2 Juc junajshi Noemípa llumchuynin niran: «Mama, sibäda rutuycashan ćhacraman aywaptï, ¿allichu canman? Rutujcuna aunimaptin, caćhapacushan sibädata shuntapacüman.»

Noemína niran: «Yä. Ayway, ari.»

3 Chaura «Ayway» niptinshi, Rut sibäda shuntapacuj aywaran. Pipa ćhacran cashanta mana musyaycarsi, Boozpa ćhacramanshi ćhayash caran. Payga Elimelecpa yawar-masin caran. Chay ćhacraćhu runa ruturcaycaptinshi, caćhapacushanta shuntapacuran. 4 Shuntapacuycaptinshi, Belén marcapita Booz ćhayamuran. Llapan rutüshijnincunata wamayaran: «¿Jaucallächu? ¿Allichu carcaycanqui? Tayta Diosninchi yanapayculläshunqui» nir.

Rutüshijnincunana niran: «Au. Jamtapis Tayta Diosninchi yanapayculläshunqui, ari.»

5 Nircur, rutüshijnincunapa capuralninta tapucuran: «¿Pipa wamrantaj tagay jipash?» nir.

6 Capuralninna niran: «Moab marcapita Noemíwan shamuj jipashshi. 7 Ćhayamur, tapumasha: ‹Tayta, sibäda rutujcuna caćhapacushallantash mañacushayqui› nir. Auniptï, tutapita-pacham shuntapacuycan. Cananraj llantupärillar, llantucusha.»

8 Chaura Rutman aywar, Booz niran: «Mamachallau mamacha, wiyaycallämay, ari. Jucpa ćhacraman shuntapacuj ama aywanquimanchu. Uywaynï jipashcunapita ama witicunquimanchu. 9 Rutüshijnïcuna mayninpa rutuycaptinpis, jipashcuna shuntaycashallanpa shuntapacunquiman. Rutüshij müsucunata piñapashcäna mana turyapäshunayquipaj. Yacunay charishuptiqui, püsupita jurgamushan yacuta upunquiman. Puyñucunaman tacshish caycan.»

10 Sumaj manchapacushpan, Rut jungurpacuycuran. Boozta tapuran: «Jäpa warmi caycaptï, ¿imanirtaj llaquipaycamanqui?»

11 Boozna niran: «Runayqui wañushanpita-pacha mamanta alli ricashayquita willapämasha. Marcayquitapis, mamayqui-taytayquitapis jaguiriycur shamushayquita wiyashcä. Marcäta mana ricsishcanquichu. Jampäga jäpa runacuna carcaycä. 12 Llapan alli rurashayquicunapita Tayta Diosninchi unyayquita cutiycachilläshunqui. Israel-masintï manchapacushä Tayta Diosninchiman jillicushcanqui. Paymi washäshunquipaj. Alli rurashayquiman-tupum yanapayculläshunqui.»

13 Chaura Rut niran: «Tayta, ima allish alli ñawiquipa ricamashcanqui. Sumaj shacyächimashcanqui. Mana uywayniqui caycaptïsi, alli shimillayquipa parlapamashcanqui.»

14 Chaura mirinday üra ćhayamuptin, Booz niran: «Rut, mä, shacallämuy. Ñawipallanwan tantata miculläshun.»

Chaynuy jayaptin, arupacujcunawan jamacuycuran. Boozna rïgu camchatapis jararan. Sacsashancamanshi Rut micucuran. Jarashanpis puchusharäshi.

15 Micuyta ushyarcur, Rut yapay shuntapacuycaycaptin, rutüshijnincunata Booz niran: «Sibäda wancuraycashan pachaćhu shuntapacuptinsi, chay jipashta ama mićhanquichu. Ama rimapanquipishchu. 16 Manchäga aptarashayquipitasi jina shicwacuchun shuntacunanpaj.»

17 Chaura Boozpa ćhacrallanćhu inti jigarpushancaman Rut shuntapacuran. Shuntapacushanta wipyaptin, ishcay arübanuy llucshiran. 18 Chayta jipicurcur, wasinman cuticuran. Ćhayaycur, maman Noemíta ricachiran. Quishacushantapis jararan.

19 Chaura achcata ćhayachiptin, Noemí tapuran: «¿Pipa ćhacranćhütaj shuntapacamushcanqui? ¿Mayćhütaj arupacamushcanqui? Llaquipäshushayqui runata Tayta Diosninchi yanapaycullächun, ari.»

Chaynuy niptin, Rut niran: « ‹Booz› jutiyuj runapa ćhacranćhümi shuntapacamushcä.»

20 Noemína niran: «Chay runata Tayta Diosninchi yanapaycullächun. Taytanchiga wañushcunatasi manam junganchu. Llaquipämashpanchim, nuwanchitapis yanapaycämanchi. Jananmanpis chay runaga castanchiraj. Shuntamashpanchi washämänanchi camacanmi.»

21 Wajta Moab marcapita shamuj Rutna niran: «Quiquinmi nimasha: ‹Jucpa ćhacranman ama aywanquichu. Rutupacuy ushyacänancaman arüshimajnïcunata arüshiy.»

22 Chaynuy niptin, Noemí llumchuyninta niran: «Wawallau wawa, uywashan jipashcunallawan shuntapacuptiqui, alli canman. Jucpa ćhacranman aywaptiqui, pillapis turaypäshunquimanćhi.»

23 Chaynuy niptin, rïguwan sibäda rutuy ushyacänancaman Boozpa ćhacrallanćhu Rut shuntapacuran. Boozpa uywashan jipashcunallata shuntapacäshiran. Maman Noemíllawanraj juyaycaran.