Mandaj Asueruwan Ester majachacashan
2
Chaura ulluguynin jasacäriptinga, mandaj Asuero yarpäriran mana wiyacushanpita mama Vastita jargurishanta. 2 Mandu-rurajnincunaga mandaj Asueruta niran: «Munaptiquiga, tayta Asuero, sumaj camarajlla, runa rijsïni jipashcunata ashishun. 3 Mandu-rurajniquicunata mincacuy llapan marcayquicunapita runa yatäni jishpashcunata shuntamunanpaj. Jinarcur cay Susa marcayquiman pushamuchun. Cayćhüga warmiquicuna täpaj chicla Hegaipa maquinman ćhurachun. Payga jishpacuna achic-achicyaycaj müdanan ushtucunapaj yanapächun. Alli müdanacunata watapächun. 4 Chay-chicaj jipashcunapita mas camarajninta acranqui mama Vastipa rucan cananpaj.» Chaynuy niptinga, tantiyachishannuylla mandaj Asuero rurarachiran. 5 Chay wichanga Susa marcaćhu tiyaran Mardoqueo. Pay caran Judea quinranpita, Benjamínpa castan Israel runam. Auquilluncunam caran Jair, Sime, Cis. 6 Mardoqueutaga Israel-masintinta mandajnin Jeconíasta-ima Jerusalén marcanpita ñacachiräcur Babilonia marcaman aparan mandaj Nabucodonosor. 7 Mardoqueuga waccha captin, tiyunpa wamranta wamrachacuran. Chay wamrapa jutin caran hebreo rimayćhu «Hadasa»; Persia rimayćhu ichanga «Ester» niran. Esterga camarajlla jipash caran.
8 Chauraga mandaj Asuerupa shiminta rurar, llapan marcacunapita camarajlla jipashcunata pushamuran Susa marcaćhu mandajpa wasinman. Chay-chicaj camarajnin jipashcunata shuntarcamur, mandajpa warmicuna täpaj chicla Hegaipa maquinman ćhuraran. Estertapis mandajpa wasinman pushananpaj acraran. 9 Chicla Hegaiga Ester camrajlla jipash captin, sumaj cushicuran. Alli ñawinpa ricar, alli pirjümicunata camapuran. Allicaj micuycunallata jararan. Pachächishasi allinnin wasiman. Janćhis yanasancunaraj yanaparan Estertaga.
10 Esterga mana willacuranchu may marcan cashantapis, pï castan cashantapis. Llapantapis ruraran taytan Mardoqueupa shiminta wiyacushpan. 11 Chaura jipashcuna juturashan wasićhu Ester juyaptin, taytan Mardoqueuga waran-waran aywaran imanuy caycashantapis musyananpaj.
12 Chaura mandaj acrananpaj aywananpäga jipashcuna camaricuran juc wataraj. Jajllancuna llulluypa llulluycänanpaj wirawan cupacujraj. Sujta quilla cupacuran pirjümi jaćhapa wiguinwan. Juccaj sujta quillam cupacuran jaracuj pirjümicunawan. Juc wata chullpacuriycurraj juc-juclla jipashcuna yaycapuran mandaj Asueruta. 13 Mandajman aywananpäga jipashcuna mañacuj chicla runacuna müdanancunata camapänanpaj. Achic-achicyaycar aywananpaj alli müdanata ushtucuj. 14 Chaura mandaj Asuero jayachiptinga, chacayllapa jipashcuna aywapuran. Pacha wararcuptinnaga, mandajpa warmincuna juyashan wasimanna aywacuj. Chay wasipitaga maygan warmipis mandajman mananam cutirannachu. Jayachinantaraj shuyararan. Chaura chay warmicunata juc chicla runa täparan. Chay runapam jutin caran Saasgaz.
15 Chaypitaga ćhayamuranna Esterpis mandajman yaycunan chacay. Esterga jipashcuna täpaj chicla runacunata imatapis mana mañacuranchu; manchäga quiquin chicla runa Hegai müdanancunata ushtuparan. Estertaga pï-maypis alli ricaran. 16 Chaura Estertaga sumaj watapariycur, mandaj Asueruman pusharan. Chay quillaga janćhis wata, ćhunca quillanna Persia marcacunata-ima Asuero mandaycaran. Ushyaj diciembre quillaćhu Esterta mandajman pusharan. 17 Esterta ricarga, mandaj Asuero sumaj cuyaran. Estermanga camaraj caypa maygan jipashpis mana tincuranchu. Cuyayllawan achic-achicyaycaj curünatapis ushtuparcuran Vastipa rucan mama warmi cananpaj. 18 Chaypitaga ruraran jatun tünata mama Esterpa jutinćhu. Tünaman shuntachisha llapan mincaynincunata, llapan mayur runacunata. Cushicuyllawan llapan marcaćhu impuistuta alläpa cubraycashanćhu yauyachisha. Tucuy-niraj cuyachicuynincunatapis llapan jurpanta jusha.
Mandajta wañuchinanpaj yarpaycaptin, Mardoqueo pashtapacushan
19 Chaypita unayllataga mandaj Asuerupaj jipashcunata yapay shuntaycaptin, mandajpa wasin puncućhu Mardoqueo jamaraycaran. 20 Mandajwan juyaycarsi, mama Esterga mana willacuranchu Judea marcapita cashantapis, Israel casta cashantapis. Chayta ruraran taytan Mardoqueupa shiminta wiyacushpan. 21 Chaura wasi puncućhu jamaraycashanćhu Mardoqueo wiyaran mandajta ishcaj täpajcuna pacayllapa parlanacuycajta. Täpacujcunapa jutin caran Bigtán, jucninpana Teres. Paycunaga juyupa ullgur, quiquin mandaj Asueruta wañuycachinanpaj parlanacuycasha. 22 Parlanacuycajta wiyaycurga, Mardoqueo willaycuran mama Esterta. Esterna mandaj Asueruta willacuran: «Mardoqueumi willamasha» nir. 23 Chaynuy willaptin, mandaj Asuero sumaj tapucaćharan. Tapucaćhaycashanćhu musyaran rasunpa parlanacushanta. Chayta musyaycur, Bigtántawan Teresta matiypa wañuycachiran. Jinarcurga isquirbichiran acta librunman mana jungacänanpaj.