Juyu Amán llapan Israelcunata wañuchiyta yarpashan
3
Chaura llapan unaypaptinnaga, mandaj Asuero ćhuraran llapanta mandananpaj Amánta. Amánpa päpänin caran Hamedata; auquillunna Agag. Llapan mincaynincunata mandananpaj ćhuraran. 2 Mandajpa mayur mandu-rurajnin captinga, waquin mincaycuna Amánpa ñaupanman jungurpacuran. Manchapacuran. Amánta llapan manchapacunanpaj quiquin Asuerum willachiran. Mardoqueumi ichanga mandajpa mincaynin caycarpis, mana manchapacuranchu. Mana taytachacuranchu. 3 Mardoqueo mana wiyacuptinga, mandu-rurajcuna-masincuna tapuran: «Tayta Mardoqueo, ¿imanirtaj mandaj shiminta mana wiyacunquichu?» nir. 4 Waran-waran tapuran. Tapuptinsi, mana rimacujchu. Chaymi tapujcunaga Amánta willaran: «Tayta Amán, ¿imanirtaj chay Mardoqueo mana manchapacushunquichu? Juyu ñawinwan ricashunqui ¿au?» nir. Chay wichanga Israel runa cashanta Mardoqueo pashtapacushana caran.
5 Chaura chaypita Amán päsaycaptin, rasunpa Mardoqueuga mana jungurpacuranchu. Mana manchapacuranchu. Chayta ricar, Amánga juyupa ullguran. 6 Ullgur, Mardoqueuta yarparan: «Manam Mardoqueullatachu wascashaj; manchäga llapan Israel runacunatam wañurachishaj» nir.
7 Chaura mandaj Asuero ćhunca ishcaywan (12) watana mandaycaptin, abril quillaćhu surtita jitaran. Waran-waran, quillan-quillan surtita ricaran imay quillapis, imay junajpis Israelcunata wañuchinanta musyananpaj. Surtiga llujshimuran janćhis (7) junaj marzo quillapaj. 8 Chaura wañuchinan junajta acraycur, Amánga nisha mandaj Asueruta: «Tayta Asuero, cay mandashayqui marcacunaćhüga juc casta runacunasi tiyanmi. Paycunga shimiquita manam wiyacunchu; manchäga quiquincuna yarpashallantam ruran. Chay-niraj runacunaga marcayquicunaćhu ama cawachunchu. 9 Tayta Asuero, aunimaptiquiga, rurashun juc papilta mana wiyacuj runacuna wañuchicänanpaj. Shunguyqui auniptinga, quimsa waranga (3,000) fanïga-imata jushayqui yuraj jillayta.»
10 Mañacushanta aunir, mandaj Asueruga sïllunta jurgurcur Amánta ushtuparcuran. Payga caran Hamedatapa wamran, Agagpa willcan. Amánga Israelcunata juyupa chiquipaycaran. 11 Chaura mandajpa jutinćhu imatapis rurananpaj sïllunta juycurga, mandaj Asuero niran: «Tayta Amán, allitam yarpashcanqui. Cananga jutïćhu yarpashayquita ruray. Jillayniquim ichanga quiquiquipaj cacuchun.»
12 Chaura Amánga juclla papilta isquirbij runacunata jayarcachir, Israel runacunata illarachinanpaj papilta isquirbichisha. Llapan mandajcuna sumaj tantiyananpaj quiquincunapa rimayninćhu-caman isquirbichisha. Jinarcur mandaj Asuerupa jutinćhu sïlluran llapan auturdäcunaman apachinanpaj. Aypuran Susa marcaćhüpis, llapan Persia marcacunaćhüpis. Amánga chaycunata rurachiran ćhunca janćhiswan (17) junaj abril quillallaćhu. 13 Mushuj papilta ruracaycärirga, Israelcunata wañuchinanpaj llapan marcacunaman apachiran. Papilćhu niran: «Llapan Israel runacunata wañuchiy juc junajllaćhu. Juctapis ama jaguinquichu. Llapan auquin Israelcunatasi, llapan müsu Israelcunatasi, llapan Israel warmicunatasi, llapan Israel mallwacunatapis wañurachinqui. Llapanta wañuraycachir, imancunatapis shuntanqui quiquiquicunapaj. Israelcunata wañurachinqui cay wata janćhis (7) junaj marzo quillallaćhu.» 14 Chaura may-chayćhüsi wañurachinanpaj camaricushalla caycänanpaj papil isquirbishanta llapan marcacunaman musyachiran. 15 Carta apajcunaga mandaj Asuerupa shiminwan papil isquirbishanta llapan marcacunaman juclla ćhayachiran. Jinan Susa marcaćhüsi musyachiptin, llapan runa juyupa llaquicuycaran. Amánmi ichanga, quiquin mandaj Asueruwan cushisha upyapäcuran.