Rut
Wasinpa Elimelec Moab marcaman aywacushan
1
1-2 Unay Israel marcaćhu mayur runacunalla Israel-masincunata maquinćhu purichiran.a Chay wichanshi mućhuy caycaran. Chaura mućhuy captin, Judá quinran Belén marcapita «Elimelec» jutiyuj runa jucläpa juyaj ashucuran. Moab marcaman aywar, ishcay ullgu wamran Mahlóntawan Quiliónta, warmin Noemítapis pushacuran. Llapanpis caran Belén marca «Efrata» nishan casta runacuna. Ćhuscun aywacur, Moab marcaćhu juyäcuran.3 Chayćhu juyaycaptin, Noemípa runan wañucuran. Wañucuptin, ishcay wamrallanwan Noemí wañupacush ricacuran. 4 Jipataräshi ullgu wamrancuna Moab marca warmicunawan majachacaran. Juc warmipa jutin caran «Orfa», juc-cajpana «Rut.»
Chay marcaćhu ćhunca wata-ima juyaycaptinna, 5 Mahlónpis, Quiliónpis wañucuran. Wamrancuna wañuptin, Noemí yapay wacchayash ricacuran. Majanpis, wamrancunapis mana carannachu.
Llumchuynin Rutwan Noemí Belén marcaman cuticushan
6 Moab marcaćhu juyaycaptin, juc rimay Noemípa rinrinman ćhayaran. Runacuna nipäcuran: «Acracushan runacunata Tayta Dios llaquipaycanshi. Murupacuynincunata wayuchiptin, micuycunata tarichiranshi.» 7 Chayta wiyarshi, ishcan llumchuyninwan Noemí camaricuran marcanman cuticunanpaj.
Aywacurcaycashanćhünash llumchuynincunata Noemí niran: 8 «Mamayquiman-caman cuticäriptiqui, alli canman. Wamrantïta llaquipämashayqui-jina Tayta Diosninchipis imaypis llaquipayculläshunquipaj. 9 Alli juyänayquipäpis, juc runata tariycachilläshunquipaj.»
Chaynuy wamayashpan, llumchuynincunata mucharan wasinman-caman cuticärinanpaj. Llumchuynincunana icchuypa wagashpan, niran: 10 «Mama, manam cuticärïmanchu. Marcayquimanmi aywacärishun, ari.»
11 Noemína niran: «Mamachallau mamacha, cuticäriy, ari. ¿Imapänataj aywäshimanqui? Ashishunayquipäga, ¿yapay wamracunata jishyacushächuraj? 12 Mananam. Chaypitam wasiquiman cuticärinquiman. Nuwaga chacwanyashcänam. Manam yapapacushänachu. Canan chacay juc runawan majacharcur puñucuptïsi, wamräcunata jishyacuptïsi, 13 ¿pugushancaman shuyanquimanchuraj? ¿Chaycaman runaynajllaga cacunquimanchuraj? Manam. Wawallau, chayga mana camacanchu. Ticrapamashpan, llaquicuymanmi Tayta Diosninchi ćhuramasha. Jamcunapis llaquish juyaycaptiquiga, llaquir ushyash juyämanćhi.»
14 Chaynuy niptin, yapayna icchuypa icchur, wagapäcuran. Wamayashpan mucharcurna, Orfa niran: «Aywallä, mama.» Chaypita wasinpa cuticuran. Rutshi ichanga Noemíta mana jaguiranchu. 15 Chayshi Noemí niran: «Rut, mä, ricay. Llumchuy-masiqui Orfa wasinmanpis, manchapacushan jircacunamanpis cuticuycan. ¿Manachu jampis cuticunqui?»
16 Rutna niran: «Ama jargumaychu. Ama cutichimaychu. Aywashayquipam aywashaj. Marcayquićhümi juyäcushun. Marca-masiquicunawanmi yaćhacäshaj. Manchapacushayqui Taytayquimanmi yupachicushaj. 17 Wañushayqui pachaćhümi nuwapis wañushaj. Jinallanćhu pampamächun. Jamta jaguiriycur aywacuptï, Tayta Diosninchi juyupa wascaycamächun. Wañurrämi raquicäshunpaj.»
18 Rut mana imanaypapis jaguiriyta munaptin, Noemí mana imatapis rimarannachu. 19 Manchäga Belén marcacaman ishcan aywacuran.
Belén marcaman ćhayashanta mayar, llapan marca-masincuna cushicuran. Warmicunana willanacäriran: «Noemí cuticamushanash» nir.
20 Noemíshi ichanga niran: «Ama ‹Noemí› nimaynachu. Llapanpaj munayniyuj Tayta Diosninchiga juyupa llaquicuymanmi ćhuramasha. Cananpita-pacha: ‹Mara› nimanquiman.b 21 Caypita aywacuptï, mana imasi pishïmaranchu. Tayta Diosninchi cutichimarmi ichanga, wacchayashta cutichimasha. Tayta Diosninchi tincupämar, ñacachimaptin, «¿imapäraj ‹Noemí› nimanqui?»
22 Chaynuyshi Moab marcapita llumchuynin Rutwan Noemí cuticuran. Sibäda rutuy jallarinan quillanćhüshi Belén marcaman ćhayaran.