Jutsa rurayman Israel runakuna churakäyanqan
7
¡Allaw, noqallä!Cosechashqa chakraman yaykur üvata y hïgusta ashiq runanömi kaykä.
Chakracho imatapis mana tarir mallaqaq runa llakikunqannömi llakikü.
2 Kay nacionchöqa manami pipis Tayta Diosta cäsukuntsu.
Allillata ruraq runaqa manami jukpis kantsu.†
Wanutsinakuyllapämi yarpaykäyan.
Jukninpis jukninpis ushakätsinakuyllatami munaykäyan.
3 Jutsa rurayllapämi yarparäyanpis.
Autoridäkunapis y juezkunapis chaskipakurmi shumaq arreglayantsu.
Imaykayuq runakuna pägakuykurmi munayanqanta ruratsiyan.
Tsaynöpami wakin runakunapis jutsa rurayllaman churakashqa kayan.
4 Paykunachöqa mas respitashqa runakunapis kashanörämi kaykäyan.
Mas yärakuypä runakunapis turuna kashanörämi kaykäyan.
Tsaynö kayaptinmi jutsankuna poquykanna.
Willakuq profëtakuna willakuyanqannöllami castigashqa kayänanpä kaq junaq chaykämunna.
Tsay witsanqa ima ruraytapis manami kamäpakuyanqatsu.
5 Pimanpis ama criyiyaynatsu.
Kuyanakuyanqayki amïguykikunamanpis ama yärakuyaytsu.
Warmikikunatapis llutallaqa imatapis ama willayaytsu.
6 Ollqu tsurinmi taytanta manakaqman churan.
Warmi wawanmi mamanpa contran shärin.
Llumtsuyninpis suegrantami chikin.
Tsaynö karmi tsay wayillacho tarpis kikinkunapura chikinakuyan.†
7 Tsaynö kaptinpis noqaqa Tayta Diosmanmi yärakuykä.
Salvamänanpä Tayta Diosmanmi imaypis yärakushä.
Payqa mañakunqäta wiyamanmi.
Israel runakunata Tayta Dios salvananpä ninqan
8 Tsay witsanmi Israel runakuna niyanqa:
“Chikimaqnïkuna, desgracia päsamanqanpita ama kushipäyämaytsu.
Ishkirpis shärishämi.
Mantsariypä tsakaychönö kaptïpis Tayta Diosmi noqapä aktsi kanqa.
9 Tayta Diosta ajanätsirmi jutsata rurashqä.
Tsaymi castigamaptinpis awantashä.
Tsaypitanami perdonamar aktsiman jipimanqa.
Salvamaptin kushishqami kawashä”.
10 Chikimaqnïkuna rikayänanpämi Tayta Dios yanapamanqa.
Tsayta rikarmi pasaypa penqakushqa kayanqa.
Tayta Dios castigamanqanta rikarmi paykunaqa kushipämar niyämarqan: “¿Maychötä kaykan Diosniki?”†
Tsaynö niyämanqanpitami cällicho kaykaq mitunö llutskashqa kayanqa.
Tsaynö kaykaqta rikarmi noqapis paykunata kushipäshä.
11 Jerusalén marka, jiruruypa corralaraq pirqaykikuna allitsashqa kananpä kaq junaq chaykämunnami.
Lindëruykikunapis mas jatunmi kanqa.
12 Tsay witsanqa maytsaypitami runakuna qamman shayämunqa.
Tsaymi shayämunqa Asiriapita, Egiptupita, Nilo mayupita, Éufrates mayupita, lamar kuchunpita, jallqakunapita y maytsaypitapis.
13 Jutsata rurallar kawayanqanpitami markankuna tsunyaranqa.
Tayta Diosta mañakuyanqan
14 Tayta Dios, kuyanqayki runakuna kaykäyaptïqa rikaykayällämay.
Noqakunaqa kaykäyä üshaykikunanömi.
Allinnincho tarpis munti rurincho oqrakashqanömi kaykäyä.
Unay castäkunata alli rikanqaykinö noqakunatapis rikaykayällämay.
Basáncho y Galaadcho alli qewakuna kayanqanman yapay pushaykayällämay.
15 Unay castäkunata Egiptupita jipimurnin milagrukunata ruranqaykinö noqakunapäpis milagrukunata ruraykullay.
16 Milagrukunata ruranqaykita wakin nación runakunapis rikayätsun.
Tsayta rikarmi paykunapis tantiyakuyanqa qamlla munayyuq Dios kanqaykita.
Kikinkuna munayniynaq kanqanta tantiyaskirmi pasaypa penqakushqa kayanqa.
Äyakashqa rikakurmi ima ruraytapis kamäpakuyanqatsu.
17 Paykunaqa culebrakunanömi allpata mikuyanqa.a
Pakaraykäyanqanpita yarqamurmi ñöpaykiman tsuktsukyaykar chäyämunqa.
18 Tayta Dios, qamnöqa manami juk dios kantsu.
Kuyanqayki runakuna perdonta mañakuyäshuptikiqa perdonankimi.
Jutsankunatapis qonqankimi.
Ajanar imayyaqpis castiganaykipa trokinqa salvanqayki runakunata kuyaparmi yanapanki.
19 Taytay, yapay kuyapaykayällämay.
Jutsata rurayanqätapis amana yarparaykullaytsu.
Tsaypa trokinqa jutsata rurayanqäta mas jondunnin lamarman jitarpuy.
20 Abrahamta, Jacobta y wakin unay castäkunata kuyapar awninqaykita cumpliykullay.†