12
«Chay wichan ‹Miguel› jutiyuj mayur täpaj anjil ricarimungapaj. Paymi marca-masintiquita washäshunquipaj.‹Chay wichanmi juyupa ñacay cangapaj.
Unay auquilluyquicuna cawashanpita-pacha manam pipis chay-nirajchu ñacapacuran.
Chay wichan marca-masiquicunapa jutinta acta librućhu apuntaraycash caycaptinmi, jishpichish cangapaj.
2 Allpallaćhu pamparaycajcunaga may-chicajmi cawarimungapaj.
Waquinga imaycamanpis pingay-tucush cawangapaj.
Imay-imaypis juyu ñawinpa ricash cangapaj.
Waquinmi ichanga mana ushyacaj cawayman ćhayangapaj.
3 Janaj pacha achic-achicyaycämushan-jina tantiyacujcunaga achic-achicyaycar cawapäcungapaj.
Istrïllacuna achic-achicyaycämushan-jina tantiyachicujcunapis achic-achicyaycar imaycamanpis juyangapaj.
Paycunaga Tayta Diosninchipa shungun munashan cawaypitam runa-masinta tantiyaycächij.›
4 «Daniel, willapäcushätaga ama pitapis willapanquichu. Willapashäta musyayta munar, achcajmi wacpa-caypa purir, ashipacäringapaj. Ashirpäcuptinsi, ushyacay junaj ćhayamushancaman chaparächicunquiman.»
5 Chaynuy nimaptin, nuwa Daniel, ishcay runatapis ricarä. Jucnin mayu pallganćhu ićhiraycaran. Jucninna chimpaćhu caycaran. 6 Ricapaycaptï, jucnin yacu janallanćhu ićhiraycaj achic-achicyaycaj müdanashta tapuran: «Sumaj willapäcushayquicunaga, ¿imaytaj ćharcungapaj?» nir.
7 Yacu janallanćhu ićhiraycaj achic-achicyaycaj müdanashna maquincunata janaj pachaman jugacurcur niran: «Janaj pachaćhu tiyaj Tayta Diosninchim musyaycachishunquina: ‹Quimsa wata sujta quillacamanraj llapanpis ćharcucangapaj. Ñacayninpita acracushä runacuna jamaycuptinrämi, sumaj willapäcushayquicunaga ushyacangapaj› nir.»
8 Chaura rimamushanta wayaycarpis, mana imatapis tantiyacurächu. Chaymi tapucurä: «Llapan ushyacaptinga, ¿imanuyraj cangapaj?» nir.
9 Tapuptï, nimaran: «Daniel, chayllapäna. Willapäcushätaga ama pitapis willapanquichu. Ushyacay junaj ćhayamushancamanmi chararäcuchun. 10 Ñacarraj, runacuna Tayta Diosninchiman rasunpa yupachicushanga musyacangapaj. Ñacaywanraj juchancunata ushyacächingapaj. Alli cayman ćhayangapaj. Alli ricash cangapaj. Juchallicushanpis illaricäcungapaj. Juchaćhu arujcunam ichanga mana yamacällar juchata aparicungapaj. Paycunaga imatapis manam tantiyacungapächu. Tantiyacujcunam ichanga, llapanta tantiyacungapaj. 11 Waran-waran Tayta Diosninchipaj jaracunanta chapashanpita-pacha chiquipaypaj manchapacushan millanaypajta jatarachishancaman waranga ishcay paćhac isgun ćhunca (1,290) junajrämi cangapaj. 12 Pipis waranga quimsa paćhac quimsa ćhunca pichgawan (1,335) junaj ćharcucashanman shuyarga, cushishalla cawapäcungapaj.
13 «Daniel, cawashayquicaman Tayta Diosninchita manchapacushpan allilla cawaycullay, ari. Jamayta tarinquipämi. Ushyacay junaj ćhayamuptin, cawarircamur, unyayquitapis ćhasquicunquipämi.»