Israel runakuna washäkuyänanpä Tayta Dios ninqan
6
Tayta Dios ninqanta wiyayay.Paymi nin:
“Jirkakuna wiyaykäshuptiki shärirkur ñöpächo washäkuyay.
Jirkakuna wiyayäshunaykipä jinchi parlayämuy.
2 Jirkakuna, kuyanqä runakunata shimpiptï wiyayämay.
Patsata tukmaraq cimientukunapis, Israel runakunata cuentata mañaptï wiyayay.†
3 “Kuyanqä runakuna, ¿imatatä mana allita rurashqä?
¿Imachötä qamkunata ajanätsishqä?
Imacho qallayätsinqätapis mä niyämay.
4 Egiptucho wätay kayanqaykipita salvarmi qamkunata jipimurqä.†
Pushayämushunaykipämi Moisésta, Aarónta† y Maríata† kachamurqä.
5 Kuyanqä runakuna, yarpäyay Moab nacionpa mandaqnin rey Balac qamkunapa contraykikuna shärinqanta.
Tsaynöpis yarpäyay Beorpa tsurin Balaam maldicionayäshunaykipa trokin bendicionta churamunqanta.†
Yarpäyay Sitimpita Gilgalyaq Jordán mayuta imanö päsayanqaykitapis.†
Tsaykunata yarparmi tantiyayanki noqa Tayta Diosnikikuna qamkunata imaypis salvanqäta”.
Tayta Dios imata munanqanpis
6 ¿Imallantsikwanrä Tayta Diospa ñöpanman chäshun?
¿Imallatarä munayyuq Tayta Diosta adoranantsikpä apashun?
¿Sacrificiuta rupatsinantsikpä watayuq torïtukunatatsurä apashwan?
7 Juk waranqa (1,000) carnërukunata pishtaskir paypä rupatsishqa ¿kushikunqatsurä?
Chunka waranqa (10,000) mayukuna aywaykaqtanö atska aceitita altarman jichapashqa ¿kushikunqatsurä?
Jutsata ruranqantsikpita mayor tsurintsiktapis wanuskatsir rupatsishqa ¿kushikunqatsurä?
8 Tayta Diosqa imata munanqantapis nimashqantsiknami.
Payqa munan alli kaqllata ruranantsikta, runa mayintsikta kuyapänantsikta y mana runa tukuypa pay ninqanta cäsukunantsiktami.†
Jerusalén runakunata Tayta Dios castigananpä ninqan
9 Jerusalén runakuna, Tayta Diosmi qayaykäshunki.
Tantiyakuq runa karqa paypita mantsapakuyay.
Qayakurmi nin:
“Markacho kaqkuna y mayor runakuna, llapaykikuna wiyakuyay.
10 Wayikikunachöpis suwakuyanqallaykimi kaykan.
Tsaynöpis wayikikunacho kaykan runa mayikita engañayänaykipä pësakunallami.
11 ¿Imanöpatä perdonäman runa mayinta pësuwan engañaqtaqa?†
12 Kay markacho kaykaq imaykayuq runakunaqa runa mayinta ñakatsiq, runa mayinta engañaq y llullakuqllami kaykäyan.
13 “Tsaynö kayanqaykipitami castigayäshayki.
Jutsata rurayanqaykipitami ushakätsiyäshayki.
14 Mikuyaptikipis pachaykikuna mana juntaptinmi mallaqaykällar kawayanki.
Cosëchata qoriyanqaykipis manami aypanqatsu churayänaykipä.
Churakuyanqaykitapis guërracho vinciyäshurnikimi apakuyanqa.
15 Mururpis manami cosechayankitsu.
Aceitünasta aqarpis aceitinwan manami llushikuyankitsu.
Üvata jarurpis manami vïnuta upyayankitsu.
16 “Qamkunaqa rey Omri yachatsinqan costumbrinkunata rurarmi jutsayuq kaykäyanki.
Rey Acab jutsata rurar kawanqannömi kawaykäyanki.†
Tsaynö kayanqaykipitami pasaypa castigar desgraciaman jitayäshayki.
Pasaypa ñakayanqaykita rikarmi asipäshurniki penqakuyman churayäshunki”.