3 Quimsa watana mandaycashanćhu mandaj Asuero jatun tünata rurachiran llapan mayur mincaynincunata jarananpaj. Tünaman jayachiran Media marcapita mayur runacunatapis, mayur murucucunatapis, Persia marcapita mayur runacunatapis, mayur murucucunatapis. Marcacunapa auturdänincunatapis jayachiran. 4 Sumaj rïcu cashanta, sumaj munayniyuj cashanta musyachicur, sujta (6) quillaraj tünaran. Jurpancunata sumaj micuchiran. Sumaj upuchiran.

5 Jatun tünapita manasi aycällata Asueruga juc tünata rurachiran Susa marcaćhu tiyaj runacunallapaj. Chay tünaga caran janćhis (7) junajlla quiquin mandajpa wasinćhu. 6 Sawanninta cuyayllapaj camarachiran. Achic-achicyaycaj wancapita asulwan yuraj llutpi bayïtata warcuparan. Bayïtacunata charichinanpaj achicyaj jillaypita arguyllacunata rurachiran. Arguyllacunapita puca jïluwan bayïtata warcusha. Jamacunancunatapis caran juripitaraj, achicyaj jillaypitaraj. Sawan pampatapis rurachiran achic-achicyaycaj rumipita, chillap-chillapyaycaj rumipita. 7 Upyapäcunapäpis tucuy-niraj cüpacunata rurachiran jurillapita. Jurpancuna upyananpaj chay-chica shactata camarachiran. 8 Chay-chica shacta captinpis, jurpancunaga shungun tantiyashallanta upuran. Mandajga mincaynincunata willaran: «Shungun ćhasquishallanta runacuna upuchun» nir.

9 Asuerupa warmin mama Vastipis shuyninpa juc tünata rurachiran warmi-masincunallapaj majan Asuerupa wasinćhu.

10 Asueruga jatun tüna rurachishanpita janćhis (7) junajtaga cushisha upyapaycashanćhu warmi täpaj chicla runacunata caćhacuran warmin jayaj. Warmi täpaj chicla runacunapa jutin caran Mehumán, Bizta, Harbona, Bigta, Abagta, Carcas, Zetar. 11 Chicla runacunata caćhacuran mama Vastita pushananpaj. Vasitga sumaj camarajlla warmish caran. Camarajlla captinpis, achic-achicyaycaj curünanta ushtucurcurraj aywananta munaran. Warmin camarajlla cashantaga llapan mayur runacuna ricaycunanta munaran. 12 Vastiga «Mandaj Asuero jayaycäshunqui» niptinpis, manash aywashachu. Mana wiyacushachu. Mana wiyacuptinga, mandaj Asuero juyupash ullgucäcuran. 13 Ullguyllawan jayachisha papil ruraj mincaynincunata. Mandaj Asueruga imatapis rurananpaj tapucunyaj papil rurajcunataraj. 14 Mandaj Asueruta willapaj papil rurajcunaga caran Carsena, Setar, Admata, Tarsis, Meres, Marsena, Memucán. 15 Chaura papil rurajnincunata jayarcachir, Asuero tapuran: «Taytacuna, ¿imataraj rurashuwan mana wiyacuj Vastiwan? ¿Imanintaj papil?» nir.

16 Chaura papil ruraj-masincuna jutucaptin, Memucán niran: «Tayta Asuero, mama Vasti llutantam rurasha. Majan jayaycächiptin, mana wiyacushachu. Marcayquicunapa auturdänincunatapis pingaymanmi ćhuraycan. 17 Mama Vasti majanta mana wiyacushanta musyarga, llapan warmicunam majanta mana wiyacungapächu: ‹Mama Vasti-jina nuwanchisi ama wiyacushunchu› nir. 18 Cananga Persia mandajcunapa warmincuna, Media mandajcunapa warmincuna majanwan piñanacuyta jallaycäringa. Majancuna mandaj caycaptinpis, pampamanmi ćhuranga. 19 Tayta Asuero, chaynuy mana cananta munaptiqui, juc papilta isquirbishun: ‹Cananpitaga mama Vasti imaysi amana aywachunnachu mandaj Asueruman› nir. Vastita jargurinquimanna. Jinarcur wiyacuj warmiwan majachacanquiman. 20 Isquirbishanchi papilta musyachishun llapan marcayquicunaman. Vastita jargushayquita musyarga, llapan warmicunanam majanwan alli juyanga. Mana apäringachu.»

21 Yarpay-sapa Memucánpa shiminga mandaj Asuerupa shungunman tincuran. Waquin mayur runacunapa shungunmanpis tincuran. Memucán rimashanta mandaj Asueruga papilman isquirbichiran. 22 Isquirbiraycachir, llapan marcancunaman apachiran. Llapan marcacunapa rimayninćhu-caman niran: «Warmicunaga runanpa maquinćhümi canan» nir.