Ishkay canasta hïgusta revelacioncho Jeremías rikanqan
24
Judá nacionpa mandaqnin rey Joacimpa tsurin Jeconíasta, Judá nación autoridäkunata, artesänukunata y herrërukunata Babilonia nacionpa mandaqnin rey Nabucodonosor nacionninman apakuptinmi† Tayta Dios revelamar rikatsimarqan templu punkucho ishkay canastawan hïgus kaykaqta. 2 Jukaq canastachöqa punta poquq hïgus maypis mikukurkuy munaymi karqan. Jukaq canastachönami pasaypa melanaypä ismushqa hïguskuna karqan.3 Tsaymi Tayta Dios tapumar nimarqan: “Jeremías, ¿imatatä rikaykanki?”
Tsaymi nirqä: “Hïgustami rikaykä. Juk canastachömi kaykan maypis mikukuypä alli hïgus. Jukaq canastachönami kaykan melanaypä pasaypa ismushqa hïgus”.
4 Tsaymi Tayta Dios nimarqan: 5 “Israel runakunata kuyaq Tayta Diosmi nin: ‘Babiloniaa runakunapa nacionninman prësu apatsinqä Judá runakunatami alli hïgustanö rikashä. 6 Ima desgraciapitapis tsaparmi Judá nacionman qorimur alli kawayänanpä yanapashä. Yapayqa manami ushakätsishänatsu ni qarqushänatsu. 7 Tayta Diosnin kanqäta tantiyayänanpämi paykunata shumaq tantiyatsishä. Paykunami kuyanqä runakuna kayanqa. Noqanami paykunapa Diosnin kashä. Llapan shonqunwan yapay yärakayämaptinmi tsaynö kanqa.
8 “ ‘Judá nacionpa mandaqnin rey Sedequíasta, yanapaqninkunata, Jerusaléncho quëdaq runakunata y Egiptuman qeshpiq runakunatami itsanqa ismushqa hïgusnö kayänanpä churashä. Noqa Tayta Diosmi tsaynö nï. 9 Tsay runakunata castiganqäta musyarmi maytsay nacioncho taq runakunapis mantsariyanqa. Maymanpis qarqunqäman chäyaptinmi pïmaypis manakaqman churar jamuräyanqa y asipäyanqa. Pasaypa maldicionashqami kayanqa. 10 Nacionnincho chipyaq ushakäyanqanyaqmi wakinkuna guërracho wanuyanqa, wakinkuna mallaqaywan wanuyanqa y wakinkunana pesti qeshyawan wanuyanqa. Tsaynömi ushakäyanqa unay castankunata y kikinkunata tsay nacionta entregashqa kaptïpis’ ”.