Templuta shäritsinanpä ofrendata churayanqan
29
Tsaypitanami tsaycho qoriraykaq Israel runakunata rey David nirqan: “Rey kananpä tsurï Salomónta Tayta Dios akrashqa kaptinpis payqa chölullarämi kaykan. Tsaynöpis shäritsinanpä kaq templuqa manami runapa wayintsu kanqa, sinöqa Tayta Diospa wayinmi. 2 Tsaymi sirvinqä Tayta Diospa templunta tsurï shäritsinanpä puëdinqäpita kamarishqä qorita, qellayta, broncita, fiërruta y qerukunata. Tsaynöllami ónice rumikunata, tukuyläya kuyayllapä rumikunata y tsaytsika marmolta kamarishqä.†3 “Tsaynöpis sirvinqä Tayta Diospa templunta imanöpapis ruratsiyta munarmi tsay jananmanpis kikïpa kaqta qorita y qellayta churashqä. 4 Churanqä qoriqa kaykan juk pachak waranqa (100,000) kïlu Ofirpita allinnin kaq qorimi. Churanqä yuraq qellayqa kaykan ishkay pachak kimsa chunka puwaq waranqa (230,000) kïlumi. Tsay qellayqa kanqa templu pirqata laqatsinanpämi. 5 Tsaynöpis tsay qoripita y qellaypitami yachaq runakuna templupa adornunkunata rurayanqa. Kananqa Tayta Diospa templunta shäritsinantsikpä qamkunapis kanqanpita churayämuy”.
6 Tsaynö niptinmi cada castapa y cada trïbupa mandaqninkuna, juk waranqa (1,000) soldädukunapa capitanninkuna, juk pachak (100) soldädukunapa capitanninkuna y David arutsinqan runakunapa capatazninkunapis apayämunanpä kushishqa awniyarqan. 7 Tsay templuta shäritsinanpämi apayarqan juk pachak soqta chunka pitsqa waranqa (165,000) kïlu qorita, chunka waranqa (10,000) qoripita rurashqa qellayta, kimsa pachak kimsa chunka waranqa (330,000) kïlu yuraq qellayta, soqta pachak waranqa (600,000) kïlu broncita y kimsa millón kimsa pachak waranqa (3,300,000) kïlu fiërrutapis.
8 Tsaynöllami tesorëruta entregayarqan tsaytsika kuyayllapä rumikunata. Tesorëruqa karqan Gersónpita aywaraq Jehielmi.
9 Tayta Diospa templunta shäritsiyänanpä llapan shonqunkunawan aparmi runakuna pasaypa kushikuyarqan. Tsaynöllami rey Davidpis pasaypa kushikurqan.
Tayta Diosta David adoranqan
10 Tsaymi llapan runakunapa ñöpancho Tayta Diosta adorar David nirqan:
“¡Israel yärakunqan Tayta Dios, imayyaqpis alabashqa kaykullay!
11 Tayta Dios, qamllami llapanpä munayyuq kaykanki.
Qamllatami pïmaypis alabaykulläshunki.
Llapan contraykikunatami vincinki.
Llapanpitapis mas respitashqami kanki.
Ciëlupis, kay patsapis y llapan imaykapis qampami.
Qampa munaynikichömi imaykapis.†
Llapanpitapis mas munayyuq kaptikimi qamta alabayä.
12 “Qam yanapaptikimi runakuna imaykayuq kayan.
Qam yanapaptikimi respitashqapis kayan.
Qammi llapanta mandanki.
Kallpayuq kaypis y munayyuq kaypis qampitami shamun.
Respitashqa kananpä y munayyuq kananpäpis qammi runakunata yanapanki.
13 Tayta Diosllä, llapan tsaypitami qamta agradëcikur kushishqa alabayä.
14 “Taytay, templuykita shäritsiyänäpä llapan apayämunqäpis qampita bendicionta chaskiyanqallämi kaykan.
Tsaymi noqapis y mandanqä runakunapis merëciyätsu apayämunqäkunata chaskiyämänaykipä.
15 Unay castäkuna qorpalla kayanqannömi noqakunapis kay patsacho qorpalla kayä.
Imayka llantuynömi ushakaqlla kayä.
16 Tayta Diosllä, templuykita shäritsiyänäpä apayämunqäpis qampita chaskiyanqallämi kaykan.
17 “Tayta Diosllä, musyankimi shonquncho runa imata yarpanqantapis.
Pipis munanqaykinö kawaptinqa kushikunkimi.
Tsaymi noqapis templuykipä llapan shonqüwan apamushqä.
Tsaynöpis kuyanqayki runakuna llapan shonqunkunawan apayämunqanta rikar kushikümi.
18 Unay castäkuna Abraham, Isaac y Israel yärakuyanqan Tayta Dios, imaypis yanapaykayällämay llapan shonqükunawan qam munanqaykinö kawayänäpä.
19 Tsurï Salomóntapis tantiyaykatsillay mandamientuykikunata, yachatsikuynikikunata y leynikikunata llapan shonqunwan imaypis cäsukunanpä.
Kamarinqäkunawan templuykita shumaq shäritsinanpä yanapaykullay”.
20 Tayta Diosta mañakuskirmi runakunata David nirqan: “Tayta Diosnintsikta llapaykikuna alabayay”.
Tsaynö niptinmi unay castankuna yärakuyanqan Tayta Diospa ñöpanman y reypa ñöpanman llapan qonqurikuykur alabayarqan.
Rey kananpä Salomónta churayanqan
21 Tsaypita waraynin junaqnami juk waranqa (1,000) torïtuta, juk waranqa carnërukunata y juk waranqa carnishkunata pishtaskir rupatsina kaq sacrificiukunata rupatsiyarqan. Tsaynöllami wakin sacrificiukunatapis rupatsir jananman vïnutapis wiñayarqan. Tsay sacrificiukunata llapan Israel runakunapa jutinchömi rupatsiyarqan. 22 Tsay junaqmi Tayta Diospa ñöpancho kushishqa mikuyarqan upuyarqan. Nirkurmi Tayta Diospa ñöpancho Davidpa tsurin Salomónpa umanman aceitita wiñaparqan rey kananpä. Tsaywanqa ishkay kutinami rey kananpä umanman aceitita wiñaparqan. Tsaynöllami Sadoctapis mandaq sacerdöti kananpä aceitita wiñaparqan.
23 Tsaynöpami Salomónta Tayta Dios churarqan taytan Davidpa trokin† Israel runakunapa mandaqnin rey kananpä. Rey kar llapan ruranqanpis alli kaptinmi Israel runakuna llapanpis payta respitar cäsukuyarqan. 24 Tsaynöllami mandaq runakuna, soldädukuna y Davidpa tsurinkunapis rey Salomónta kushishqa chaskiyarqan. 25 Salomónta llapanchöpis Tayta Dios yanapanqantami Israel runakuna tantiyayarqan. Tsaynö yanapaptinmi ñöpa kaq reykunapitapis mas munayyuq karqan.
David wanunqan
26 Llapan Israel runakunapa mandaqnin reymi Isaípa tsurin David karqan. 27 Puntataqa Hebrón markachömi qanchis wata rey karqan. Tsaypitanami Jerusalénchöpis kimsa chunka kimsa (33) wata rey karqan. Tsaymi Israel runakunapa mandaqnin rey karqan chusku chunka (40) wata.†
28 Davidqa pasaypa awkinnami wanukurqan. Payqa imaykayuqmi karqan y pïmaypitapis respitashqami karqan. Paypa trokinmi tsurin Salomónna rey karqan.
29 Rey David llapan ruranqanpis qallaykunanpita ushananyaqmi qellqaraykan profëta Samuel qellqanqancho, profëta Natán qellqanqancho y profëta Gad qellqanqancho. 30 Tsaychömi qellqaraykan imanö mandanqanpis, munayyuq kanqanpis, ima päsanqanpis, Israel nación imanö kanqanpis y wakin nacionkuna imanö kanqanpis.