Judá runakuna ïdulukunata adorayanqan
17
Tayta Diosmi nin:“Judá runakuna, jutsa rurayqa rumiman llaqllaypa qellqashqanömi shonquykikunacho kaykan.
Tsaynöllami adorayanqayki altarkunapa waqrankunaman llaqllaypa qellqashqanö kaykan.
Fiërrupita rurashqa diamanti puntayuq cincelwan llaqllashqanömi kaykan.a
2 Pirqayanqayki altarkunachömi tsurikikunapis ïdulukunata adoraykäyan.
Asera diösata adorayänaykipä jawiyanqayki raku qerukuna kaqchömi mana qonqaypa adoraykäyan.
Tsay qerukunaqa kaykäyan llimllasapa jachakuna chakincho, altunnin jirkankunacho 3 y maytsay jirkakunachömi.
Entëru nacionnikikunachömi ïdulukunata adoraykäyanki.
Tsaymi llapan imaykaykikunatapis contraykikuna suwapäyäshunaykipä kachapaykushä.
4 Lunyaypa lunyar imaypis rupaykaq ninanö rabyanaynï kaptinmi herencia qoykunqä nacionpitapis qarquyäshayki.
Tsaynöpami mana reqiyanqayki nacioncho contraykikunapa wätaynin kayanki”.
Tayta Diosman yärakuqkuna y mana yärakuqkuna imanö kayanqan
5 Tayta Diosmi nin:
“Maldicionashqami kanqa noqaman yärakamänanpa trokin runa mayillanman y kikinpa kallpallanman yärakuqkuna.
6 Tsay runakunaqa pipis mana tanqan tsunyaq jirkacho wiñaq shirakanömi kaykäyan.
Tsaynöpis rumikuna chawpincho wiñaq jachanömi kaykäyan.
Alli kawayta imaypis manami tariyanqatsu.
7 “Noqaman yärakamuqkunami itsanqa kushishqa kawayan.
8 Tsay runakunaqa yaku kuchuncho plantaraykaq jachanömi kaykäyan.
Tsay jachapa michinkunab yakuman yaykushqa kaptinmi usyachöpis raprankuna verdiraykäyan†.
Usya kaptinpis qarwashtaykänanpa trokinqa imaypis wayuykanmi.
9 “Runapa shonqunqa mana yärakuypä mana allimi.
¿Pirä musyanman shonquncho imata yarpaykanqantapis?
10 Noqa Tayta Diosllami musyä shonquncho runa allita o mana allita yarpanqantapis.†
Tsaymi imanöpis kawanqanman tupu pitapis yanapa o castigä.†
11 Sakyapakuypa imaykayuq tikraq runaqa jukpa runtunta tsakwa oqllaqnömi kaykan.
Mana yarpashqatami llapan imaykankunata oqrar imaynaq rikakunqa”.
Tayta Diosman Jeremías yärakunqan
12 Tayta Dios, qallaykunanpita patsapis kuyayllapä templuykipitami llapantapis mandaykämunki.
13 Qamqa Israel runakunata kuyaq Tayta Diosmi kanki.
Mana tsakiq pukyunö kaykaptikimi wakin runakuna qampita witikuyashqa.
Paykunaqa pasaypa penqakushqami kayanqa.
Allpacho qellqanqan juti wayrawan illakanqannömi paykunapis illakäyanqa.
14 Tayta Dios, alli kawanäpä yanapaykallämay.
Imayka mana allipitapis salvaykallämay.
Noqaqa qamllatami imaypis alabä.
15 Runakunaqa asipämarmi niyäman:
“¿Imaytä Tayta Dios willakatsishunqayki cumplinqa?
¡Juklla cumplitsun!”
16 Noqaqa manami imaypis qamta mañakamurqätsu paykunata castiganaykipä ni paykunaman desgraciata kachamunaykipäpis.
Musyankimi imata willakunqantapis.
Wiyaykämaptikimi llapantapis nishqä.
17 Ima desgracia shamuptinpis qamllamanmi amparakaykämü.
Ama kachaykamaytsu.
Kacharimaptikiqa pasaypami mantsarishä.
18 Penqakuyman churamänaykipa trokinqa qatikachämaqkunata penqakuyman churaykullay.
Noqata castigamänaykipa trokinqa paykunata castigaykullay.
Paykunaman ima desgraciapis chaykullätsun.
Jamay junaqta respitayänanpä Tayta Dios ninqan
19 Tayta Diosmi nimarqan: “Marka yaykuna mas jatusaq punkuman aywaykur willakuynïta tsaycho willakuy. Tsay punkupami reykunapis yaykuyan y yarquyan. Tsaycho willakunqaykinölla Jerusalénman yaykuna wakin punkukunachöpis willakuy.
20 “Willakur ninki: ‘Judá nacionpa mandaqnin reykuna, Judá runakuna y Jerusaléncho taq runakuna, Tayta Dios ninqanta llapayki wiyakuyay. 21 Tayta Diosmi nin: Imapis mana päsayäshunaykipä jamay junaqchöqa ima qepitapis apayaytsu ni Jerusalén punkukunapapis ima cargatapis yaykatsiyaytsu.† 22 Jamay junaqchöqa wayikikunapitapis ima qepitapis ama jipiyaytsu. Tsay junaqchöqa ima aruytapis ama aruyaytsu. Tsaypa trokinqa unay castaykikunata ninqänö noqata respitayämar jamapäyay.† 23 Unay castaykikunaqa tsaynö nishqa kaptïpis manami wiyakayämashqatsu ni cäsukayämashqatsu. Tsaypa trokinqa shonqunkunata chukruyätsirmi mana cäsukayämar corriginätapis munayashqatsu.
24 “ ‘Qamkunaqa ninqäta wiyakuyarnin jamay junaqcho markaman yaykuna mayqan punkupapis cargata ama yaykatsiyämuytsu. Jamay junaq aruyänaykipa trokin noqata respitamar jamayaptikiqa 25 kay nacionpita y kay markapita manami imaypis qarqushaykitsu. Tsaynöllami rey David jamaranqan trönunpita rey imaypis mandakunqa. Reykunami y autoridäkunami carrëtankunawan y cawallunkunawan kay markapa punkunkunapa imaypis päsayanqa. Paykunawanmi Judá runakuna y Jerusalén runakunapis kay punkukunapa yaykuyanqa. Jerusalénchömi imayyaqpis runakuna täyanqa.
26 “ ‘Tsaynöllami adorayämänanpä Jerusalénman shayämunqa Judá nacioncho kaykaq markakunapita, Jerusalénpa ñöpankunapita, Benjamín partipita, Sefelapita, jallqakunapita y Neguevpitapis. Tsaynö shamurmi templuman apayämunqa rupatsina sacrificiukunata, tsaki mikuy ofrendakunata, inciensiuta, agradëcikayämänanpä kaq sacrificiukunata y wakin sacrificiukunatapis.
27 “ ‘Ninqäta mana wiyakur jamay junaq mana jamayaptiki y Jerusalén markapa punkunkunapa tsay junaqcho ima qepitapis yaykatsiyaptikiqa Jerusalénpa punkunkunatami rupatsir ushashä. Tsaymi Jerusaléncho kaykaq palaciukunapis rupar ushakanqa. Tsaytaqa manami pipis upitsinqatsu’ ”.