Israelcuna ayunashan
4
Chaura wañuchinanta mayar Mardoqueupis juyupa llaquicusha. Llaquicur müdananta ushyajpaj raćhisha. Nircur llachapa müdanata ushtucusha. Ućhpata umanman jaycucusha. Jinarcurga wiguinsi shutuycaptin, japaraycar cüricaćhasha intïru Susa marcaćhu llaquicushanta llapan runacuna musyananpaj. 2 Japaraycar ćhayasha mandaj Asuerupa sawan puncuncaman. Llaquish runaga mandajpa wasi puncuman «Ama ćhayangachu» niycaptinpis, aywaran. 3 Marcan-marcan Israel runacunata wañuchinanta papil rimaptin, llapan runa juyupa llaquicuran. Llapan Israel runacuna wagaran. Llaquicuran. Ataran. Llaquicushan musyacänanpaj mana micuranchu. Ayunaran. Llachapa müdanacunata ushtucuran. Ućhpacunata umanman jaycucuran. Pampacunallaćhu puñuranpis. 4 Mardoqueo llaquish purishanta ricar, mincaynin jipashcuna mama Esterta willaycuran. Willaptinga, llaquipar apachiran alli müdanata Mardoqueo ushtucunanpaj. Mardoqueumi ichanga mana ćhasquiranchu. 5 Chauraga mincaynin Hatacta Ester caćhacuran: «Mardoqueuga ¿imanirraj llaquicuycan? Mä tapumuy» nir.
6 Caćhacuptinga, Hatac aywaran mandajpa sawan puncunman Mardoqueo tapuj. 7 Hatac tapuptinga, Mardoqueo llapanta willaran. Willaran Israel runacunata wañuchinanpaj Amánga mandaj Asueruman chay-chica jillay jutuy munashanta. 8 Israel runacunata illarachinanpaj papilta Amán isquirbichishantapis apachiran: «Mama Ester mandaj Asueruta mañacuptinga, Israel runacunam manam ushyangachu» nir.
9 Chaura Hatacga Mardoqueo willashancunata llapallanta mama Esterta willaycuran. 10 Llapanta musyachiptinga, Esterpis Hatacwan Mardoqueuta willachiran: 11 «Papä, llapan mincaynincunam, llapan marcancunam musyan mandajpa shungunta. Mandaj mana jayachishancamanga pipis manam ćhayanchu. Jayachinantaraj shuyan. Mandajpa papilnin chaynuy caycashanta musyaycar, yaycujcunataga warmi ullgutapis wañurachinmi. Mana jayaycächiptin yaycush caycaptinsi, mandaj juri garutinwan chay runata tujriptinmi ichanga, manam wañuchinchu. Papä, nuwataga juc quillanam mandaj mana jayachimanrächu.»
12 Chaura Ester rimashantaga Mardoqueuta willachisha. 13 Willachiptinga, Mardoqueupis yapay Esterta willachiran: «Mama Ester, Israel warmi caycaptiquiga, mandajpa wasinćhu tiyaycaptiquipis, manam cawachishunquipächu. 14 Canan junajcuna mandajta mana ruwacuptiquiga, llapan yawar-masinchitam wañuchimäshunpaj. Waquin Israel runacunam ichanga imanayllapis jishpiyta yupachicü. Shungümi willaman. Mama Ester, ¿imanirtaj mandaj Asueruta mana ruwacunquichu? Pitaj musyan Israel runacunata washänayquipaj mama-warmi cayman ćhayashayquita» nir.
15 Chaynuy niptinga, Mardoqueuta Ester willachisha: 16 «Papä, wañuy-cawaymi mandajman aywashaj. Ćhasquimaptinga, cawashämi. Mana ćhasquimaptinmi ichanga, jina wañucushäsi. Ima captinpis, nuwa nishäta ruranqui ari. Susa marcaćhu llapan Israel-masinchicunata shuntaycur, quimsa pagas, quimsa junaj Taytanchita mañacunqui. Ayunanqui. Nuwapis llapan yanasäcunawan mañacushaj. Quimsa pagas, quimsa junajta mañacuriycurga, mandajman yaycushaj.» 17 Chaynuy niptinga, Mardoqueupis Esterpa shiminta wiyacuran.