2 «Cananga imata-imata canantapis llapantam willapäshayqui. Mä, wiyamay. Persia marcacunaćhu quimsa runaraj mandaj cayman ćhayangapaj. Ćhuscuj-cajpis ricarimungapaj. Chay mandajga sumajmi jinay-jinayyujyangapaj. Sumaj munayniyuj cayman ćhayar, maquinćhu juyaj runacunata shacyächinga Grecia marcacunapa mandajninta ćhayapur magananpaj. 3 Chaypitana juc sumaj munayniyuj mandaj runa ricarimungapaj. Marcancunapis yupaysi mana atipaypaj cangapaj. Maypisi nishan-nishan imatasi rurangapaj. 4 Munayniyuj cayman ćhayaycaptinmi ichanga, marcancuna raquicayman ćhayachingapaj. Ćhuscu marcamanna raquicäcungapaj. Juc marcaga jana-cajman raquicangapaj. Jucna ura-cajman raquicangapaj. Cay-cajlämanpis, washa-cajlämanpis raquicäcungapaj. Chay sumaj munayniyuj runapa marcancuna manam wamrancunapa maquimanchu ćhayangapaj. Manam unay cashannuynachu cangapaj. Manchäga juccunapa maquinman ćhayash caycaptin, munayniyuj cayninpis ushyacangapaj.

5 «Ura-caj marcapa mandajninna sumaj munayniyuj cangam. Munayniyuj caycaptinsi, shullca mandäshijnin ticrapungapaj. Ićhipurirga, maquinpita mandashan marcacunatapis jićhungapaj. Jićhuj mandajga sumaj munayniyuj cangapaj. Achca marcayuj cangapaj. 6 Chaura chaycuna unaypaptinna, ura-caj marcapa mandajninwan jana-caj marcapa mandajnin parlanacäringam alli ricanacushpan juyänanpaj. Shiminta ćharcucächinan munaywanpis jana-caj marcapa mandajninga ura-caj marcapa mandajninpa jipash wamranwan majachacangapaj. Warmi wamranmi ichanga runanta maquichacuyta manam camäpacungachu. Papäninpis shungun munapashantam mana taringapächu. Manchäga chay warmita majantinta, wamrantinta, mincaynintintapis wañurachish cangapaj.

7 «Chaynuy ruraptinsi, chay warmipa turin jatarimungapaj. Jana-caj marcacunapa mandajninta llapan marcancunatawan magaypa magar ićhipungapaj. 8 Ićhipariycur, manchapacushan illancunatapis, juri mancancunatapis, jillay mancancunatapis apacarcärir, Egipto marcaman cuticäringa. Achca watapis jana-caj marcacunapa mandajninta mana manchacullarna, juyäcungapaj. 9 Jinarcurraj jana-caj marcapa mandajnin magayta munaywanmi ura-caj marcacunapa mandajninta ćhayapungapaj. Munashanta mana camäpacurmi ichanga, marcanman cuticungapaj.

10 «Chay mandajpa wamrancunam ichanga, callpa-sapa murucuncunata shuntacäringapaj. Magaypa ushyar aywapungapaj. Mayu sumaj ćhayashan-jina ćhayapungapaj. Ićhipaycur, ura-caj marcacunapa mandajninpa jatun wasintapis jućhurachij ćhayapungapaj. 11 Chaynuy ćhayapuptin, ura-caj marcacunapa mandajnin ullgucäcungapaj. Juyupa ullgushpan janapita shamuj murucucunata ćhayapungapaj. Chay-chicajta magaypa ushyar ićhipungapaj. 12 Chiquinacushancunata ićhipariycur, sumaj alli-tucungapaj. Chiquishancunatam chay-chicajta wañurachingapaj. Wañurachiptinsi, mana aycällatana munayniyuj juyangapaj. 13 Manchäga jana-caj marcapa mandajninmi chay-chica murucucunata shuntanga. Unay shuntashanpita mas achcajta shuntangapaj. Ishcay-quimsa watatana chay-chica murucucunata shuntacurcur, imancunatapis apacurcur, maganacur aywapacäringapaj.

14 «Chay wichanna juclä marcacunapa mandajnincunapis ura-caj marcacunata magaj aywapacungapaj. Waquin ullguj Israel-masiquicunapis suyñushanta camacächiyta munar, magäshij aywapäcungapaj. Mana camäpacurmi ichanga, imamanpis ćhayapäcungapaj. 15 Janapita aywamuj murucucunaga ura-caj jatun marcata tumaypa chapacurcungapaj. Yaycapunanpäpis sumaj camaricungapaj. Ićhipuj yaycapuptin, ura-caj marcacunapa callpa-sapa murucuncunasi manam chapacuytapis camäpacungapächu. 16 Magaypa ushyariycur, janapita yaycapuj mandaj runa nishan-nishallantam rurangapaj. Manam pipis chapayta camäpacungapächu. Llapanta ushyaypa ushyar, maquinćhüpis cuyayllapaj alli ćhacrata marcantintam charingapaj. 17 Maquinćhüna ura-caj llapan marcacunatana purichiyta munangapaj. Munapashanta camacächir, ura-caj marcapa mandajninta niraycaj jipashninwan majachacachingapaj. Ura-caj marcapa mandajninta pampaman ćhuranan cashan, artïllapa jipashninwan majachacachiptinsi, yarpashan manam llucshipungapächu.

18 «Jinarcur lamar cućhun quinranćhüpis waquin marcacunata ićhipuyta munangapaj. Munayniyuj cashpan, achcajta ićhipungapaj. Juc mayur murucu ticrapuptinmi ichanga, waquin marcata mana ićhipungapächu. Chaynuypam munayniyuj mandaj caycarsi, pingayman ćhayangapaj. 19 Jatun wasinmanna cuticungapaj. Cuticuycashanćhünam imamanpis ćhayangapaj. Ushyacayman ćhayaycarna, illaricäcungapaj.

20 «Illaricäcuptin, jucna mandaj cayman ćhayangapaj. Marcan munayniyuj marca cananta munar, cuyayllapaj wasinćhu juyäcuyta munarpis, puräta shuntaj runata caćhacungapaj. Alli ricash cayta munarsi, yupash junajllam cawangapaj. Pipis mana chiquipaycaptinsi, pipis mana wañuycachiptinsi, ushyacayman ćhayangapaj.

21 «Chaypita pipis mana ricayta munashan runa mandaj cayman ćhayangapaj. Payga manam juc mandajpa wamranrächu cangapaj. Manchäga mana yarpashpita ricarimushpan, riguichipayllapa mandaj cayman ćhayangapaj. 22 Nircur, juclä marcacunapa murucuncunata ushyaypa ushyar wañurachingapaj. Tayta Diosninchi acracushan runacunapa mayur mandajnintapis ićhipungapaj. 23 Waquin marcacunawanga ishcayta rimaj carpis, alli juyänanpaj parlanacungapaj. Wallcalla murucuncuna caycaptinsi, sumaj munayniyuj cayman ćhayangapaj. 24 Runacuna manasi tantiyacuptillan, jinay-jinayyuj runacunapa marcanpis ćhayapungapaj. Unay auquilluncunapis, papäninpa auquilluncuna mana camäpacashanta quiquinmi camäpacungapaj. Ćhayapur, runacunapa ima-aycancunatapis, jillaynincunatapis, ćhacrancunatapis jićhurir, murucu-masincunawan raquipänacunga. Sumaj chapacush marcacunatapis yaycapuyta munangapaj. Munashanga yupash junajllapämi cangapaj.

25 «Chaura sumaj munayniyuj caycar, chay-chica murucuncuna caycaptinpis, mana manchacullar ura-caj mandajta magaj ćhayapungapaj. Ura-caj marcacunapa mandajninpis may-may murucuncunata jutucachingapaj. Sumaj camaricurpis, manam ićhipungapächu. Manchäga waquin murucuncunaga ticrapacurcungapaj. 26 Wasinćhu juyajcuna, alli-allinninta micüshijcunaga ticrapurcungapaj. Chaynuypam murucuncuna ushyaypa ushyash cangapaj. Chay-chicajtam wañuchish cangapaj.

27 «Chaypitana ishcan mandajcuna parlanacungapaj. Ishcanpis janan shungulla carmi, llullapänacullar-llullapänacullar parlanacungapaj. Ushyacänan junaj mayna jitapash caycaptin, parlanacushancunapis mana ćharcucangapächu. 28 Parlanacuriycur, marcanpa cutircur, jana-caj marcapa mandajnin chay-chica jillayta apacungapaj. Jićhushan ima-aycacunatapis apacungapaj. Cutiycashanćhüna Tayta Diosninchi acracushan runacunatapis magaypa ushyar ćhayapungapaj. Nishan-nishanmi imatapis rurangapaj. Jinarcurrämi marcanman ćhayangapaj.

29 «Jitapashan junaj ćhayamuptinna, ura-caj marcacunata magacuj aywapungapaj. Magacuj aywaptinsi, mana yarpashannuychu llucshipungapaj. 30 Washa marcapita büticunawan murucucuna yaycapuptin, mancharicäcungapaj. Mancharishpan, jishpicungapaj. Wasinpana cuticungapaj. Ullgush caycarmi ichanga, Tayta Diosninchipa acracushan runacunata ashipangapaj. Tayta Diosninchipita jiwacash runacunawan tincuptinmi ichanga, juc shungulla cashpan, yaćhänacungapaj.

31 «Murucuncunana Tayta Diosninchipa mayur wasinman yaycapur, llapanta pampaman ćhurangapaj. Waran-waran Tayta Diosninchipaj jaracunantapis chapangapaj. Chiquipaypaj, millanaypaj manchapacushanta jatarachingapaj. 32 Tayta Diosninchipita jiwacash runacunata artïllapa shungun munapashanta rurachingapaj. Tayta Diosninchita manchapacujcunam ichanga, shiminta mana ćhasquicungapächu. Manchäga mana manchacullar ićhipänacäringa. 33 Mayur runacunana yarpay-sapa cashpan, imaman ćhayananpita Israel-masincunata tantiyachingapaj. Chiqui runacunam ichanga waquin mayurcunata cuchuypa cuchur wañurachingapaj. Waquinta ninawan rupachiypa ushyangapaj. Waquintana llapan imancunatapis suwapar apacungapaj. Waquintana jäpa marcacunaman apachingapaj. 34 Ñacachiptinga, waquin runa yanapaj-tucungapaj. Ichanga janan shungulla yanapangapaj. 35 Waquin yarpay-sapa mayur runacunata ñacachiypa ushyar wañurachingapaj. Tayta Diosninchiman yupachicuyninpa wañuyta tarijcunataga Tayta Diosninchim alli ñawinpa ricangapaj. Juchallicushanta ushyacächiycur, shuntangapaj. Allimanpis ćhurangapaj. Juchaynaj cayman ćhurangapaj. Chaynuypam ushyacay junaj ćhayamushancaman shujmangapaj. Chay junajga jitapashan junajrämi ćhayamungapaj.

36 «Chaura jana-caj marcacunapa mandajninga nishan-nishan imatapis rurangapaj. Alli-tucur, ningapaj: ‹Munayniyuj caynïmanga manam maygan yaya jircapis tincunmanchu.› Apärishpan, munayniyuj Tayta Diosninchitapis tucuy-jinanpa ashllir ushyangapaj. Llapanpis alli llucshipuptinsi, Tayta Diosninchipa ullguynin pugushancaman shungun munapashanta rurangapaj. Tayta Diosninchim ichanga, aunishantam, änir ćharcucächingapaj.

37 «Chay jana-caj marcacunapa mandajninga auquilluncuna yupachicushan yaya jircacunata manam manchapacungapänachu. Warmicuna cuyashan illatasi mana manchapacungapäpishchu. Manchäga quiquinmi yaya jirca-tucungapaj. 38 Murucuncunapa yanapajnin illatash ichanga manchapacungapaj. Alliman ćhurangapaj. Auquilluncuna mana ricsishan illatarämi cuyachicuynincunata jarangapaj. Juritapis, jillaytapis, achic-achicyaycaj rumicunatapis, allinnin cuyachicuynincunatawan jarangapaj. 39 Illacunata manchapacuj murucuncunawan jatunnin marcacunatapis ćhayapungapaj. Pipis manchapacuptin, yaya jircata alli ricaptin, mayur capuralnin cayman ćhurangapaj. Maquinmanpis ićhipushan runacunata ćhurangapaj. Ćhacrancunatapis raquipungapaj.

40 «Ushyacay junaj ćhayaycämuptinna, ura-caj marcacunapa mandajninga jana-caj marcacunata magaj aywapungapaj. Ćhayapur, jana-caj marcacunapa mandajninwan tincuriycungapaj. Waquin murucuncunana cawalluwan janćhaycaj cärunwan aywangapaj. Waquinga cawallun muntash aywangapaj. Achca bütiwanpis murucuncuna aywangapaj. Ćhayash mayu imatapis ushyashan-jina murucuncunapis marcan-marcan aywar, magaypa magar llapanta ushyangapaj. Ićhipungapäpis. 41 Cuyayllapaj Israel marcaman ćhayar, chay-chica runata wañurachingapaj. Waquin runacunam ichanga maquinpitam jishpingapaj. Edom marca runacunawan Moab marca runacuna jishpingapaj. Amón marca allinnin runacunapis jishpingapaj.

42 «Chaura maquinćhu chay-chica marcacunata purichir, Egipto marca runacunatapis ićhipungapaj. Paycunam ichanga mana jishpingapächu. 43 Ićhipurga, llapan juritapis, jillaynintapis, cuyashan ćhaninyuj ima-aycancunatapis quiquinpa marcanman apacungapaj. Libia marcatawan Etiopía marcacunatapis ićhipungapaj. 44 Wacćhu-cayćhu runacuna ticsharashanta mayarmi ichanga, jana-caj marca mandaj ullgucäcungapaj. Ullgushpan runacunata wañurachij puringapaj. Ushyaypa ushyar achcajtam ushyaringapaj. 45 Aywaycashanćhüna lamar cućhunwan cuyayllapaj punta tincuraycashan pampa quinranćhu allinnin purichinan wasicunaćhu pachacungapaj. Chayćhümi mana pisi yanagaptillan, wañuyman ćhayangapaj.»