Boozwan Rut majachacashan
4
Chaura Rut aywacuriptin, Boozpis marcanman cuticuran. Ćhayar, mayur runacuna shuntacashanman aywaran. Jamaraycaptinnash, Rutpa wañuj runanpa yawar-masinpis ćhayamuran. Paypäshi Booz nish caran: «Jucrämi caycan. Paymi shuntashushpayqui washäshunquiman» nir. Chaura payta ricar, Booz niran: «Jamapärishun, tayta.» Chaynuy niptin, änir, jamäshiran. 2 Nircur, ćhunca mayur runata Booz jayachiran: «Taytacuna, jamaculläshun, ari» nir. Llapan jamacuycuptin, 3 Rutta washänan runata Booz niran: «Cay mayur runacunapa ñaupanćhu willashayqui. Moab quinranpita cutimuj Noemíga ćhacranta ranticuyta munaycan. Chay ćhacraga yawar-masinchi Elimelecpami. 4 Ćhacranta rantinayqui camacan. Rantiyta munarga, rantiy. Mana munarga, mä, nimay. Nuwapis Elimelecpa yawar-masinmi caycä. Rantinäpis camacan.»Chaura chay runa jucllana auniran: «Yä. Rantiypa shuntashämi.»
5 Boozna niran: «Ćhacranta rantirga, Noemípa llumchuynin Ruttapis shuntanayqui. Payga wañupacush caycar, Moab marcapita shamuran. Paywan majachacaptiqui, wamran yuriptin, wañuj majanpa wamranmi cangapaj. Rantishayqui ćhacrapis chay wamrapämi cangapaj.»
6 Chayta wiyarna, jucnin niran: «Rantinä caycaptinsi, manam rantïmanchu. Quiquïpa wamräcunallapämi imäcunapis aypanman. Rutpa wamranpis yuriptin, imäcunasi manam aypangapänachu. Chaura jampis yawar-masin caycarga, ranticurcuy, ari. Ima chapatapis manam rurapashayquichu.»
7 Chaura chay wichan Israel marcacunaćhu pipis dirïchunta jucta juyta munarga, llanguinta llushtircur, juycuj. Chaynuy ruraj llapan runapa ricay ñawinćhu dirïchunta jucta juycushanta musyapäcunapaj. Chaura chay runapis auquilluncuna yaćhacashannuylla ruraran. 8 Shuntashpan washänan camacaptinsi, jucnin llanguinta llushtircur, Boozta juycuran: «Jamnam Noemípa ćhacranta rantiy, ari» nir.
9 Chaynuy niptin, juturaycaj runacunatawan mayur runacunata Booz niran: «Ricay ñawiquićhümi Noemípa ćhacranta rantishcä. Wañuj majan Elimelecpa ćhacranta, wamran Quiliónpawan Mahlónpa ćhacranta ranticaycamashanta musyanquinam. 10 Moab marcapita shamuj Rutwan majachacashätapis musyanquinam. Payga wañushcaj Mahlónpa warmin caran. Rutpa wamran yuriptinpis, marcanchićhüga wañuj papänin Mahlónpa jutin manam imaysi jungacangapächu. Llapaniquinam musyaraycanqui. Ricay ñawiyquićhümi llapanta camacächishcä.»
11 Chaura juturaycajcunapis, mayur runacunapis juc shimilla nipäcuran: «Au. Cananpita-pacha musyarcaycäna. Imaćhüpis Tayta Diosninchi yanapayculläshunqui, ari. Unay auquillunchi Jacobpa warmincuna Raquelpawan Leapa wamrancuna achcaj cashan-jina wamrayquipis achcajmi caycullächun. Paycunapitam llapanchi Israel runacuna carcaycanchi. Cananpita-pacha Efrata quinran marca-masiquicuna alliman ćhurayculläshunqui, ari. Belén marcaćhüpis alli ñawinpa ricayculläshayqui. 12 Tayta Diosninchi camacächiyninpa warmiquićhu wamrayquicuna caycullächun. Auquillunchi Judápa wamran Farespa wamrancuna alli ricash cashan-jina wamrayquicunapis alli ricash caycullächun. Judápis llumchuynin Tamarćhu wamran Faresta churiyäcuran.»
13 Chaynuypash Rutwan Booz majachacaran. Majachacash caycaptin, Tayta Diosninchi camacächiyninpa Rut jishyaj ricacuran. Quillanćhünash ullguta jishyacuran.
14 Chaura Noemípa willcanta ricar, warmicuna cushish nipäcuran: «Tayta Diosninchita alliman ćhurayculläshun. Paymi willcayquita tarichishcashunqui. Willcayquiga shuntashushpayqui, washäshunquipaj. Llapan Israel runacunapis willcayquita alli ñawinpa ricaptin, alli canman. 15 Chacwanyaptiquipis, shunguyquita achicyacächingapaj. Ricashunquipäpis. Llumchuyniqui sumaj llaquipäshushayquimanga, janćhis ullgu wamrasi manam tincunmanchu.»
16 Noemína willcanta margacuran. Cushish uywaranpis. 17 Yanasancunana niran: «Mä, ricay. Noemí mallwayujnam.» Jutintapis ćhuraparan «Obed» nir.
Obedga Jesépa taytan caran. Mandaj Davidpa auquillun caran.
Mandaj Davidpa auquilluncuna
18 Davidpa unay auquilluncunata ricsicushun:
Fares churiyäcuran Hesrónta.
19 Hesrónna churiyäcuran Ramta.
Ramna churiyäcuran Aminadabta.
20 Aminadabna churiyäcuran Nahasónta.
Nahasónna churiyäcuran Salmónta.
21 Salmónna churiyäcuran Boozta.
Boozna churiyäcuran Obedta.
22 Obedna churiyäcuran Jeséta.
Jeséna mandaj Davidpa papänin caran.