Pakishqa uylluman tinkutsinqan
19
Tayta Diosmi nimarqan: “Uyllu rantiq ayway. Nirkur juk ishkay mayor runakunata y mayor sacerdötikunatapis qayaykatsir 2 Ben-Hinom raqraman pushay. Markapita yarqunki Manka Ruraq niyanqan punkupa. Noqa ninqäta paykunata tsaycho willanki.3 “Willar ninki: ‘Judá nacionpa mandaqnin rey y Jerusaléncho taq runakuna, llapaykikuna wiyayämay. Israel runakunata kuyaq y llapanta mandaq Tayta Diosmi nin: Kay nación runakunata castigaptï pasaypami ñakayanqa. Tsaynö ñakayanqanta musyaq kaqqa pasaypami mantsakanqa. 4 Tsaynö castigayäshayki adorayämänaykipa trokin juk dioskunata adorar inciensiuwan qoshnitsiyanqaykipitami. Tsay dioskunataqa unay castaykikunapis ni mandaq reykunapis manami imaypis adorayashqatsu. Juk dioskunata adorarmi kay raqrata pasaypa manakaqman churayashqayki.
“ ‘Tsay jananmanmi jutsaynaq kaqkunatapis kaycho wanutsiyashqayki. 5 Baalta adorar tsurikikunata rupatsiyänaykipämi altarkunatapis kaycho pirqayashqayki. Tsaynö rurayänaykipäqa manami mandashqätsu ni nishqätsu ni yarpayllapis yarpashqätsu.
6 “ ‘Mastami Tayta Dios nin: Castiganä junaq chämuptin kay raqrata manami Tofet jutiwantsu ni Ben-Hinom jutiwantsu reqiyanqa, sinöqa Wanutsinakuy Raqra jutiwanmi reqiyanqa.†
7 “ ‘Noqami Judá runakuna y Jerusalén runakuna yarpäyanqantapis pantakätsishä. Contrankuna vincir wanutsiyaptinmi ayankunatapis wiskurkunawan jirka uywakuna mikuyanqa. 8 Kay marka ushakanqanqa pasaypa mantsariypämi kanqa. Tsaynö castiganqäta rikaykurmi llapanpis tsaypa päsaqkuna äyakashqa rikaräyanqa.
9 “ ‘Contraykikuna jiruruypa tsaparäyäshuptikimi mikuypis pasaypa ushakanqa. Tsaynöpami kamakätsishä runa mayikita y tsurikikunata ollqutapis warmitapis mikuyänaykip䆒.
10 “Jeremías, tsaynö willakuyta ushaskir pushanqayki runakunapa ñöpancho rantinqayki uylluta pakirinki. 11 Nirkur ninki: ‘Llapanta mandaq Tayta Diosmi nin: Tsay uyllutanömi Judá runakunatawan Jerusalén runakunata ushakätsishä. Pakishqa uylluta pipis allïtsayta mana kamäpakunqannömi paykunatapis allïtsayta kamäpakunqanatsu. Wanuqkunata pampayänanpä patsa mana jäkuptinmi Tofetmanna pampayanqa. 12 Ayakunalla Tofetcho jitaranqannömi kay markachöpis ayakunalla jitaräyanqa.
“ ‘Tsaynömi kay markata y kay markacho taykaqkunatapis ushakätsishä. 13 Jerusaléncho kaykaq wayikunacho y Judá nacionpa mandaqnin reykunapa palaciunkunachöpis ayakuna jitaräyaptinmi Tofetnö qanra tikrayanqa. Paykunata tsaynö castigashä tsay wayikuna jananchoa y tsay palaciukuna janancho qoyllurkunata adorayanqanpita y inciensiuwan qoshnitsir juk dioskunapä vïnuta wiñapäyanqanpitami’ ”.
14 Tayta Diospa jutincho willakuskirmi Tofetpita templuman Jeremías kutirqan. Templu patiuman ichiykurmi runakunata nirqan: 15 “Israel runakunata kuyaq y llapanta mandaq Tayta Diosmi nin: ‘Ninqäkunata wiyakuyta mana munayaptikimi willakatsinqänölla kay markacho y ñöpan markakunacho taqkunatapis castigashä’ ”.