Rugakuyaptinpis mana perdonananpä kanqanta Tayta Dios ninqan
15
Tsaynö mañakuptïmi Tayta Dios nimarqan: “Moiséswan† Samuel† shamur Judá runakunata perdonanäpä rugakayämaptinpis manami perdonashänatsu. Judá runakunata perdonanäpäqa voluntänïpis manami kannatsu. Paykunataqa manami rikaytapis munänatsu.2 “ ‘Tsaynö kaptinqa ¿imatä noqakunata päsayämanqa?’ nir tapuyäshuptiki ninki:
“ ‘Qeshyawan wanuqpä kaqkunaqa qeshyawan wanuyätsun.
Guërracho wanuqpä kaqkunaqa guërracho wanuyätsun.
Mallaqaywan wanuqpä kaqkunaqa mallaqaywan wanuyätsun.
Prësu aywaqpä kaqkunaqa prësu aywayätsun.†
3 “ ‘Noqa Tayta Diosmi nï: Kay runakunataqa chuskuläya castïguwanmi castigashä. Tsay castïgukunami kayanqa guërracho wanuyanqan, allqukuna ayakunata qechunakur mikuyanqan, wiskurkuna rachir mikuyanqan y jirka uywakuna mikur ushayanqan. 4 Tsaynö castiganqäta musyarmi maytsay nacioncho taq runakuna pasaypa mantsakäyanqa. Tsaytaqa rurashä Ezequíaspa tsurin Manasés† rey kaykar Jerusaléncho jutsata ruranqanpitami.
Jerusalén runakunata castigar ushakätsinanpä Tayta Dios ninqan
5 “ ‘Jerusalén runakuna, qamkunata castigaptï ¿pirä kuyapäyäshunki?
¿Pirä llakipäyäshunki?
Imanö kayanqaykitapis musyayta munar ¿pirä tapukunqa?
6 Noqata jaqiriyämanqaykipitami ushakätsiyäshayki.
Kutin kutin kuyapaykaytapis ajayashqänami.
Noqa Tayta Diosmi tsaynö nï.
7 “ ‘Trïgu päjata wayra apananpä jurquitawan jitaqnömi qamkunataqa markaykikunapita wakpa kaypa jitariyäshayki.
Wamraykikunata ushakätsiptï täyanqayki markakunapis tsunyaqmi rikakunqa.
Tsaynö ushakätsiyäshayki jutsa rurayta mana kachariyanqaykipitami.
8 Viüdakunapis lamar kuchuncho aqushapitapis mas atskaqmi kayanqa.
Pullan junaq kaykaptinmi chölukunatapis mamantinta ushakätsishä.
Illaqpitami pasaypa mantsakayman churashä.
9 “ ‘Qanchis ollqu wamrayuq warmikunapis wawankunata wanutsiyaptinmi pasaypa llakikuyanqa.
Kallpankuna ushakaptinmi ima ruraytapis mana kamäpakur pasaypa penqakuyanqa.
Kawaykar quëdaq kaqkunataqa contrankunami espädawan wanutsiyanqa.
Noqa Tayta Diosmi tsaynö nï’ ”.
Runakuna chikiyaptin Tayta Diosta Jeremías mañakunqan
10 ¡Ay, imapärä mamäpis wachaykamarqan!
Pïmaywan rimanakullarmi qoyäpis.
Qellayta mana mañaptïpis ni mana mañakuptïpis maldicionayämanmi.
11 Tayta Dios, qamta allimi sirvishqä.
Chikimaqnïkuna llakikuyaptinpis y ñakayaptinpis yanapanaykipämi rugakamushqä.
Tsaynö mana mañakushqa kaptïqa maldicionayämanqan jina chämätsun.
12 Paykunatami nishqayki:
“Norti kaqlächo kaykaq fiërrutawan broncita ¿pillaqa pakinmantsurä?a
13 Jutsata rurayanqaykipitami entëru nacionnikikunacho riquëzaykikunata contraykikunapa makinman churaykushä.
Imatapis mana cobrayllapami llapanta entregaykushä.
14 Imaypis mana reqiyanqayki nacionchömi contraykikunapa wätaynin kayanki.
Qamkunaqa pasaypami ajanätsiyämashqayki.
Imatapis tsarinqan kaqtaqa nina lunyar ushaqnömi qamkunatapis mana kuyapaypa castigayäshayki”.
15 Tayta Dios, qamqa musyankimi runakuna chikiyämanqanta.
Paykuna chikiyämaptinpis yanapaykallämay.
Mana wanutsiyämänanpä salvaykallämay.
Chikimaqnïkunataqa kikinkunatapis chikiyätsun.
Paykunataqa ama kuyapaytsu.
Imaykata niyämaptinpis qam raykuqmi wiyaräkü.
16 Llapanta mandaq Tayta Dios, noqaqa makikichömi kaykä.
Parlapämaptikimi alli mikuyta mikuqnö llapanta chaskikushqä.
Nimanqaykikunata chaskikuptïmi shonqü pasaypa kushikun.
17 Runakuna qorikar kushikuyaptinpis paykunawan manami qorikätsu.
Willakunäpä akramanqaykipitami runakunawan qorikänäpa trokin jukläman jamakü.
Jutsata rurayaptin rabyanashqa kanqaykinömi noqapis jutsata rurayaptin rabyanashqa kaykä.
Tsaynö rabyakuytaqa qammi shonqüman churamushqayki.
18 ¿Imanirtä imaypis llakishqalla kaykä?
¿Imanirtä imaypis kushikütsu?
¿Imanirtä illaqpita tsakiq pözunö rikakushqayki?
Jeremíasta yanapananpä Tayta Dios ninqan
19 Tsaynö nir llakikuptïmi Tayta Dios nimarqan:
“Noqaman kutimuptikiqa yapay sirvimänaykipämi churashayki.
Manakaqkunata parlanaykipa trokin shumaq tantiyakur parlaptikiqa willakuynïta willakunaykipäpis yapaymi churashayki.
Mana cäsukamaq runakuna parlayanqannöqa ama parlaytsu, tsaypa trokinqa paykuna rikayäshunaykipä shumaq parlay.
20 “Noqami churashayki broncipita rurashqa murällanö kanaykipä.
Upällakunaykipä niyäshuptikipis willakuynïta imaypis willakunaykipämi yanapashayki.
Qamwan imaypis kaykarmi imapis mana päsashunaykipä tsapäshayki.†
Noqa Tayta Diosmi tsaynö nï.
21 Noqami mana alli runakunapa makinpita tsapäshayki.
Wanutsikuqkunapa makinpitapis salvashaykimi”.