Ismushqa wachukunö Judá runakuna kayanqan
13
Tayta Diosmi nimarqan: “Lïnupita awashqa wachukuta rantiskir wachakäkuy. Itsanqa ama ushmatsinkitsu”.2 Tayta Dios nimanqannömi rantiskir wachukuta wachakäkurqä.
3 Nirkurnami Tayta Dios yapay nimarqan: 4 “Wachakaraykanqayki wachukuta apakurkur Perat raqraman ayway.a Tsaychöna qaqapa uchkunman pakaykamuy”.
5 Tayta Dios nimanqannöllami Perat raqraman aywar pakaykamurqä.
6 Tsaypita unayllatanami Tayta Dios nimarqan: “Perat raqraman kutir tsay pakatsinqä wachukuta apamuy”.
7 Tsaymi Perat raqraman kutir pakanqä wachukuta tarirqä pasaypa ismushqata y imapäpis mana väliqta.
8 Tsaymi Tayta Dios nimarqan: 9 “Noqa Tayta Diosmi nï: Kay wachuku ismushqa kanqannömi Judá nación runakunapa y Jerusalén runakunapa runa tukuyninpis ushakanqa. 10 Tsay runakunaqa llutan ruraq karmi cäsukamayta munayantsu. Paykunaqa shonqunkuna munanqannölla kawarmi juklä runakuna adorayanqan dioskunata sirvir adorayan. Tsaynö karmi ismushqa wachuku imapäpis mana välinqannö kaykäyan.
11 “Tseqllancho wachukuta chachak wachakaranqannömi noqapis Israel runakunatawan Judá runakunata tsararashqä. Tsaynö tsararashqä munanqänö kawayaptin pïmaypis alabayämänanpämi. Tsaynö kaptinpis paykunaqa manami cäsukayämashqatsu. Noqa Tayta Diosmi tsaynö nï”.
Uyllukunaman tinkutsiypa tantiyatsinqan
12 “Jeremías, kuyanqä runakunata ninki: ‘Israel runakunata kuyaq Tayta Diosmi nin: “Llapan uyllukunaman juntaqpämi vïnu wiñakanqa”. Niptikimi paykuna niyäshunki: “¿Pitä musyantsu uylluman juntaqpä vïnu wiñana kanqanta?” ’
13 “Tsaynö niyäshuptiki ninki: ‘Tayta Diosmi nin: Qamkunatami vïnuwan machätsiyäshayki.b David jamaranqan trönucho jamaraq reyta, sacerdötikunata, profëtakunata y Jerusaléncho taq runakunatapis llapaykikunatami machätsiyäshayki. 14 Uylluta takanakatsir pakiqnömi qamkunata castigar ushakätsiyäshayki. Taytaykikunatawan tsurikikunatami llapaykikunata mana perdonaypa ni mana kuyapaypa ushakätsiyäshayki. Noqa Tayta Diosmi tsaynö nï’ ”.
Jutsankunata kachariyänanpä ninqan
15 ¡Shumaq wiyakuyay!
Kikin Tayta Dios parlapaykäyäshuptikiqa ¡mana chölu tukuypa wiyayay!
16 Desgracia manarä chämunqanyaq Tayta Diosta cäsukuyay.
Tsakaycho jirkakunapa qeshpir manarä llutskayanqaykiyaq jutsaykikunata kachariyay.
Salvayäshunaykita yarpäyaptikipis jutsaykikunata mana kachariyaptikiqa manami salvayäshunkitsu.
17 Mana wiyakuyaptikiqa pakayllapami qamkunapä waqashä.
Tayta Dios kuyanqan runakuna kayaptikipis prësu apakuyäshuptikimi llakikurnï pasaypa waqashä.
18 Tayta Diosmi nimarqan:
“Reyta y maman reinata niy:
Contraykikuna shamur corönaykita umaykipita jipiyänanpänami kaykäyan.
Tsaynö kaptinqa jutsaykikunata kacharir patsaman jamaykur perdonanäpä mañakayämay.
19 Jutsaykikunata mana kachariyaptikiqa Neguevcho kaykaq markakunatami contrayki soldädukuna tumaparäyanqa.
Markapita manami pipis yarqunqatsu ni yaykunqatsu.
Judá runakunataqa llapantami prësu apakuyanqa.
20 Shumaq rikachakuyay.
Norti kaqläpitami contraykikuna aywaykäyämun.
¿Maytä Tayta Dios qarashunqayki kuyayllapä üshaykikuna?”c
21 Jerusalén runakuna, ¿imanörä kayanki amïguykikuna contrayki rikakur atacayäshuptiki?
¿Imanörä kayanki tsay atacayäshuqnikikunata mandashuqniki kayänanpä Tayta Dios churaptin?
¿Manatsurä qeshyaq warmita nanay tsariptin ñakaqnö qamkunapis ñakayanki?
22 Tsay contraykikuna vinciyäshurnikimi warmita qarir fuerzaqnöpis munayanqanta rurayäshunki.
Imanir tsaynö päsayäshunqaykitapis yarpachakurqa tantiyayankimanmi alläpa jutsata rurayanqaykipita ñakayanqaykita.
23 Yana runa ¿yuraqman tikranmantsurä?
Tigripis muru kanqanpita ¿juk colorman tikranmantsurä?
Tsaynöllami qamkunapis mana alli ruraykunallata rurar allitaqa rurayankitsu.
24 “Tsaynö kayanqaykipitami qamkunataqa tsunyaq jirkapita shamuq wayra oqshata matsiqnö mashtayäshayki.†
25 Noqata qonqaykamar ïdulukunaman yärakuyanqaykipitami tsaynö ñakayänaykipä destinashqä.
Noqa Tayta Diosmi tsaynö nï.
26 “Mañösa warmita castigar llullipanwan umanta tsapaskapuptin penqakunqannömi qamkunapis castigaptï penqakuyanki.
27 Rikashqämi mañösa warmi runakunaman aywaqnö juk dioskunata adoraq aywayanqaykita.
Jirkankunachöpis chakrakunachöpis tsaynö adorayanqaykita rikashqämi.
Tsaynö rurayanqaykiqa pasaypa penqakuypämi kaykan.
¡Ay Jerusalén runakuna, imanörä kayanki!
¿Imayllaqa jutsa ruraypita limpiutsurä kayanki?
¿Imayyaqpis jutsata rurar tsaynö qanrallatsurä kaykäyanki?”