3 Nínive marcaman caćhacuycaptinsi, Tarsis marcapa Jonás jishpir aywacuran. Jope marcaman bütita ashij aywaran: «Tayta Diosninchipa ricay ñawinpita jishpicushaj» nir. Bütita tarir, pasäjinta pägaycur, bütiman jigacurcuran. Tarsis marcapa aywaycajcunawan aywar, yarparan: «Carupa aywacuptï, Tayta Diosninchi mana ricamanganachu» nir.

4 Jishpicuycaptinna, Tayta Diosninchi juyupa wayrata wayrächimuran. Yacupis büchiypa-büchiycaptin, bütipis challpucänanpäna caycaran. 5 Büti purichijcunana mancharicäcuran. Mancharir, manchapacushan jircancunata jayararan. Büti challpucänanpitapis apaycashan jipicunata yacuman wicapariran. Jonásmi ichanga, büti ruriman yaycucuycur, jatacurcur, cushish puñucuycaran. 6 Bütipa mandajnin puñuycajta tarir, Jonásta niran: «Puñuy siqui, ¿imanirraj puñucuycanqui? Jatariy. Manchapacushayqui taytayquiman juclla jayaray. Capasćhari yarpamashpanchi wañuypita jishpichimäshuwan.»

7 Niycashanćhu büti purichijcuna parlanacurcaycaran: «¿Pïpa juchan-jananraj ñacarcaycanchi? Surtita mä, jitashun pï chapata rurapämashanchita ricananchipaj» nir. Chaura surtita jitaptin, Jonáspaj llucshiran.

8 Paypaj llucshiptin, Jonásta tapuran: «¿Pipa juchanpitaraj imamanpis ćhayaycanchi? Mä, willamay. ¿Imaćhütaj arunqui? ¿Maypitataj canqui? ¿May marcapitataj shamushcanqui? ¿Pitaj castayquicuna?» nir.

9 Tapuptin, niran: «Nuwaga hebreo casta runam cä. Tayta Diosninchita manchapacü. Payga janaj pachaćhümi cawan. Cay pachatapis jatun yacu püsutapis camaran.»

10 Chaynuy niptin, chay runacuna mancharicäcuran. Nipäcuran: «¿Imanirtaj chayta rurashcanqui?» nir. Jonásga Tayta Diosninchipa ricay ñawinpita jishpicuycashanta mayna willacush caran.

11 Chaura yacu juyupana büchiypa-büchiycaptin, Jonásta tapuran: «¿Imatataj rurashuwan yacu ćhawacäcunanpaj?» nir.

12 Jonásna niran: «Yacuman jitarpaycamay. Jitarpaycamaptiqui, yacupis ćhawacäcungam. Juchata aparicushä-jananmi ñacarcaycanqui. Yacupis juyupa büchiypa-büchir jatarish caycan.»

13 Chaynuy niptinsi, bütita purichijcuna Jonásta jitarpuyta manash munaranchu. Manchäga imanuypapis pallganman bütita cutichiyta munar, sumaj callpachacuran. Chaypis yacu juyupana büchiypa-büchiycaptin, mana camäpacuranchu. 14 Chaymi Tayta Diosninchita sumaj jayararan: «Taytallau Tayta, cay runapa juchan-janan ama wañuyman ćhayaycachillämaychu, ari. Juchata mana aparicush captinsi, ama jagachaycallämaychu, ari. Taytallau Tayta, munashayquinuyllam llapanta camacächishcanqui» nir.

15 Chaynuy jayararcur, Jonásta charircur, yacuman jitarpuycuran. Jitarpuycuptinna, yacupis büchiypa-büchiycashanćhu juclla ćhawacäcuran. 16 Chayta ricar, bütita purichijcuna Tayta Diosninchitana sumaj manchapacuran. Jaracuyninta jarar, Tayta Diosninchita imaypis manchapacunanpäpis auniran.

17 Tayta Diosninchi camacächiyninpana jatun-caray piscädu Jonásta ñillpucurcuran. Piscädupa paćhanćhüna quimsa pagaspis, quimsa junajpis Jonás wiñaraycaran.