Gat markachob runakunata ama willayaytsu.
Desgracia päsamanqantsikta mana musyayänanpä ama waqayaytsu.
Bet-le-afracho taq runakuna, pasaypa llakikur allpacho qoshpayay.
11 Safircho taqkuna, nacionnikipita juklämanmi qallapächullata prësu apayäshunki.
Zaanáncho taqkuna, yanapayäshunaykipä manami pipis yarqayämunqatsu.
Beteselcho taqkuna, waqayaptikipis manami pipis kuyapäyäshunkitsu.
12 Marotcho taqkunaqa pasaypa llakikuyanqa pipis salvananta munarmi.
Paykunamanqa desgraciallatami Tayta Dios kachamunqa.
Tsay desgraciaqa Jerusalén marka punkuyaqmi chanqa.
13 Laquischo taq runakuna, qamkunami Israel nación runakunanö mas puntata Judá nacioncho jutsata rurayarqayki.
Jutsata rurayänanpä Sión runakunatapis qamkunami yachatsiyashqayki.
Kananqa castïgumi qamkunaman chämunqa.
Tsay castïgupita qeshpiyänaykipä cawalluykikunaman carrëtaykikunata watayay.
14 Imaypis mana kutiyämunaykipä Moreset-gat markapita despidikur aywakuyay.
Israel nacionpa mandaqnin reykunaqa Aczib runakunamanmi yärakuykäyan.
Tsaynö yärakuyaptinpis Aczib runakunaman castïgu chaptin tsay reykunata manami imanöpapis yanapayanqatsu.
15 Maresacho taqkuna, qamkunata ushakätsiyäshunaykipämi contraykikunata kachamushä.
Tsaymi Israel nacioncho mas imaykayuqkunapis mantsarirnin qeshpir Adulam machayman pakakuyanqa.
16 Jerusaléncho taq runakuna, kuyayanqayki tsurikikunatami karu nacionman apakuyanqa.
Tsaynö kaykaptinqa llakikurnin qalla putuypa aqtsaykikunata rutukuyay.
Wiskurnö kayänaykipä pükaypa pükar rutukuyay.