Tayta Diosta Jeremías tapukunqan
12
Tayta Dios, musyämi jutsaynaq kanqaykita y llapantapis munanqaykinö kamakätsinqaykita. Kanan tapukushayki: ¿Imanirtä mana alli runakuna imaykayuq kayan? ¿Imanirtä mana cäsukushuqnikikuna kushishqa kawayan?†2 Shumaq plantashqa y michïkushqa jachanö kayänanpämi paykunata yanapashqayki.
Pasaypa imaykayuq kayänanpä y atskaqman mirayänanpämi yanapashqayki.
Tsaynö yanapaptikipis shimillanmi alabayäshunki.
Shonqunchöqa manami imapäpis cuentayäshunkitsu.
3 Qamqa musyankimi imanö kawanqätapis.
Ñakaykunawan pruebamarmi musyanki qamllaman yärakamunqäta.
¡Tsay runakunaqa pishtashqa kayänanpä kaq üshakunanö kayätsun!
¡Wanutsishqa kayänanpä juklla destinay!
4 Tsay runakuna yarpäyan imata rurayanqantapis mana rikanqaykitami.
Tsaynö yarpäyaptinpis jutsa rurayanqanpitami allpapis jachakunapis tsakishqa kaykäyan.
Uywakunapis pishqukunapis wanuykäyan.
¡Imayyaqrä tsaynö kanqa!
5 Tsaynö niptïmi Tayta Dios nimarqan:
“Chakipa cörriqkunawan llallinakurpis pasaypa pishiparqa ¿imanörä cawallun muntashqa runawan llallinakunkiman?
Lliwyaq pampakunacho mantsa mantsa purirqa ¿imanörä kanki Jordán mayu kuchun muntichöqa?a
6 Wawqikikunawan castaykikunami chikiyäshunki.
Rabyanashqami wasaykitapis rimaykäyan.
Alli shimillanpa parlapäyäshuptikipis paykunamanqa ama yärakuytsu”.
Vecïnun nacionkuna Judá nacionta ushakätsiyänanpä Tayta Dios ninqan
7 “Wayïtami kachaykushqä.
Herenciäpitami witikushqä.b
Kuyanqä runakunatami contrankunapa munayninman kachapaykushqä.
8 Munticho qayaraykaq leonnömi conträ rikakuyashqa.
Tsaynö kayaptinmi rikaytapis munänatsu.
9 “Kuyanqä runakunaqa kuyayllapä imayka color pishqukunanömi kaykäyan.
Paykunatami contran nación runakuna ankanö tumapaykäyan.
¡Tsay contran nacionkuna qorikaskir shayämutsun!
¡Jirka uywakunanö herenciäta ushayätsun!
10 “Mitsikuqkuna uywankunawan däñukur üvata ushatsiqnömi reykunapis juknin juknin shamur üva chakrätac ushakätsiyanqa.
Tsunyaq rikakurmi pasaypa kuyapaypä kanqa.
11 Entëru nacionta ushakätsirmi pasaypa tsunyaykaqta jaqiykuyanqa.
Quëdaq runakunataqa manami pipis kuyapanqatsu.
12 “Tsaynö ushakätsiyänanpämi tsunyaq jirkakunapita mana alli runakunata pushamushä.
Qati qatiykur llapanta ushayaptinmi pïmaypis ñakayanqa.
13 Tsay witsanmi kuyanqä runakunapa trïgu chakrankunapis purunyaptin kashallana wiñanqa.
Tsayläya aruyanqanpis manakaqllapämi kanqa.
Pasaypa rabyanar tsaynö castigaptïmi penqakushqa kayanqa”.
Judá nacionpa ñöpankunacho kaq nacionkunapä Tayta Dios parlanqan
14 Israel runakunapa ñöpan nación runakunatami Tayta Dios nin: “Kuyanqä Israel runakunata qaranqä nacionta ushakätsiyanqaykipitami nacionnikikunapita qarquyäshayki. Makikikunapitami Judá runakunata jipimushä.
15 “Qamkunata qarqurpis yapay kuyaparmi nacionnikikunaman y chakraykikunaman kutitsiyämushayki. 16 Itsanqa yachatsikuynïta shumaq yachakuyay. Kuyanqä runakunata Baalta adorayänanpä ñöpata yachatsiyanqaykinö kananqa yachakuyay noqata adoramar niyänaykipä: ‘Tayta Diosmi rasunpaypa kaq Diosqa’ nir. Tsaynöpami qamkunapis kuyanqä runakuna kayanki. 17 Mana cäsukayämaptikimi itsanqa llapaykita qarqur ushakätsiyäshayki. Noqa Tayta Diosmi tsaynö nï”.