Davidpa soldädunkunapa capitanninkuna mayqankuna kayanqanpis
27
Israel soldädukunapa tröpankuna chunka ishkaymi karqan. Cada tröpachömi kayarqan ishkay chunka chusku waranqa (24,000) soldädukuna. Paykunami watacho cada killa trukanakuypa reyta sirviyaq. Tsay tröpakunachömi wakin capitankuna kayarqan juk waranqa (1,000) soldädukunapa mandaqninkuna y wakinnami kayarqan juk pachak (100) soldädukunapa mandaqninkuna. Kaychömi qellqaraykan soldädukunapa capitanninkunapa y yanapaqninkunapa jutinkuna.2 Punta kaq killachömi turnu töcarqan Zabdielpa tsurin Jasobeamta. Payqa ishkay chunka chusku waranqa (24,000) soldädukunapa capitanninmi karqan. 3 Jasobeam Farespita aywaraq runami karqan. Payqa karqan punta kaq killacho turnu töcaq capitankunapa mandaqninmi.
4 Ishkay kaq killachömi turnun töcarqan Dodaita. Payqa karqan Ahoapita aywaraq runami. Paypis ishkay chunka chusku waranqa (24,000) soldädukunapa capitanninmi karqan. Dodaipa yanapaqninmi karqan Miclot.
5 Kimsa kaq killachömi turnu töcarqan mandaq sacerdöti Joiadapa tsurin Benaíata. Paypis ishkay chunka chusku waranqa (24,000) soldädukunapa capitanninmi karqan. 6 Benaíaqa karqan Kimsa Chunka ninqan mas valienti kaq soldädukunapa mandaqninmi. Benaíapa yanapaqninmi karqan tsurin Amisabad.
7 Chusku kaq killachömi turnu töcarqan Joabpa wawqin Asaelta. Paypa trokinnami mandaq karqan tsurin Zebadías. Paypis ishkay chunka chusku waranqa (24,000) soldädukunapa capitanninmi karqan.
8 Pitsqa kaq killachömi turnu töcarqan Samhutta. Payqa Izrapita aywaraq runami karqan. Paypis ishkay chunka chusku waranqa (24,000) soldädukunapa capitanninmi karqan.
9 Soqta kaq killachömi turnu töcarqan Irata. Payqa karqan Tecoa markapita Iquespa tsurinmi. Paypis ishkay chunka chusku waranqa (24,000) soldädukunapa capitanninmi karqan.
10 Qanchis kaq killachömi turnu töcarqan Pelón markapita Helesta. Payqa karqan Efraín trïbupitami. Paypis karqan ishkay chunka chusku waranqa (24,000) soldädukunapa capitanninmi.
11 Puwaq kaq killachömi turnu töcarqan Sibecaita. Payqa karqan Husa markapita Zera castami. Paypis ishkay chunka chusku waranqa (24,000) soldädukunapa capitanninmi karqan.
12 Isqun kaq killachömi turnu töcarqan Abiezerta. Payqa karqan Anatot markapita Benjamín trïbu runami. Paypis karqan ishkay chunka chusku waranqa (24,000) soldädukunapa capitanninmi.
13 Chunka kaq killachömi turnu töcarqan Maharaita. Payqa karqan Netofa markapita Zera castami. Paypis ishkay chunka chusku waranqa (24,000) soldädukunapa capitanninmi karqan.
14 Chunka juk kaq killachömi turnu töcarqan Benaíata. Payqa karqan Piratón markapita Efraín trïbu runami. Paypis karqan ishkay chunka chusku waranqa (24,000) soldädukunapa capitanninmi.
15 Chunka ishkay kaq killachönami turnu töcarqan Heldaita. Payqa karqan Netofa markapita Otoniel castami. Paypis ishkay chunka chusku waranqa (24,000) soldädukunapa capitanninmi karqan.
Israel trïbukunapa mandaqninkuna mayqankuna kayanqanpis
16 Israel trïbukunapa mandaqninkuna mayqankuna kayanqanpis kaychömi qellqaraykan:
Rubén trïbupa mandaqninmi karqan Zicripa tsurin Eliezer.
Simeón trïbupa mandaqninmi karqan Maacapa tsurin Sefatías.
17 Leví trïbupa mandaqninmi karqan Kemuelpa tsurin Hasabías.
Aarónpita aywaraq castakunapa mandaqninmi karqan Sadoc.
18 Judá trïbupa mandaqninmi karqan Davidpa wawqin Eliú.
Isacar trïbupa mandaqninmi karqan Micaelpa tsurin Omri.
19 Zabulón trïbupa mandaqninmi karqan Abdíaspa tsurin Ismaías.
Neftalí trïbupa mandaqninmi karqan Azrielpa tsurin Jerimot.
20 Efraín trïbupa mandaqninmi karqan Azazíaspa tsurin Oseas.
Pullan Manasés trïbupa mandaqninmi karqan Pedaíaspa tsurin Joel.
21 Galaadcho kaykaq pullan Manasés trïbupa mandaqninmi karqan Zacaríaspa tsurin Iddo.
Benjamín trïbupa mandaqninmi karqan Abnerpa tsurin Jaasiel.
22 Dan trïbupa mandaqninmi karqan Jerohampa tsurin Azareel.
Tsaynömi kayarqan cada trïbu Israel runakunapa mandaqninkuna.
23 Juk kutimi Israel runakunata rey David censatsirqan. Israel runakuna qoyllurkunanö atska kayänanpä Tayta Dios ninqannö atskaq kayaptinmi ishkay chunka (20) watayuqpita uraman kaqkunataqa censatsirqantsu.† 24 Censu kanantaqa Tayta Dios manami munarqantsu. Tsaymi Sarviapa wawan Joab censaykaptin Tayta Dios ajanar Israel runakunata castigarqan.† Tsaynö castigaptinmi censayta Joab usharqannatsu. Tsaynöpami Israel runakuna ayka kayanqantapis rey Davidpa acta librunman apuntayarqantsu.
Rey Davidpa yanapaqninkuna mayqankuna kayanqanpis
25 Adielpa tsurin Azmavetmi encargädu karqan rey Davidpa palaciuncho tesöru täpaqkunata churananpä.
Uzíaspa tsurin Jonatánnami encargädu karqan tesörukuna churaraykanqan wayikunaman täpaqkunata churananpä. Tsay wayikunami karqan chakrakunacho, markakunacho, caseriukunacho y murallashqa markakunachöpis.
26 Quelubpa tsurin Ezrimi encargädu karqan rey Davidpa chakrankunata arutsinanpä.
27 Ramat markapita Simeimi encargädu karqan rey Davidpa üva chakrankunata arutsinanpä.
Sifma markapita Zabdinami encargädu karqan rey Davidpa vïnu churakuna wayinkunaman täpaqkunata churananpä.
28 Geder markapita Baal-hanánmi encargädu karqan rey Davidpa olïvu chakrankunaman y hïgus chakrankunaman täpaqkunata churananpä. Tsay chakrakunaqa Sefelachömi karqan.
Joásmi encargädu karqan rey Davidpa aceiti churakuna wayinkunaman täpaqkunata churananpä.
29 Sarónpita Sitraimi encargädu karqan Sarón pampacho rey Davidpa wäkankuna mitsiqta churananpä.
Adlaipa tsurin Safatmi encargädu karqan Jezreel pampacho rey Davidpa wäkankunata mitsiqta churananpä.
30 Ismael runa Obilmi encargädu karqan rey Davidpa camëllunkuna mitsiqta churananpä.
Meronotpita Jehedíasmi encargädu karqan rey Davidpa ashnunkuna mitsiqta churananpä.
31 Agarpita Jazizmi encargädu karqan rey Davidpa üshankuna y cabrankuna mitsiqta churananpä.
Llapan tsay runakunami rey Davidpa capatazninkuna kayarqan.
32 Davidpa tiyun Jonatánmi alli tantiyaq y yachaq runa kar Davidpa yätsiqnin y secretariun karqan.
Hacmonipa tsurin Jehielmi reypa tsurinkunata cuidaq karqan.
33 Ahitofelpis rey Davidpa yätsiqninmi karqan.
Arac markapita Husaipis rey Davidpa amïgunmi karqan.
34 Ahitofelpa trokinmi kayarqan Benaíapa tsurin Joiada y Abiatar.
Joabnami karqan rey Davidpa soldädunkunapa capitannin.