Salomónta rey David yätsinqan
2
Wanukunanpäna kanqanta tantiyarmi tsurin Salomónta rey David yätsir nirqan: 2 “Llapan runakunanöllami noqapis atsikyay patsata jaqirinäpäna kaykä. Wanukuptïpis mana mantsariypa shumaq mandanki. 3 Tayta Dios mandanqankunata cumplir pay munanqannö imaypis kawanki. Moisés qellqanqan leykunacho ninqannölla estatütunkunata, mandamientunkunata, ninqankunata y ordenanqankunata llapanta cumplinki. Tsaynö cumpliptikiqa llapan ruranqaykichöpis y maypa aywaptikipis yanapashurnikimi 4 llapan awnimanqankunata Tayta Dios cumplinqa. Awnimarmi nimarqan: ‘Qampita aywaraqkuna ninqäkunata cäsukamar llapan yarpayninkunawan y llapan shonqunkunawan munanqänö kawarqa imaypis Israel runakunapa mandaqnin reymi kayanqa’ ”.†5 Mastami Salomónta rey David nirqan: “Qamqa musyankimi Nerpa tsurin capitán Abnerta† y Jeterpa tsurin capitán Amasata† Sarviapa wawan Joab wanutsiptin wachukunman y llanqinman yawarnin pillchinqanta. Imayka guërrachönö yawarninta jichar wanutsinqanpitami noqata tumpayäman. 6 Kanan shumaq yarpachakuy imata ruranaykipäpis. Joabtaqa awkinyanqanyaq añaw kawananta ama kachankitsu.
7 “Galaad partipita Barzilaipa† tsurinkunata kuyapar pachanta qaraykunki. Paykunami mikuyta qarayämarqan wawqiki Absalónpita qeshpiptï.
8 “Tsaynöpis Bahurim markapita Benjamín trïbu runa Gerapa tsurin Simeita imanö ushakätsinaykipäpis yarpachakuy. Paymi Mahanaimman qeshpinqä junaq pasaypa manakaqman churamarnin imaykata qayapämarqan.† Tsaynö kaptinpis kutimuptï Jordán mayuman chaskimaq tinkupämaptinmi Tayta Diospa jutincho awnirqä mana wanutsinäpä. 9 Qamqa payta ama perdonaytsu. Tantiyakuq runa kaykarqa shumaq yarpachakunki imanöpapis wanutsinaykipä”.
Rey David wanunqan
10 David wanuskiptinnami Davidpa Markan niyanqanman pampayarqan.a 11 Puntataqa Hebrón markachömi qanchis wata rey karqan. Tsaypitanami Jerusalénchöpis kimsa chunka kimsa (33) wata rey karqan. Tsaymi Israel runakunapa mandaqnin rey karqan chusku chunka (40) wata.† 12 Tsaypitaqa Salomónnami taytanpa trokin rey karqan.† Salomón rey kanqan witsan llapan runakunapis allimi kawayarqan.
Rey Adonías wanunqan
13 Juk junaqmi Haguitpa wawan Adonías Salomónpa maman Betsabéta watukaq aywarqan. Chaykuptinmi Betsabé nirqan: “¿Alli yarpaynikiwanku shamushqayki?”
Tsaymi Adonías nirqan: “Awmi”.
14 Mastapis nirqan: “Rugakuqmi shamushqä, mamïta”.
Tsaymi Betsabé nirqan: “¿Imallarä rugakamänaykipä kaykan, ari?”
15 Tsaynö niptinmi Adonías nirqan: “Musyanqaykinöpis llapan Israel runakunami yarpäyarqan noqa rey kanäpä kanqanta. Tsaynö kaptinpis Tayta Dios munaptinmi wawqïta churashqa rey kananpä. 16 Kananqa mastapis rugakulläshayki, mamïta. Ama ñëgaykamaytsu”.
Niptinmi Betsabé nirqan: “Allimi kanman noqacho imallapis kaptinqa”.
17 Adoníasnami nirqan: “Rey Salomónta rugapaykallämay Sunam markapita Abisag jipashwan tätsimänanpä. Qamtaqa awnishunkimi”.
18 Tsaynö niptinmi Betsabé nirqan: “Allimi kanqa. Rey Salmónta rugakamushämi”.
19 Tsaypitanami rey Salomónman Betsabé aywarqan Adoníaspa janan parlananpä. Chaykuptinmi rey Salomónqa shärirkur mamanta respëtuwan chaskirqan. Nirkurnami trönunman yapay jamarqan. Maman jamananpä juk trönuta apatsimuptinmi derëchanman jamakurqan. 20 Tsaymi maman nirqan: “Hïju, qamta rugakuqmi shamushqä. Ama yaqa kaykullaytsu”.
Tsaynö niptinmi rey nirqan: “Mamay, imatapis rugakamanqaykitaqa awnishaykimi”.
21 Niptinmi maman nirqan: “Hïju, Sunam markapita Abisag jipashta wawqiki Adoníaswan tätsiy”.
22 Rey Salomónnami mamanta nirqan: “¿Imanirtä Abisagwan Adoníasta tätsinäta munanki? Payqa mayornïmi kaykan. Tsaynöpis sacerdöti Abiatar y Sarviapa wawan Joabmi paypa favornin kaykäyan. Tsaynö mañakamarqa Adonías rey kananpä mañakamaqnömi kaykanki”.
23 Tsaynö nirmi Tayta Diospa jutincho jurarnin rey Salomón nirqan: “Adonías tsaynö mañakushunqaykipita mana wanutsiptïqa Tayta Dios pasaypa castigamätsun. 24 Tayta Dios awnimanqannöllami rey kanäpä taytä Davidpa trönunman jamatsimashqa. Tsaynö kaptinmi Tayta Diospa jutincho noqa ordenä Adoníasta kanan wanutsiyänanpä”.
25 Tsaynö nirmi jinan höra Joiadapa tsurin Benaíata kacharqan Adoníasta wanutsinanpä. Tsaymi Benaíaqa aywar Adoníasta wanuskatsirqan.
26 Nirkurnami sacerdöti Abiatarta rey Salomón nirqan: “¡Sänu qarallaykiwan markayki Anatotman aywakuy! Qamtapis wanutsinäpä jutsayki tinkushqanami. Tsaynö kaptinpis manami wanutsishaykitsu taytä Davidpa ñöpanta Tayta Diospa babulninta apamushqa kaptiki. Tsaynöpis taytäwan iwalmi ñakar puriyashqayki”.†
27 Tsaynöpami Abiatarta Salomón qarqurqan Tayta Diosta sirviq sacerdöti kanqanpita. Tsaynö rurarmi cumplirqan Silucho Elípa castanpä Tayta Dios ninqanta.†
28 Tsaynö ruranqantami Joabtapis willayarqan. Tsaymi paypis mantsarirnin qeshpir Tayta Diospa toldunman amparakur tsaycho altarpa waqrankunata tsarikushqa ichiraykarqan. Tsaynö qeshpirqan Absalónpa janan mana shärirpis Adoníaspa janan shärishqa karmi. 29 Tsaycho kaykanqanta willayaptinmi rey Salomón Joiadapa tsurin Benaíata kacharqan Joabta tsaycho wanutsinanpä. 30 Tsaymi Tayta Diospa toldunman aywaykur Joabta Benaía nirqan: “Altarpita yarqamunaykipämi rey nishqa”.
Tsaynö niptinmi Joab nirqan: “¡Kaypitaqa manami imanöpapis yarqushätsu! ¡Kaychömi wanushäpis!”
Tsaynö niptinmi Benaía reyman kutiykur willarqan Joab tsaynö ninqanta.
31 Willaptinmi rey nirqan: “Tsaynö niptinqa patsallancho wanuskatsir jukläman apaykur pampay. Tsaynöpami ishkan capitankunata Joab wanutsinqanpita taytäpis noqapis jutsaynaqna kayäshä. 32 Tsaynö wanutsiptikiqa Tayta Diosmi payta juzganqa jutsaynaq capitankunata wanutsinqanpita. Payqa taytäta mana musyatsiyllapami Nerpa tsurin Abnerta y Jeterpa tsurin Amasata tuksiskirqan. Abnerqa karqan Israel soldädukunapa capitanninmi. Amasanami karqan Judá soldädukunapa capitannin. Ishkankunapis Joabpitaqa mas alli runami kayarqan. 33 Paykunata wanutsinqanpita Joab y paypita aywaraqkunapis maldicionashqa imayyaqpis kayätsun. Davidpita aywaraqkunataqa Tayta Dios yanapaykullätsun alli kawakur imayyaqpis alli mandayänanpä”.
34 Tsaynö niptinmi Benaíaqa aywaykur Joabta wanutsirqan. Nirkurnami estanciancho kaykaq wayinman apaykur Joabta pampayarqan. 35 Nirkurnami Joabpa trokin soldädukunapa capitannin kananpä Joiadapa tsurin Benaíata rey Salomón churarqan. Tsaynöpis Abiatarpa trokin sacerdöti kananpämi Sadocta churarqan.
36 Tsaypitanami Simeita qayaykatsir nirqan: “Jerusaléncho wayikita ruraykur maypapis mana yarquypa tsayllacho täkunki. 37 Markapita yarqur Cedrón raqrata päsaptikiqa wanutsishqami kanki. Tsaynö wanunaykipä kikikimi jutsayuq kanki”.
38 Niptinmi Simeiqa reyta nirqan: “Awmi, taytay. Nimanqaykitaqa llapantami cumplishä”.
Ninqannöllami Simeiqa Jerusaléncho täkurqan.
39 Tsaycho kimsa watana taykaptinmi ishkay wätayninkuna qeshpir Maacapa tsurin Aquis kaqman aywakuyarqan. Aquisqa Gat markapa mandaqnin reymi karqan. Qeshpiq wätayninkuna Gatcho kaykäyanqanta musyaskirmi Simeiqa 40 ashnunta karunakurkur Gat markaman wätayninkunata ashiq aywarqan. Tsaycho tariykurmi Jerusalénman kutitsimurqan.
41 Tsaypitami Salomónta willayarqan Gat markaman aywanqanpita Jerusalénman Simei kutimunqanta. 42 Tsaymi Simeita qayaykatsir Salomón nirqan: “¿Manaku qamta nirqä Jerusalénpita maypapis yarqurqa wanunaykipä kanqanta? Tsaynö niptï ¿manaku Tayta Diospa jutincho awnimarqayki maypapis mana yarqunaykipä kanqanta? 43 Tsaynö nikämarqa ¿imanirtä cumplishqaykitsu Tayta Diospa jutincho awnimanqaykita? Tsaynöpis noqa ninqäta ¿imanirtä cäsumashqaykitsu?”
44 Nirkurmi Simeita rey Salomón nirqan: “Qamqa taytä Davidpa contranmi shärirqayki. Tsaymi kananqa jutsaykipita wanunaykipä Tayta Dios kamakätsishqa. 45 Noqapämi itsanqa Tayta Dios kamakätsishqa bendicionninta chaskinäpä. Tsaynöpis Davidpita aywaraqkunatami Tayta Dios imaypis yanapanqa rey kar trönuncho jamaräyänanpä”.
46 Tsaypitanami Simeita wanutsinanpä Joiadapa tsurin Benaíata rey Salomón nirqan. Tsaynö niptinmi waqtapa yarquskirnin jinan höra wanutsirqan. Tsaynöpami rey Salomónqa contrankunapita librina karqan.