Mishqui micuyta Ester yanucushan
5
Chaura quimsa junaj mañacaycärirga, alli müdanancunata watacuriycur, mama Ester aywaran. Mandaj Asuerupa wasi puncunćhu ićhiraycaran. Payga achic-achicyaycaj jamacunanćhu jamapaycaran. 2 Mandaj Asueruga wasi puncunćhu Esterta ricar, sumaj cushicuran. Alli ñawinpa ricärir, juri garutinta jugarcur jayaran. Esterna juri garutinta aptacurcur, mandaj Asueruta jagaycuran. 3 Jagaycuptinga, mama Esterta niran: «Mamacha, ¿imanuyllataj caycällanqui? ¿Imataj pishïshunqui? Mañacamaptiquiga, pullantam imäcunatapis raquipaycüman.» 4 Chauraga mandaj Asueruta Ester niran: «Mishqui micuytam yanucushcä. Alli shungu carga, micuj shaycamunquiman. Cuyashpämi yanucushcä. Shaycamunquiman tayta Amánwan ishcaniqui.»
5 Mandaj Asueruga mandu-rurajninta nisha: «Jayapämay Amánta. Ishcanï Ester yanucushanta micuj aywanäpaj.» Chaynuypam mandaj Asueruwan Amán aywaran Ester yanucushanta micuj.
6 Upyapayllapa micuycashanćhu Asuero nisha: «Mama Ester, ¿imallatataj mañacamanqui? Mañacamaptiquiga, llapan imäcunatapis pullantam juycüman.»
7 Esterna nisha: «Tayta Asuero, shungü munashanta willashayqui. 8 Cuyamashpayquiga, wara yapay cutiycamuy ari. Jamta cuyar, yanucushäta micunayquipaj Amán ishcaniqui cutiycallämunquiman. Chayćhürämi mañacushayqui munashätaga.»
9 Chaura chaypitaga cushisha Amán llujshicuran. Cushish aywaycashanćhu ullgucäcuran Maroqueuwan tincur. Mardoqueuga Amánta ricaycarpis, mana manchapacuranchu. Mana wamayaranchu. 10 Ullgusha caycarpis, Amánga mana musyacächiranchu. Wasinman ćhayaycur ichanga, jayachiran warmin Zerestapis, yaćhänacushan runacunatapis. 11 Jayarcachir willaran: «Jinay-jinayyujmi cä. Ullgu wamräcunapis achcam. Mandajpa mayur mandu-rurajninmi cä. 12 Mama Esterpis waquin runacunataga micuchij mana jayachishchu. Nuwallatam jayaycachimasha. ‹Wara junajpis mandaj Asueruwan ishcaniqui cutimunqui› nimasha. 13 Chaypis mandajpa wasi puncunćhu Mardoqueuta ricar juyupa ullgü. Payga manacaj Israel runam.»
14 Chauraga warmin Zereswan rijsinacushan runacuna nisha: «Runa maticunata rurachiy, ari. Rurachiy ćhunca quimsawan (13) ricra altuta. Jinarcur mandajta mañacunqui wara tuta Mardoqueuta matinayquipaj. Matiycachirrämi cushish aywanqui Asueruwan ishcaniqui mama Ester yanucushanta micunayquipaj.» Chaynuy niptinga, Amán sumaj cushicuran. Juclla runa matinata rurachiran.