Booz llaquipäcuj cashan
3
Juc junajćhüshi llumchuyninta Noemí niran: «Mamachallau mamacha, jipashllaraj caycar, runaynajllaga manam cacunquimanchu. Cushish juyänayquipaj, majata ashipashayqui. 2 ¿Booztachu ashipaycujman? Payga majäpa castanmi. Uywashan jipashcunawan shuntapacushcanqui, ¿manachu? Canan chacay ïranmanshi sibäda wayraj aywangapaj. Jampis aywapunquiman. 3 Mä, sumaj wiyamay. Sumaj armacunquiman. Pirjümiwan pićhucunquiman. Allicaj müdanayquita ushtucunquiman. Ïraman ćhayaycur, Booz micuyta, upuyta ushyashancaman pacaräcunqui. 4 Mayćhu puñushantam ichanga sumaj ricanqui. Sumaj puñucäcuptin, puchunta aćhircur, jaytacunman puñucuycunqui. Payga majachacayta munarmi, imatapis nishunquipaj.»5 Rutna niran: «Yä. Nimashayquinuyllam llapanta ćharcushaj.»
6-7 Chaura sumaj camaricurcur, pacha chacaycaptinna, Rut ïraman aywaran. Ćhayaycur, pacacuycuran. Pacaraycaptin, Booz cushish micucurcur, upucurcur, sibäda juturaycashallanćhu puñucäcuran. Puñucuycaptinna, yaćhayllapa jaytacunman Rut puñucuycuran.
8-9 Pullan pagas Booz ricchapacamur ticrapacurishanćhu, jaytacunćhu warmi puñuycajta mayaran. Mancharishpan tapuran: «¿Pitaj canqui?» nir.
Rutna niran: «Rutmi cä. Maquiquićhümi caycä. Wañuj majäpa yawar-masinmi canqui. Chaymi shuntamashpayqui washämänayqui camacan. Ashimänayquitam munä.»
10 Cushicushpan, Boozna niran: «Wawallau wawa, Tayta Diosninchi yanapayculläshunqui, ari. Waquin warmicuna wañupacush caycar, mayna shullcacaj runata ashinman caran. Pishipacuj runa captinsi, jinay-jinayyuj runa captinsi, mayna majachacanman caran. Jammi ichanga, wañucuj majayquita sumaj llaquir, japallayqui cacushcanqui.
11 «Wawallau wawa, ama llutäpacunquimanchu. Alli warmi cashayquitaga llapan marca-masïmi musyan. Llapan mañacamashayquita camacächishaj. 12 Ichanga shuyaycushunraj. Wañucuj runayquipa yawar-masin caycaptïsi, jucrämi caycan. Paymi shuntashushpayqui washäshunquiman. 13 Ima captinpis, cayllaćhu puñunqui. Wararämi musyashunpaj. Washäshunayquita munaptin, alli canman. Warminpaj shuntashunquiman. Mana munaptinmi ichanga, washäshayquipaj. Warmïpaj shuntashayquim. Tayta Diosninchipa ricay ñawinćhümi auniycaj. Cananga pacha warashancaman cayllaćhu puñunqui.»
14 Chaynuy niptin, tutacaman Boozpa jaytacullanćhu Rut puñucuran. «Wayrashä ïraman warmi yaycamushanta pipis ama musyanmanchu» Booz tantiyachish caycaptinshi ichanga, chaca-chacallana jatariran.
15 Aywacunanpaj camaricuycaycaptinna, Booz niran: «Jacuyquita mashtay.» Jacunta mashtapaptinna, ishcay arübatanuy sibädata tacshiparan. Jipicurcurna, wasinpa Rut cuticuran.
16 Wasinman ćhayaptin, maman Noemí tapuran: «¿Imanuytaj warashcanqui?» nir.
Tapuptin, Booz nishanta willaparan. 17 Janamanpis: «¿Imanuypataj mamayquiman jinayllaga cutinqui?» nir, cay sibädata tacshipämaran.
18 Chaura Noemí niran: «Wawallau, ama llutäpacunquinachu. Shuyaycushun. ¿Mä, imanuyshi canga? Chay runa shiminta mana ćharcushancamanga jamaytasi manam taringapächu.»