Manka ruraqman tinkutsinqan
18
Jeremíastami Tayta Dios nirqan: 2 “Ayway manka ruraqpa wayinman. Tsaychömi nishayki runakunata imata willanaykipäpis”.3 Manka ruraqman aywarmi tarishqä tornuwan mankata ruraykaqta. 4 Ruraykanqan manka munanqannö mana yarquptinmi yapay tsay mitullapita juk mankatana munanqannö rurarqan.
5 Tsaymi Tayta Dios revelamar nimarqan: 6 “Israel runakuna, manka ruraq runa ruranqannö ¿manatsurä noqapis qamkunata ruräman? Manka ruraqpa makincho mitu kanqannömi qamkunapis makïcho kaykäyanki.†
7 “Noqaqa nacionkunapa contranmi willakatsï munanqä höra castigar ushakätsinäpä. 8 Tsaynö kaptinpis tsay nación runakuna jutsa rurayta kacharir allitana rurayaptinqa castiganäpa kaykarpis mananami castigänatsu.
9 “Wakin nacionkunatami noqaqa yanapa mas munayyuq kayänanpä. Yanapanäpä willakatsiptïpis 10 tsay nacioncho taq runakuna ninqäta mana wiyakuypa jutsata rurayaptinqa yanapanäpä kaykarpis castigämi”.
11 “Jeremías, Judá runakunata y Jerusaléncho taq runakunata willar niy: ‘Tayta Diosmi nin: Qamkunata castiganäpämi kamarikuykä. Manarä castiganqäyaq jutsaykikunata jaqirir allillatana rurayay’.
12 “Tsaynö willakuptikimi paykuna niyäshunki: ‘¡Manakaqllapämi parlapaykäyämanki! Noqakunaqa munayanqänömi kawakuyäshä. Shonqükuna yarpanqannömi mana allitapis rurakuyäshä’ ”.
Kuyanqan runakuna mana yärakuypä kayanqan
13 Tsaymi Tayta Dios nin:
“¡Israel runakunaqa mantsariypämi mana allita rurayan!
Juklä nacionkunacho mä tapukuyay.
Manami mayqan nacionllachöpis kay runakuna mana allita rurayanqannöqa rurayashqatsu.
14 Líbano jirkakunapita rashta ¿imayllaqa illakantsurä?
Tsay jirkapita urämuq yaku ¿imayllaqa tsakintsurä?
Tsaykuna yärakuypä kayaptinpis kuyanqä runakunaqa manami yärakuypätsu.
15 Paykunaqa qonqaykayämarmi mana väliq ïdulukunapä inciensiutapis qoshnitsiyan.
Noqa ninqänö kawayänanpa trokinmi nänipa purirpis pantakashqanö llutankunata ruraykäyan.
16 “Tsaynö kayanqanpitami paykunata pasaypa castigashä.
Nacionninpis tsunyaq rikakuptinmi imaypis runakuna mantsakäyanqa.
Llapan tsaypa päsaqkunaqa mantsakashqami umankunata awiyanqa.
17 Shukukuy wayra shamuqnömi Israel runakunata mashtakätsishä.
Contrankuna ushayänanpämi kachariykushä.
Tsay junaqqa paykunapita witikuskishämi”.
Jeremíaspa contran willanakuyanqan
18 Tsaynö nir willakuptïmi chikimaqnïkuna kikinpura niyarqan: “Mandamientukunata yachatsimänantsikpäqa sacerdötikuna kaykäyanmi. Imata yätsimänantsikpäpis tantiyaqkuna kaykäyanmi. Tayta Diospa willakuyninta willamänantsikpäpis profëtakuna kaykäyanmi. Jeremíastaqa manami ministintsiktsu. Payta wanutsiyänanpä imatapis llutalla tumpashun. Pay ninqantaqa ama cäsushuntsu”.
19 ¡Tayta Dios, yanapaykallämay!
¡Tumpayämänanpä conträkuna willanakuyanqanpita castigaykullay!
20 Paykunapäqa imaypis allillatami rurashqä.
Paykunawan rabyanashqa kaptikipis paykunapämi qamta rugakushqä.
Kananqa llutanta ruraptïnöpis conträmi shäriyashqa.
21 Tsaynö kayanqanpita wakin wamrankuna guërracho wanuyätsun y wakinna mallaqaypita wanuyätsun.
Warminkunapis viüdayashqa y wamraynaq quëdayätsun.
Ollqu kaqkunapis qeshyawan wanuyätsun.
Chölukunapis guërracho wanuyätsun.
22 Asaltantikuna illaqpita yaykuyaptin wayinkunachöpis qayaräyanqan wiyakätsun.
Conträ shärir trampata churapämaqnö kayanqanpita paykunatapis trampata churapaykullay.
23 Tayta Dios, qamqa musyaykankimi wanutsiyämänanpä willanakuyanqanta.
Mana alli ruraq kayanqanpita ama perdonaytsu ni jutsata rurayanqantapis ama qonqaytsu.
Pasaypa rabyanarnin jutsankunaman tupu paykunata castigaykullay.