Corépita aywaraqkunapitami templu punkuta täpaq kayarqan Meselemías casta runakuna. Meselemíasqa Corépa tsurin y Asafpa willkanmi karqan. 2 Meselemíaspa mayor tsurinmi karqan Zacarías. Paypa qepanmanmi yuriyarqan Jediael, Zebadías, Jatniel, 3 Elam, Johanán y Elioenai.

4 Tsaynöllami Corépita aywaraqkunapita templu punkuta täpaq kayarqan Obed-edom casta runakunapis. Obed-edompa mayor tsurinmi karqan Semaías. Paypa qepanmanmi yuriyarqan Jozabad, Joa, Sacar, Natanael, 5 Amiel, Isacar y Peultai. Tayta Diospa bendicionninwanmi Obed-edom tsaynö atska tsuriyuq karqan.^†

6 Obed-edompa tsurin Semaíaspa tsurinkunapis templu punkuta täpaqmi kayarqan. Paykunami alli chölu kar castankunapa mandaqninkuna kayarqan. 7 Paykunami kayarqan Otni, Rafael, Obed y Elzabad. Castan Eliú y Samaquíaspis alli chölumi kayarqan. 8 Obed-edompa tsurinkunata y willkankunata yupayaptinmi kayarqan soqta chunka ishkay (62). Paykunaqa llapanpis alli chölu y jinchimi kayarqan.

9 Meselemíaspa tsurinkuna y wawqinkuna kayarqan chunka puwaqmi. Paykunapis alli chölu runakunami kayarqan.

10 Meraripita aywaraqkunapitanami templu punkuta täpaq kayarqan tsurinkunawan Hosa. Hosapa tsurin Simritami mayor mana kaykaptinpis mandaq kananpä taytan churarqan. 11 Simripa qepanmanmi yuriyarqan Hilcías, Tebalías y Zacarías. Hosapa wawqinkunawan tsurinkunami kayarqan chunka kimsa.

12 Meselemías casta runakuna, Obed-edom casta runakuna y Hosa casta runakuna mandaq y mana mandaq karpis llapanmi templu punkuta täpayarqan. 13 Cada punkuta täpayänanpämi cada castapita suertita jitayaq. Mayqanpäpis suerti yarqamunqanmanmi mayor o qepa karpis punkuta täpayaq.

14 Meselemías casta runakunatami töcarqan rupay yarqamunan kaqlä punkuta täpayänanpä. Tsurin Zacaríastanami töcarqan norti kaq punkuta täpayänanpä. Zacaríasqa karqan shumaq yätsikuq runami. 15 Obed-edom casta runakunatami töcarqan sur kaq punkuta täpayänanpä. Tsurinkunatanami töcarqan templucho kaykaq churakuna cuartukunata täpayänanpä. 16 Supim y Hosatanami töcarqan rupay jeqanan kaq Salequet jutiyuq punkuta täpayänanpä. Tsay punku karqan witsaypa aywaq cällichömi.

Cada punkuta ayka levita runakuna täpayanqanpis kaynömi karqan:

20 Wakin levita runakunanami kayarqan templucho tesörukuna churaraykäyanqan täpaq y Tayta Diospä ofrenda churayanqan cuartukunata täpaq. 21 Paykunami kayarqan Gersónpa tsurin Laadán casta runakuna. Cada ünunmi castankunapa mandaqnin kayarqan. Tsaynöpis kayarqan Jehielpita aywaraqkuna, 22 Jehielpa tsurin Zetampita aywaraqkuna y Zetampa wawqin Joelpita aywaraqkunapis. Paykunami kayarqan templucho kaykaq tesörukunata täpaq.

23 Kaychömi qellqaraykan wakin mandaqkunapa jutinkuna. Tsay mandaqkunami kayarqan Amram castapita, Izhar castapita, Hebrón castapita y Uziel castapita.

24 Amram castapitami mandaq karqan Sebuel. Sebuelqa Moiséspa tsurin Gersónpita aywaraqmi karqan. Paymi tesörukuna churaraykäyanqan cuartukunaman täpaqkunata churananpä encargädu karqan.

25 Moiséspa jukaq tsurin Eliezerpa tsurinmi karqan Rehabías, Rehabíaspa tsurinmi karqan Jesaías, Jesaíaspa tsurinmi karqan Joram, Jorampa tsurinmi karqan Zicri y Zicripa tsurinmi karqan Selomit. 26 Selomit casta runakunami täpayarqan Tayta Diospä churayanqan tesörukunata. Tsay tesörukunatami ofrendayarqan rey David, Israel runakunapa castankunapa mandaqninkuna, juk waranqa (1,000) soldädukunapa capitanninkuna, juk pachak (100) soldädukunapa capitanninkuna y soldädukunapa mas mandaqnin capitankunapis. 27 Tsay tesörukunaqa karqan guërracho contrankunata vincir apayämunqanmi. Tsaytami churayarqan Tayta Diospa wayinta shumaq allitsatsiyänanpä.

28 Tsay cuartukunamanmi churayarqan Tayta Diospä wakin ofrendakunatapis. Tsay ofrendakunatami churayarqan profëta Samuel, Cispa tsurin Saúl, Nerpa tsurin Abner, Sarviapa wawan Joab y wakin runakunapis. Selomit casta runakunami Tayta Diospä llapan churayanqan ofrendakunata täpayarqan.

29 Izhar castapitami mandaq kayarqan Quenanías y tsurinkuna. Paykunami juklä nacioncho taq Israel runakunapa gobernadorninkuna y juezninkuna kayarqan.

30 Hebrón castapitami mandaq kayarqan Hasabías y paypita aywaraqkuna. Paykunami Jordán mayu rupay jeqanan kaqläpa taq Israel runakunapa mandaqninkuna kayarqan. Paykunami encargädu kayarqan Tayta Dios ninqanta y rey ninqanta cumplitsiyänanpä. Hasabíaspita aywaraqkunami kayarqan juk waranqa qanchis pachak (1,700) alli chölu runakuna.

31 Tsaynöpis Hebrón castapitami mandaq karqan Jerías. Chusku chunka (40) wata rey kaykarmi David musyayta munarqan Hebrón casta runakuna mayqan markakunacho täyanqantapis. Tsaymi Hebrón casta runakunapä unay qellqayanqan librukunata liyir shumaq ashiyänanpä mandarqan. Tsaynöpami Hebrón casta alli chölu runakuna Galaad particho kaykaq Jazercho kayanqanta musyayarqan. Tsaynöllami musyayarqan Jazercho taq Hebrón casta runakunapa mandaqnin Jerías kanqantapis. 32 Hebrón casta Jeríaspita aywaraq runakunaqa kayarqan ishkay waranqa qanchis pachak (2,700) runakunami. Paykunatami David churarqan Jordán mayu rupay yarqamunan kaqläpa taq Israel runakunapa mandaqninkuna kayänanpä. Paykunami encargädu kayarqan Tayta Dios ninqanta y rey ninqanta cumplitsiyänanpä. Tsaymi encargädu kayarqan Rubén trïbu runakunapä, Gad trïbu runakunapä y pullan kaq Manasés trïbu runakunapäpis.