3 Quiquinpa wasinćhünash mandaj Nabucodonosor mandäshijnin Aspenazta niran: «Apamushanchi Israel runacunapita waquin müsucunata acrapämay. Papänin mandaj runa cash captin, mayur runa cash captin, apapämanqui. 4 Jishyaćhu müsuta ama acranquichu. Manchäga allinnin camarajlla müsucunallata acranqui. Yarpay-sapanninta, sumaj tantiyayyujta acranqui. Yaćhachishancunatapis yarparäcunman. Rimayninchitapis, yaćhacashanchita isquirbirashancunatapis yaćhachishuwan. 5 Quimsa watacaman waran-waran jaramashan micuyllata jaray. Upushä bïnullatapis upuchiy. Chaypitaraj mandäshimanman.»

6 Chaynuy niptin, tayta Aspenaz müsucunata acrarcur, Danieltapis, Ananíastapis, Misaeltapis, Azaríastapis acracuran. Ćhuscunshi «Judá» jutiyuj runapa willcancuna caran. 7 Paycunata acracurcur, jutintapis rucachipuran. Danielta jutichaparan: «Beltsasar» nir, Ananíasta: «Sadrac» nir, Misaelta: «Mesac» nir, Azaríastana: «Abed-nego» nir.

8 Jutincunata rucachiptinsi, micuy-janan Daniel shungullanćhu yarparan: «Tayta Diosnï aunishan micuycunallata micüman» nir. Chayshi wasi ricajta niran: «Tayta Aspenaz, mandamajninchi micushantawan upushanta mana micümanchu. Juchallicachimangam.» 9 Tayta Diosninchi camacächiyninpa mandaj Aspenazna Danielta alli ñawinpa ricaran. Sumaj yaćhänacuran. 10 Chaypis niran: «Daniel, mandajnïpa maquinćhümi cawä. Paytam manchacü. Quiquin nimaran: ‹Micushätawan upushäta jaranquiman.› Chaymi wiyacunä camacan. Waquin müsucunata wirayashta ricar uyuyashayquita ricashushpayqui, wañurachimangaćhi. Shimillayquita wiyacushä-janan umäta ruguramanman.»

11 Chaynuy nishpan mandajpa wasinćhu mayur mandäshij juc runapa maquinmanna Danielta, Ananíasta, Misaelta, Azaríasta ćhuraran. Chay shullca-caj mandajtana Daniel niran: 12 «Tayta, ćhunca junajcallamansi mä, camashun. Ćhacra micuytawan yacullata jaramay. 13 Jinarcur mandamajninchipa micuynintawan bïnunta micupacärij müsucunawan tincuchimay. Jinarcur, ricamashayquiman-tupu munashayquita imatapis rurachimay. Maquiquićhümi carcaycä.» 14 Chaynuy mañacuptinshi, ricaj runa auniran. Ćhunca junajcamanshi sumaj ricaran.

15 Ćhunca junaj ushyarcuptinna, yanaguincunawan Daniel wanllash, camarajllash carcaycaran. Wanlla cayninmanga waquin müsucuna manash tincuranchu mandaj Nabucodonosorpa allinnin micuyninta waran-waran jaraycaptinsi. 16 Chayshi ricaj runaga mandajpa alli micuynintawan alli bïnuta ćhuscujninta mana camapurannachu. Manchäga ćhacra micuyllata jararan.

17 Chaura Tayta Diosninchi camacächiyninpa ćhuscun müsucuna yaćhaj caymanpis ćhayaran. Isquirbishancunata liguircur-liguircur yarpay-sapa cayman ćhayaran. Sumaj tantiyayyuj caymanpis ćhayaran. Danielna runacuna ricaripushantapis, suyñushantapis tantiyaran. Imaman ćhayananpaj cashantapis tantiyayta yaćharan.

18 Chaura jitapashan quimsa wata ushyarcuptin, wasita ricaj mandäshij Aspenazga llapan ricashan müsucunata mandaj Nabucodonosorpa ñaupanman pusharan. 19 Mandaj Nabucodonosorna yaćhaj cayninta tupurcur-tupurcur llapan müsucunawan parlanacuran. Waquin müsucunata mana ćhasquiranchu. Danielta, Ananíasta, Misaelta, Azaríastash ichanga alli ñawinwan ricaran. Mandäshinanpäshi ćhuscujninta acraran.

20 Chaypita-pachash mandaj Nabucodonosor imatapis musyayta munar, imatapis sumaj tantiyacuyta munar tapuptin, ćhuscunshi sumaj-sumaj tantiyachiran. Paycunapa yaćhaj cayninmanga Babilonia marcacunaćhu llapan ricapacujcunapis, istrïlla tantiyajcunapis manash tincuranchu.

21 Chayshi tayta Ciro mandaj cayman ćhayashancaman mandaj Nabucodonosorta Daniel mandäshiran.