Mandaj Nabucodonosor suyñushan
2
Ishcay watana mandaycashanćhu mandaj Nabucodonosor suyñuran. Suyñushanga sumaj llutäpacachiran. Puñuytapis mana tariranchu. 2 Chayshi yaćhajcunata, musyapacujcunata, ricapacujcunata, istrïlla tantiyajcunataa jayachiran: «Shamuy. Suyñushäta tantiyachimay, ari» nir. Chaura jayachishannuylla mandajpa ñaupanman ćhayapäcuran. 3 Mandaj Nabucodonosorna niran: «Manchacuypämi suyñushcä. Sumaj llutäpacuycä. Suyñushäta mä, nimay. Imaman ćhayanätapis tantiyachimay.»4 Chaynuy niptin, arameo rimayninćhu istrïlla tantiyajcuna niran: «Taytallau tayta, imaycamanpis allilla cawaycullay. Maquiquićhümi carcaycä. Suyñushayquita mä, willamay. Willamaptiqui, imaman ćhayanayquitapis tantiyachishayqui.»
5 Mandajna niran: «Manam. Maynam nishcaj. Yarpashäta mana cutiricushächu. Suyñushäta mana willamaptiqui, imaman ćhayanätapis mana tantiyachimaptiqui, raćhicaćharirmi wañurachishayqui. Wasiquitapis ushyaypam jućhurachishaj. 6 Suyñushäta willamaptiquim, imaman ćhayanätapis tantiyachimaptiquim ichanga, cuyachicuynïcunata jarashayqui. Alli-allinninta imatapis jutupäshayqui. Alli ñawïpa ricashayqui. Chaymi juclla suyñushäta nimay. Imaman ćhayanätapis juclla tantiyachimay.»
7 Yapayna istrïlla tantiyajcuna niran: «Taytallau tayta, maquiquićhümi carcaycä. Chaymi suyñushayquita willamay, ari. Willamaptiquiraj, imaman ćhayanayquitapis tantiyachishayqui.»
8 Mandajna niran: «Manam. Jamcuna juc junajpämi jitapämayta munarcaycanqui. Chaypis yarpashäta mayna nishcaj. Shimïta manam cutiricushächu. 9 Suyñushäta mana willamaptiqui, imaman ćhayanayquitapis musyaycanquinam. Jamcunam ichanga llullapämänayquipaj mayna parlanacärishcanqui. Tulluta ñillpuchimayta munarcaycanqui. Chapacuyta munaptiquisi, yarpashäta manam cutirpushächu. Suyñushäta musyapämaptiqui, chaura imaman ćhayanäpaj cashantapis musyapäcunquipämi.»
10 Istrïlla tantiyajcunana niran: «Mandaj tayta, cay pachaćhüga pï runapis suyñushayquita manam musyangapächu. Chaynuy mañacaycamashayquita jatun mandajcuna cashpansi, sumaj munayniyujcuna cashpansi, mana mañacunmanchu. Yaćhajcunatapis, musyapacujcunatapis, istrïlla tantiyajcunatapis mana mañacunmanchu. 11 Mandaj tayta, mañacamashayquita manam camäpacärïchu. Suyñushayquita yaya jircacunallaćhi musyan. Paycunam ichanga runacunawan mana tallucanpishchu.»
12 Chayta wiyar, mandaj Nabucodonosor ullgucäcuran. Murucuncunatash niran: «Babilonia quinran marcacunaćhu llapan musyapacujcunata ushyaypa ushyar wañurachiy.»
13 Chaura «Musyapacujcunata ushyaypa ushyar wañurachiy» niptin, waquin murucuncuna yaćhänacushantinta-ima Danieltapis ashiran wañuchinanpaj. 14 Murucuncuna musyapacujcunata ashiycaptin, Daniel yarpay-sapa cashpan, capitan Ariocwan alli shimillanpa parlaran. Ariocpa maquinćhüshi mandajpa murucuncuna cawaran. 15 Chayshi Daniel tapuran: «Tayta Arioc, ¿imanirraj mandajninchi Nabucodonosor chiquipashpan musyapacujcunata wañuchinanta aunisha?» Tapuptin, Arioc llapallantash willaparan. 16 Chaynuy willaycuptin, Daniel juclla mandajman aywaran. Ćhayar, mañacuran: «Taytallau tayta, ¿ichicllata shuyaycunquimanchu? Suyñushayquita nuwa tantiyachishayqui» nir. 17 Mandaj auniptin, wasinman Daniel cuticuran. Ćhayar, yaćhänacushan Ananíasta, Misaelta, Azaríasta llapanta willaparan. 18 Jananmanpis niran: «Janaj pachaćhu tiyaj Tayta Diosninchita jayaräshun. Llaquipämashpanchi, mandajpa suyñushanta musyachimäshun. Manchäga Babilonia quinran llapan musyapacujcunatawan nuwanchitapis wañurachimäshun.»
19 Chaura chay pagas Danielta ricaripur, mandaj Nabucodonosor suyñushanta Tayta Diosninchi tantiyachiran. Tantiyachiptin, Daniel janaj pachaćhu tiyaj Tayta Diosninchita alliman ćhurashpan niran:
20 «Tayta Diosninchi imay-imaypis alli ricash caycullächun.
Payllam llapanta musyan.
Munayniyuj cashpanmi, munashanta imatapis camacächin.
21 Cay pachaćhüga llapantam camacächin
Waquin mandajcunata mandaj cayninpita jurgun.
Waquintana mandaj cayman ćhuran.
Yaćhajcunata sumaj yaćhaj cayman ćhayachin.
Tantiyajcunatapis sumaj tantiyacunanpaj camacächin.
22 Runa ima-imata tantiyayta mana atipashantapis tantiyachimanchi.
Runa imatapis mana musyashanta musyachimanchi.
Chacajćhu mana pisi ricashanta ricaycan.
Paypäga llapanpis achicyajmi.
23 Taytallau Tayta, jamllamanmi unay auquillücunapis yupachicuran.
Tantiyachimashayquipita, yanapämashayquipita sumajmi cushicü.
Allimanmi ćhurayculläshayqui.
Mañacushäta tantiyachillämashcanquim.
Mandamajnï munashantapis musyachimashcanqui.»
24 Chaypita capitan Ariocman parlaj Daniel aywaran. Arioctaga mandaj Nabucodonosor nish caran: «Babilonia marcacunaćhu llapan musyapacujcunata wañurachiy.» Danielshi ichanga niran: «Babilonia marcacunaćhu musyapacujcunata ama wañuchiychu. Manchäga mandamajninchiman pushamay. Suyñushanta tantiyaycachishaj.»
25 Chaynuy niptin, Arioc juclla pusharan. Mandajnin Nabucodonosorta niran: «Taytallau tayta, Judá quinranpita apachimushayqui runata tarishcä. Payshi suyñushayquita tantiyachishunqui.»
26 Mandajna «Beltsasar» jutichapashan Danielta niran: «¿Suyñushäta rasunpachuraj musyaycachimanquiman? ¿Imaman ćhayanätapis tantiyaycachimanquimanchuraj?»
27 Danielna niran: «Tayta, jatun mandaj runa caycaptiquisi, mana yaćhajcunachu, mana musyapacujcunachu, mana ricapacujcunachu suyñushayquita musyachishunquipaj. 28 Janaj pachaćhümi ichanga Tayta Diosninchi suyñushayquita musyan. Mandaj Nabucodonosor captiquiga, suyñuyniquićhu wara-warantincuna imaman ćhayanayquitapis ricachishcashunqui. Cananga mashtacuyquićhu jitarashpayqui suyñushayquitapis, ricapacushayquitapis tantiyachishayquipaj.
29 «Mandaj tayta, puñur, wara-warantin ima-imaman ćhayanayquitapis suyñushcanqui. Runapa suyñuyninta tantiyachicujmi ima-imaman ćhayanayquitapis ricachishcashunqui. 30 Payga suyñushayquitam musyachimasha. Manam nuwalla sumaj yaćhaj cashäpitachu musyachimasha. Manchäga tantiyachinajpaj camacächimasha. Llutäpacushayquicunata tantiyacunayquitam munan.
31 «Mandaj tayta, suyñuyniquićhu jatun runaman ricchacujtam ricarayqui. Ñaupayquićhümi achic-achicyaycaj ićhiraycaran. Cuyayllapa cashpansi, sumajmi manchacuypaj caran. 32 Runaman ricchacujpa umanga achic-achicyaycaj juripita rurash caran. Jasgunwan ricranna jillaypita caran. Paćhanwan racu ćhancanna brunsipita caran. 33 Ćhancanna jïrupita caran. Ćhaquinna manca allpawan jïru tallucash rurash caycaran. 34 Chayta ricaycaptiqui, pï runapis mana yatapaycaptinsi, jircapita jatun rumi cućhpachimush caran. Cućhpamur, runaman ricchacujpa ćhaquinman ćhayaran. Ćhaquinna manca allpawan jïrupita rurash captin, rumiga shallujpämi ćhayaran. 35 Shallucäcushpan manca allpapis, jïrupis, brunsipis, jillaypis, juripis ñuchgu allpa-nirajman ticracuriran. Usya wichan rïgupa punshanta wayra apacushan-jina shallucäcushancunatapis wayra apacuran. Llapallanta illararachiran. Runaman ricchacujta nitishan rumim ichanga jatun-caray jircaman ticracuriran. Cay pachatapis chapacurcuranmi.
36 «Chaynuymi suyñurayqui. Mandaj tayta, canan suyñushayqui imaman ćhayachishushunayquitapis tantiyachishayqui. 37 Taytallau tayta, jatun mandaj caycar, maquiquićhu marcantinta chay-chica mandajcunata purichinqui. Mandaj caymanga janaj pachaćhu tiyaj Tayta Diosninchim ćhurashcashunqui. Munayniyuj canayquipäpis, munashayquita camacächinayquipäpis, llapan runa alli ñawinpa ricashunayquipäpis camacächisha. 38 Cay pacha llap-llapantinmi maquiquićhu caycan. Maquiquićhümi llapan uywacunapis, pärijcunapis cawan. Chaypita runaman ricchacujpa juripita rurash umanmanmi tincunqui.
39 «Mandaj cayniquita ćharcuptiqui, juc runa mandaj cayman ćhayangapaj. Jatun mandaj cayniquiquimanmi ichanga mana tincungapächu. Chay runa mandaj cayninta ćharcuptin, jucna mandaj cayman ćhayangapaj. Payga llapan runacunata may-chay marcaćhu juyaptinsi, maquinćhu purichingapaj. Paymi brunsipita rurash-cajman tincungapaj. 40 Chay runa mandaj cayninta ćharcuptin, jucna mandaj cayman ćhayangapaj. Jïru chucru cashan-jina chay mandajpis chucru shungu cangapaj. Ullgushpan murucuncunawan ñaupacaj mandajcunapa mandäshijnincunata ushyar illarächingapaj. Jïru shallurachishan-jina chay mandajpis llapanta ushyar ushyaringapaj. Llapanta ushyaypam nitiringapaj. 41 Chaypis ricashayqui ćhaquiwan dïduncuna jïruwan manca allpapita tallucash caycashan-jina mandaj runapis maquinćhu purichishan marcacuna sumaj jucllachayta mana camäpacungapächu. Raquicash juyangapaj. 42 Jïru chucru cashan-jina waquin mandaj runapis shungun munashanta camacächingapaj. Manca allpa pishi-yatay cashan-jina waquin mandajpis ima ruraytapis manam camäpacungapächu. 43 Manca allpawan jïru tallucash caycashan-jina mandajcunapis: ‹Mana pipis ićhipumäshunmanchu› nir, marcancunata jucllachayta munangapaj. Parlanacur, wamrancunatapis majachacächingapaj. Ichanga jïruwan manca allpa mana jucllachashan-jina marcancunatapis jucllachayta mana camäpacungapächu.
44 «Chay mandajcunana maquinćhu runacunata puriycächiptin, janaj pachaćhu tiyaj Tayta Diosninchi juctana mandaj cayman ćhurangapaj. Chay mandajpa maquinćhu cawajcunata pipis mana ushyariyta camäpacungapächu. Pipis mana ićhipungapäpishchu. Manchäga waquin mandajcunata marcantinta ushyaypa ushyarir, imaycamanpis cawangapaj. 45 Chay mandajga jatun rumiwanmi tincun. Suyñuyniquićhümi ricarayqui. Pï runapis mana cućhpaycachiptinsi, chay jatun rumi jïrutapis, brunsitapis, manca allpatapis, jillaytapis, juritapis ushyaypa shallurachiran.
«Mandaj tayta, shamuj watacunaćhu ima-imaman ćhayanayquitapis munayniyuj Taytanchi musyachishurayqui. Suyñushayquiga rasuncajmi. Tantiyachishushayquinuylla llapanpis ćharcucangapaj.»
46 Danielpa shiminta wiyar, ñaupanman mandaj Nabucodonosor jungurpacuycuran. Manchapacuranpis. Maquinćhu cawaj runacunatapis niran: «Cuyachicuyninchita Danielta jarashun. Insinsutapis jushtachipäshun.» 47 Danieltana niran: «Tayta Diosniquiga rasunpa munayniyujmi. Paymanga maygan yaya jircapis manam tincunchu. Maquinćhümi llap-llapanta purichin. Mandaj runacunatapis maquinćhümi cawachin. Runa mana tantiyashantapis tantiyachin. Suyñushätapis musyachishcashunquim.»
48 Chay wichanpita-pachash Danielta mayur mandaj cayman ćhuraran. Mandäshiranna. Alli-allinnin cuyachicuynincunatapis jararan. Llapan Babilonia quinran marcacunatapis, llapan yaćhajcunatapis Danielpa maquinmanna ćhuraran. 49 Daniel mañacuptinna, Sadracwan, Mesacwan, Abed-neguwan mandaj Nabucodonosor Babilonia marcacunata ricachiran. Danielna mandaj Nabucodonosorwan maqui-maquilla mandäshiran.