Pasur castigashqa kananpä Jeremías willakunqan
20
Imerpa tsurin Pasurqa sacerdötimi karqan. Paymi templu täpaqkunapa mandaqnin karqan. Jerusalén runakunata y Judá runakunata Tayta Dios castigananpä kanqanta Jeremías willakunqanta wiyarmi Pasur pasaypa ajanarqan. 2 Tsaymi profëta Jeremíasta maqaskatsir Benjamín jutiyuq punku waqtancho cëpumana sigurarqan. Tsay punku karqan templuman yaykunachömi. 3 Cëpucho juk junaq prësu jatiraskatsirmi Jeremíasta Pasur jipitsirqan.Tsaymi Jeremías nirqan: “Pasur, Tayta Diosmi jutikita trukatsishqa Magor-misabibb kananpä. 4 Tayta Diosmi nin: ‘Kikikita y amïguykitapis pasaypami castigashayki. Rikaykaptikimi amïguykikunata contraykikuna espädawan wanutsiyanqa. Tsaynöllami Judácho taqkunata llapanta entregashä Babilonia nacionpa mandaqnin reypa makinman. Paymi wakinta Babiloniaman prësu apanqa y wakintana espädawan wanutsinqa. 5 Tsaynöllami kay markacho kaq riquëzakunatapis y Judá nacionpa mandaqnin reykunapa tesörunkunatapis tsay reyta qoykushä. Tsaymi soldädunkunawan llapan väliq kaqkunata imaykatapis Babiloniaman apakuyanqa.
6 “ ‘Pasur, qamtapis y wayikicho taqkunatapis Babiloniamanmi prësu apayäshunki. Wanuptikimi tsaycho pampayäshunki qamta y profëta tukur criyitsinqayki amïguykikunatapis’ ”.
Jeremías llakikur Tayta Diosta mañakunqan
7 Tayta Dios, ¡mana munaykaqtami profëta kanäpä churamashqayki!
¡Llapanpä munayyuq karmi obligamashqayki!
Willakuptïmi imay hörapis asipäyämar manakaqman churayäman.
8 Willakurmi imaypis nï:
“¡Pasaypa ñakaykunami kanqa!
¡Llapanmi ushakanqa!”
Tsaynö willakunqäta mana criyiyämarmi runakuna imaykata qayapäyäman.
Qoyay qoyaymi manakaqman churayäman.
9 Tsaymi nirqä:
“Tayta Diospa willakuyninta mananami willakushänatsu.
Paypa jutincho mananami parlashänatsu”.
Tsaynö niptïpis willakuynikiqa shonqücho nina rupaykaqnömi kaykan.
Tullüyaqmi tsay rupanqan chaykushqa.
Upällakuyta munarpis manami kamäpakütsu.†
10 Runakunami manakaqman churamar asipäyämänanpä shapshapyayllapa parlar niyan:
“¡Magor-misabib!”c
Tsaynöllami llapan qorikaykur willanakuyan manakaqkunata tumpayämänanpä.
Amïgükunapis munaykäyan imanöllapapis mana alliman chänätami.
Paykunaqa willanakuyan imallatapis criyiratsimar llutanta parlatsiyämänan raykuqmi.
11 Tsaynö kaptinpis pïmayta vinciq jatun soldädunömi Tayta Dios yanapaykäman.
Conträ shäriqkunaqa vincimayta manami kamäpakuyanqatsu.
Kikinkuna mana alliman charmi pasaypa penqakuyanqa.
Tsaytami imayyaqpis runakuna yarparäyanqa.
12 Llapanta mandaq Tayta Dios, alli runakunataqa pruebankimi.
Runakuna imata yarpaykäyanqantapis musyankimi.
Conträkuna mana allita yarpäyanqanta musyaykarqa castigaykullay.
Makikimanmi llapantapis churaykamü.†
13 ¡Tayta Diosta alabar cantashun!
¡Paymi mana alli runakunapa munayninpita muchuqkunata salvan!
14 ¡Yurinqä junaqpis maldicionashqa katsun!
¡Imapärä mamäpis wachamarqan!†
15 ¡Taytäta kushikatsir “ollqu wamrami yurishqa” nir willaq runapis maldicionashqa katsun!
16 Tsay willaq runaqa katsun Tayta Dios mana kuyapaypa ushakätsinqan markakunanö.d
Tutapapis wiyatsun nanaywan qayaraykäyaqta.
Pullan junaqpapis wiyatsun guërracho qayaraykäyaqta.
17 ¡Ima allirä kanman karqan mamäpa pachallanchöna wanutsimaptin!
Mamäpa pachallanchi panteonnïpis kanman karqan.
Tsaynö kaptin manami imaypis yurïmantsu karqan.
18 Tsayjinanpa ñakar llakikunalläpäqa ¡imapärä yurirqäpis!
Penqakuycho kanalläpäqa ¡imapärä atsikyay patsatapis rikarqä!