Qanchis chunka (70) wata Judá runakuna ñakayänanpä ninqan
25
Josíaspa tsurin Joacim Judá nacionpa mandaqnin rey chusku watana kaykaptina y Babilonia nacioncho Nabucodonosor mandayta qallaykunqan witsanmi† Tayta Diospa willakuqnin profëta Jeremías 2 Judá nacioncho taq runakunatawan Jerusaléncho taq runakunata willar nirqan: 3 “Amónpa tsurin Josías chunka kimsa wata Judá nacionpa mandaqnin rey kaykanqanpita patsami Tayta Dios nimanqankunata kutin kutin qamkunata willashqä. Ishkay chunka kimsa (23) watana tsaynö willakuykaptïpis qamkunaqa manami wiyakuyashqaykitsu.4 “Sirviqnin profëtakunata unaypita patsa kutin kutin Tayta Dios kachamuptinpis manami cäsukuyashqaykitsu ni wiyakuyashqaykitsu. 5 Tsay profëtakuna willakurmi niyäshurqayki: ‘Jutsa rurayta wanakuyay. Wanakurqa unay castaykikunata Tayta Dios rikatsinqan nacionchömi imayyaqpis täyanki’. 6 Tsaynöllami niyäshurqayki: ‘Juk dioskunamanqa ama yärakuyaytsu. Tsaykunataqa ama sirviyaytsu ni adorayaytsu. Llutankunata mana rurayaptikiqa ima castïguwanpis manami castigayäshunkitsu’ ”.
7 Tayta Diosmi nin: “Profëtakuna tsaynö nikäyäshuptikipis manami wiyakayämashqaykitsu. Tsaypa trokinqa rurayanqayki ïdulukunaman qonqurikurmi masrä ajanätsiyämashqayki”.
8 Llapanta mandaq Tayta Diosmi mastapis nin: “Profëtakuna willayäshunqaykita mana cäsukuyaptikiqa 9 Babilonia nacionpa mandaqnin rey Nabucodonosortami chipyaq ushakatsiyäshunaykipä norti kaqlä nacionkunapita minkakunqan soldädunkunatawan kachamushä. Paykunawan qamkunata y ñöpayki nación runakunata castigaptïmi markaykikunapis raqällana rikakunqa. Tsayta rikarmi wakin mantsariyanqa y wakinna kushipäyäshunki.
10 “Llapanta ushakätsiptïmi fiestatapis rurayanqanatsu, kushikur asikachäyanqanatsu, jipashpis ni chölupis kuyanakurnin cantapänakuyanqanatsu,† marayninkunachöpis aqakuyanqanatsu ni aktsinkunatapis tsaritsiyanqanatsu. 11 Kay nacionta chipyaq ushakätsiyaptinmi raqällana rikakunqa. Kawaykar quëdaqkunaqa qanchis chunka (70) watayaqmi Babilonia nacionpa mandaqnin reypa munaynincho kayanqa.†
12 “Qanchis chunka (70) wata cumpliptinnami Babilonia nacionpa mandaqnin reyta y tsaycho taq runakunata jutsa rurayanqanpita castigar chipyaq ushakätsishä. Noqa Tayta Diosmi tsaynö nï. 13 Paykunata castiganäpä profëta Jeremíaswan willakatsinqänölla y kay röllucho qellqaranqannöllami castigashä. 14 Babilonia runakunata castigaptïmi kuyanqä runakunata munaynincho tsararäyanqannölla paykunatapis juk nación runakuna y mandaqnin reykuna munaynincho tsararäyanqa. Babilonia runakuna llutankunata rurayanqanpitami tsaynö castigashä”.
Llapan nacionkunata castigananpä ninqan
15 Israel runakunata kuyaq Tayta Diosmi revelacioncho nimarqan: “Kay aptaraykanqä cöpacho ajanaynï juntami kaykan.† Kay cöpata apakurkur kachanqä nacionkunaman aywar runakunata uputsimuy. 16 Upurkurmi löcuyäyarnin machashqa runanö tsankapaykachäyanqa. Tsay upuyanqanqa manami vïnutsu kanqa, sinöqa paykunata castiganäpä guërrami”.
17 Nimaptinmi revelacioncho Tayta Diospa makinpita tsay cöpata chaskirqä. Nirkurmi Tayta Dios kachamanqan llapan nacionkunaman aywaykur runakunata uputsirqä. 18 Tsaymi uputsirqä Jerusaléncho taq runakunata, Judá nacioncho taq runakunata, reykunata y autoridäkunatapis. Paykunata Tayta Dios pasaypa castigaptinmi wayinkunapis raqällana rikakushqa. Tsaynö castiganqanta musyaqkunami wakin mantsariyan y wakinna kushipäyan. Pasaypa maldicionashqa karmi kananyaqpis tsaynö kaykäyan.
19 Tsaynöllami revelacioncho uputsirqä Egipto nacionpa mandaqnin rey Faraónta, yanapaqninkunata, autoridäninkunata, Egipto runakunata 20 y tsaycho taq jäpa runakunatapis. Tsaynöllami uputsirqä Uz particho taq reykunata y filisteo runakunapa mandaqnin reykunatapis. Filisteo runakunapa mandaqnin reykunaqa täyarqan Ascalón, Gaza, Ecrón y Asdod markakunachömi. Tsaynö kaptinpis Asdod marka ushakashqa kaptinmi juk ishkayllana tsaycho täyarqan.
21 Tsaynöllami uputsirqä Edom nacioncho taqkunata, Moab nacioncho taqkunata, Amón nacioncho taqkunata, 22 Tiro markapa mandaqnin reykunata, Sidón markapa mandaqnin reykunata, Mediterráneo Lamar kuchun markakunacho taq reykunata, 23 Dedán runakunata, Tema runakunata, Buz runakunata, llapllanta rutukuq runakunatab, 24 Arabia particho taq reykunata, tsunyaq jirkacho taq llapan runakunapa mandaqnin reykunata, 25 Zimri nacionpa mandaqnin reyta, Elam nacionpa mandaqnin reyta y Media nacionpa mandaqnin reytapis. 26 Tsaynöllami uputsirqä norti kaqlächo kaykaq llapan reykunata cerca cerca täyaptinpis o karu karu täyaptinpis. Kay patsacho llapan reykunatapis tsaynöllami uputsirqä. Ultimutaqa upunqa Babilonia nacionpa mandaqnin reymi.
27 Uputsiq aywanäpä kachamarninmi Tayta Dios nimarqan: “Paykunata uputsir ninki: ‘Israel runakunata kuyaq y llapanta mandaq Tayta Diosmi nin: Machäyanqaykiyaq, lanzapakuyanqaykiyaq y jitaräyanqaykiyaq tsay cöpapita upuyay. Tsaynö kayanki guërrawan qamkunata castigaptïmi’.
28 “Tsay cöpapita upuyta mana munayaptinqa ninki: ‘Llapanta mandaq Tayta Diosmi nin: Munar mana munarpis upunaykimi. 29 Jerusalénpitami castigar qallaykü. Adorayämänanpä akranqä markacho taq runakunata castigaykarqa qamkunata peormi castigayäshayki. Maytsaychömi guërrawan runakunata castigashä. Llapanta mandaq Tayta Dios karmi tsaynö nï’ ”.
30 “Jeremías, maytsaycho taq runakunata castiganäpä kaqta willar ninki:
“ ‘Tayta Diosmi ciëlupita patsa leonnöpis qayarämun.†
Tanqanpita patsami qayakamunqan maqakuynörä wiyakämun.
Akranqan runakunata castigananpämi qayakaykämun.
Üvata jaruq runakuna qayakuyanqannömi maytsaychöpis taq runakunata castigananpä qayakamun.
31 Qayakamunqan wiyakanqa kay patsapa llapan kuchunyaqmi.
Tayta Dios tsaynö qayakamunqa entëru nacionkunacho taq runakunata juzgananpämi.
Payqa llapan runakunapa jueznin karmi payta mana cäsukuqkunata espädawan ushakätsinqa.
Tayta Diosmi tsaynö nin.
32 “ ‘Llapanta mandaq Tayta Diosmi mastapis nin:
Noqaqa llapan nacionkunatami qatinayllaman castigashä.
Rabyanaynïqa pasaypa mantsariypä mangäda shamuqnömi kaykan.
33 Castigaptïmi wanuqkuna maytsaycho jitaräyanqa.
Wanuptin waqapänanpäpis ni pampananpäpis manami pipis kanqatsu.
Uywakunapa iskannömi maytsaychöpis wanushqa jitaräyanqa.†
34 “ ‘¡Reykuna, mantsarir qayaräyay!
¡Autoridäkuna, llakikurnin patsacho qoshpayay!
¡Wera üshatanö wanutsiyäshunaykipämi hörayki chämushqa!
35 “ ‘Reykuna manami imanöpapis salvakuyanqatsu.
Autoridäkunapis manami qeshpiyta kamäpakuyanqatsu.
36 ¡Reykuna qayaräyanqanta wiyayay!
¡Autoridäkuna waqayanqanta wiyayay!
Paykuna mandanqan nacionkunatami Tayta Dios ushakätsinqa.
37 Mandanqan kuyayllapä nacionkunatami pasaypa rabyar ushakätsinqa.
38 Machayninpita yarqamuq leonnömi Tayta Dios kaykan.
Payqa pasaypa rabyanashqami kaykan.
Tsaymi mantsariypä guërrawan maytsay naciontapis ushakätsinqa’ ”.