Israel runakunapa mandaqnin rey yurinanpä ninqan
5
(4.14) Jerusalén runakuna, washäkuyänaykipä kamarikuyay.Qamkunata atacayäshunaykipämi jäpa runakuna chäyämunqa.
Paykunami vinciyäshurniki mandayäshuqniki reyta qaqllancho pasaypa wiruyanqa.
2 (1) Belén Efrata marka, Judácho wakin markakunapita mas takshalla kaptikipis qamchömi Israel runakunapa mandaqnin rey yurinqa.†
Payqa unaypita patsami kaykan.
3 (2) Llulluta warmi qeshyakunqanyaqllami contrankunapa makincho Israel runakunata Tayta Dios kachaykunqa.
Wamra yuriskiptinnami Israel runakuna mashtakashqa kaykäyanqanpita kutiyämunqa.
4 (3) Tsay wamra wiñarkurnami Tayta Dios yanapaptin imayka üsha mitsiqnöpis kuyanqan runakunata shumaq rikanqa.
Maytsaychöpis runakuna payta adorayaptinmi Israel runakuna pitapis mana mantsariypa añaw kawayanqa.
5 (4) Paymi salvamäshun añaw kawanantsikpä.
Tsay witsan Asiria runakuna markantsikta atacar palaciuntsikkunaman yaykamuptinpis michäyänanpämi atska capitankunata kachashun.
6 (5) Tsay capitankunami espädankunawan Asiria runakunata vincir munayninkunaman churayanqa.
Tsaynöpami Nimrodpaa markanpita salvamäshun.
Contrankunata Israel runakuna vinciyänanpä ninqan
7 (6) Jacobpita aywaraqkunata wakinta wanutsiyaptinpis kawaykar quëdaqkunaqa maytsay markakunachöpis respitashqami kayanqa.
Shullyapis tamyapis Tayta Diospa bendicionnin kanqannömi paykunapis llapan marka runakunapä bendición kayanqa.
8 (7) Mayqan markapis contran shärir atacaptinqa munti uywakunata león atacaqnörämi Israel runakuna atacayanqa.
Malta león üshakuna kaykanqanman yaykuskir wanutsir ushanqannömi paykunapis contrankunata wanutsir ushayanqa.
Kawaykaqtaqa manami ni jukllayllatapis kachäyanqatsu.
9 (8) Tayta Dios, tsaynöpami Israel runakunapa llapan contrankunatapis ushakätsinki.
10 (9) Tsay contran runakunatami Tayta Dios nin:
“Tsay junaqmi cawalluykikunatapis chipyaq wanutsishä.
Guërra carrëtaykikunatapis llapantami ushakätsishä.
11 (10) Markaykikunatapis y amparakuyänaykipä shäritsiyanqayki jatun wayikunatapis llapantami juchutsir ushakätsishä.
12 (11) “Brüjukunatapis llapantami ushakätsishä.
Suerti rikaqkunapis qamkunacho manami kanqanatsu.
13 (12) Adorayanqayki ïdulukunatapis y wankakunatapis ushakätsiptïmi kikikikuna rurayanqayki dioskunata imaypis adorayankinatsu.
14 (13) Asera diösapä jawiyanqayki raku qerukunatapis llapantami ushakätsishä.
Markaykikunatapis chipyaqmi juchutsishä.
15 (14) Pasaypa ajanarmi mana cäsukamaq runakunataqa may markacho täyaptinpis castigashä”.