Pasaypa usya kanqan
14
Pasaypa usya kaptinmi Jeremíasta Tayta Dios nirqan:2 “Wanupakushqami Judá nación kaykan.
Markakunacho taqkunapis pasaypa llakikurmi patsacho jamaraykäyan.
Jerusaléncho waqayanqanpis maytsaymanmi wiyakaykan.†
3 Imaykayuqkuna wätayninkunata pözukunaman yaku ashiq kachaptin manami tariyämuntsu.
Mana tarirmi jäkuq uyllun janchashqa kutiyämun.
Pasaypa penqakurmi umankunatapis tsapakurkuyan.
4 Mana tamyaptinmi pasaypa usyawan patsapis rachishqarä kaykan.
Murukuyänanpä mana alli kaptinmi runakunapis pasaypa llakikur umankunatapis tsarikuyan.
5 Usyawan qewa mana kaptinmi lluytsukunapis wachaskillar wawanta jaqiskiyan.
6 Chucaru ashnukunapis tsunyaq jirkakunaman witsarkurmi chacalkunanö jäkalyaykäyan.
Mikuyänanpä qewa mana kaptinmi ñawinkunapis toqukashqana kaykäyan”.
7 Tsaymi runakuna niyan: “Tayta Dios, ninqaykita manami cäsukuyashqätsu.
Jutsata rurarmi pasaypa ajanätsiyashqä.
Alläpa jutsata rurashqa kayaptïpis kuyapäkuq kanqaykita pïmaypis tantiyakuyänanpä yanapaykayällämay.
8 Qamllamanmi yärakayämü.
Pasaypa ñakayaptïpis qamllami salvayämanki.
Tsaynö kaykarqa ¿imanirtä kay nacioncho jäpanö kaykanki?
¿Imanirtä qorpanöllana kaykanki?
9 Salvayämänaykipa trokinqa ¿imanirtä mantsakashqanö rikaräyämanki?
¿Imanirtä pitapis washayta mana puëdiq soldädunö kaykanki?
Imanö kaptinpis noqakunawanmi kaykanki.
Pïmaypis musyanmi kuyanqayki runakuna kayanqäta.
¡Ama jaqirayämaytsu!”
10 Tayta Diosmi nirqan:
“Kay nación runakunaqa ïdulukunata adorarmi yachakashqa kayan.
Tsaynö kayanqan mana gustamaptinmi jutsata rurayanqanpita mana kuyapaypa castigashä”.
Jeremíasta Tayta Dios ninqan
11 Tsaypitanami Tayta Dios nimarqan: “Kay runakunata yanapanäpä amana rugakamaytsu. 12 Paykuna ayunar mayjina mañakayämaptinpis manami cäsushätsu. Atska uywakunata y tsaki mikuy ofrendakunata noqapä apayämuptinpis manami chaskishätsu. Tsaypa trokinqa ushakätsinäpämi guërrata, muchuyta y qeshyata kachamushä”.
13 Tsaynö nimaptinmi nirqä: “Tayta Dios, llullakuq profëtakunami runakunata criyiykätsiyan guërrapis ni muchuypis mana kananpä kanqanta. Kay nacioncho añaw kawayänanpä kanqantami nikäyan”.
14 Tsaymi Tayta Dios nimarqan: “Noqapa jutïcho willakurpis tsay profëtakunaqa llullakuykäyanmi. Tsay runakunataqa manami kachashqätsu ni minkakushqätsu ni parlapashqätsu. Yarpayllankunapitami llullakurnin manakaqkunata willakuyan.
15 “Noqa Tayta Diosmi nï: Mana kachaykaptï jutïcho willakuyanqanpita y kay nacioncho guërrapis ni muchuypis mana kananpä kanqanta willakuyanqanpitami tsay profëtakunata guërrawan y muchuywan ushakätsishä. 16 Tsaynöllami tsay profëtakuna llullapäyanqan runakunatapis guërrawan y muchuywan ushakätsishä. Warminkunapis y tsurinkunapis llapanmi wanur ushakäyanqa. Pampananpä pipis mana kaptinmi Jerusalén cällikunacho ayankuna jitaräyanqa. Jutsata rurayanqanpitami tsaynö castigashä.
17 “Jeremías, ninqäta runakunata willar niy:
“ ‘Kuyanqä Jerusalén markaman mantsariypä desgracia chanqanpitami mana päraypa paqaspis junaqpis waqaykä.a
Tsay markami malograkushqanö kar pasaypa ñakaykan.
18 Jirkakunapa purirpis guërracho wanutsiyanqan runakunapa ayankuna jitaraykaqtami rikaykä.
Markaman yaykurpis mallaqaywan wanushqatami tarï.
Imanir tsaynö kanqantapis mana tantiyarmi profëtakunapis sacerdötikunapis upatakashqa puriykäyan’ ”.
Tayta Diosta Jeremías rugakunqan
19 Tayta Dios, ¿Judá nacionta mananaku rikaytapis munanki?
¿Pasaypaku Sión jirkanta chikiykunki?
¿Imanirtä pasaypa desgraciaman jitarpayämashqayki?
Alli kawayta munayaptïpis manami alli kaway kannatsu.
Yanapayämänaykipä kanqanta yarpäyaptïpis jinallami desgracia tsariykäyäman.
20 Tayta Dios, contraykimi rikakuyashqä.
Unay castäkuna ajanätsiyäshunqaykinöllami noqakunapis pasaypa ajanätsiyashqä.
21 Tsaynö kaptinpis ama kachariyällämaytsu.
Kachariyämaptikiqa manakaqmanmi runakunapis churayäshunkiman.
Tsaynöpis trönuyki kananpä akranqayki markata manakaqman ama churaytsu.
Yanapayämänaykipä pactu ruranqaykita ama qonqaykullaytsu.
22 Kay patsacho ima ïdulupapis munaynin manami kantsu tamyatsimunanpä.
Tayta Dios, ciëlupis manami kikillanpitaqa tamyatsimuntsu, sinöqa qamrämi tamyatsimunki.
Llapan päsanqankunapis qampitami kaykan.
Tsaymi salvayämänaykipä qamllaman yärakayämü.