Templuta imanö arutsinanpäpis rey David tantiyatsinqan
28
Tsaypitanami Jerusalénman David qayatsirqan llapan mandashiqninkunata, cada trïbupa mandaqninkunata, soldädukunapa capitanninkunata, juk waranqa (1,000) soldädukunapa mandaqninkunata y juk pachak (100) soldädukunapa mandaqninkunata. Tsaynöllami qayatsirqan Davidpa y tsurinkunapa chakrankunacho arutsiq capatazninkunata, Davidpa y tsurinkunapa uywankunata mitsitsiqkunata, yanapaqninkunata y alli chölu kaq soldädukunatapis.2 Llapan qorikaskiyaptinnami rey David ichirkur nirqan: “Taytakuna, kanan shumaq wiyaykayämay. Tayta Diosnintsikpa Pactu Babulnin imayyaqpis churaränanpä y Tayta Dios tänanpä templuta shäritsiyta munarmi llapanta kamarishqä. 3 Tsaynö kamariykaptïmi Tayta Dios nimashqa: ‘Juk nación runakunawan guërracho atska runakunata wanutsishqa karmi qamqa templüta shäritsinkitsu’.
4 “Tsaynö kaptinpis yärakunqantsik Tayta Diosmi llapan trïbu Israel runakunapa mandaqnin rey kanäpä akramashqa. Puntataqa Judá trïbutami akrashqa. Nirkurmi taytäpa castanpita y wawqïkunapita noqata akramashqa.
5 “Tayta Diospa bendicionninwanmi tsurïkuna atska kaykäyan. Paykunapitanami tsurï Salomónta Tayta Dios akrashqa wanukuptï Tayta Dios mandanqan Israelcho rey kananpä. 6 Akrarninmi Tayta Dios nimashqa: ‘Tsuriki Salomónmi templüta y patiunkunata ruratsinqa. Paytami akrashqä wamrä kananpä. Noqami taytan kashä. 7 Mandamientükunata y leynïkunata kanan cumplinqannölla cumpliptinqa paypita aywaraqkunallami imaypis rey kayanqa’.†
8 “Tayta Diosnintsik rikaykämashqami llapaykikuna qorikashqa kaykaqta nï: Tayta Diospa llapan mandamientunkunata mana qonqaypa cumpliyay. Tsaynöpami kay nacionnintsik imayyaqpis qamkunapä y tsurikikunapä kanqa.
9 “Kuyay tsurillä Salomón, Tayta Diosta cäsukunqänö qampis cäsukuy. Tayta Diosqa musyanmi shonquntsik imata yarpaykanqantapis. Tsaynö kaykaptinqa llapan shonquykiwan y llapan voluntänikiwan payta cäsukuy. Payta ashirqa tarinkimi. Payta kachariptikiqa qamtapis kacharishunkimi. 10 Qamtami Tayta Dios churashushqayki täkunan templunta arutsinaykipä. Tsaynö kaykaptinqa juklla arutsir qallaykatsiy”.
11 Nirkurmi tsurin Salomónta David entregarqan templuta imanö arutsinanpäpis ruranqan plänuta. Tsay plänuchömi kaykarqan templuman yaykunan patiuta imanö ruratsinanpä, patiu ñöpancho kaykaq wayikunata imanö ruratsinanpä, imaykatapis churakuna wayikunata imanö ruratsinanpä, altuscho jatun cuartukunata imanö ruratsinanpä, patsacho kaq cuartukunata imanö ruratsinanpä y Lugar Santïsimuta imanö ruratsinanpäpis. 12 Tsaynöllami plänuta entregarqan templupa patiunkunata y templupa patiun kuchunkunacho kaykaq cuartukunata imanö ruratsinanpä, tesörukunata churayänanpä kaq cuartukunata imanö ruratsinanpä y Tayta Diospä ofrenda apayanqankunata churayänanpä kaq cuartukunata imanö ruratsinanpäpis. 13 Tsaynöllami tsurin Salomónta rey David tantiyatsirqan sacerdötikuna y levitakuna templucho imata rurayänanpä y templucho kaq sagrädu manëjukunata imanö manijananpäpis.
14 Templupa manëjunkunata ruratsinanpä qorinqan qoritapis y yuraq qellaytapis tsaytsikatami Salomónta entregarqan.
15 Candelabrukunata y mechërukunata ruratsinanpäpis qorita y yuraq qellayta tsaytsikatami entregarqan. Ayka pësananpä kanqantapis calculaskirmi kamariparqan.
16 Mësakunata ruratsinanpäpis qorita y yuraq qellayta pësaypami entregarqan. Tsay mësakunami qaqayllanpa sagrädu tantakunata churayänanpä karqan.
17 Trinchikunata, tazonkunata y uyllukunata ruratsinanpäpis qorita y qellaytami entregarqan.
Väsukunata ruratsinanpäpis cada ünü ayka pësananpä kanqanta calculaskirmi qorita y yuraq qellayta kamariparqan.
18 Inciensiuwan qoshnitsikuna altarta ruratsinanpäpis allinnin kaq qoritami kamariparqan.
Tsaynöllami qorita kamariparqan Tayta Diospa carrëtanta ruratsinanpä. Paypa carrëtanqa querubinkunami kayarqan. Tayta Diospa Pactu Babulnin jananpami tsay querubinkunapa älankuna mashtashqa kaykäyarqan.
19 Tsaypitanami tsurin Salomónta David nirqan: “Revelacioncho Tayta Dios rikatsimanqannöllami llapan tsay plänukunata dibujashqä. Plänucho dibujashqa kaykaqtanölla llapantapis ruratsinki”.
20 Mastami tsurin Salomónta David nirqan: “Kananqa mana qelanaypa y mana mantsariypa juklla arutsir qallaykatsiy. Templuta y templucho kananpä kaqkunata ruratsiyta ushanaykipämi noqa sirvinqä Tayta Dios mana kachaypa yanapashunki. 21 Templucho trukanakuypa aruyänanpämi sacerdötikuna y levitakuna kaycho kaykäyan. Artesänukunapis yanapayäshunaykipä kaychömi kaykäyan. Llapan mandaqkunapis y wakin runakunapis yanapayäshunaykipä listumi kaykäyan”.