Mardoqueuta Amán alliman ćhurashan
6
Chaura chay chacayga mandaj Asuero puñuyta mana camäpacuranchu. Sucsutaran. Alläpa sucsutar, unay-unay willapacuna isquirbirashanta liguipunanpaj acta librunta mañacuran. 2 Acta librunta liguipuptin, yarpäriran Mardoqueo washashanta. Yarpärisha Bigtánwan Teres wañuchinanpaj caycaptin, Mardoqueo willashanta. 3 Mardoqueo alli rurashanta wiyar mincaynincunata tapuran: «Mardoqueuga ¿imatataj ćhasquisha allipaj willamashanpita?» nir. Mincaynincuna willaran: «Manam imallatapis ćhasquishchu» nir.
4 Chaura sawan puncuman runa yaycushanta mayar, mincaynincunata tapuran: «¿Pitaj sawan puncućhu caycan?» nir. Chay üraga Amán yaycuycaran sawan puncutana Mardoqueuta matirinanpaj mandajta mañacuj. Matinanpäga mayna camariraycächiran.
5 Chaura mandaj Asuero: «¿Pitaj ćhayamusha?» nir tapuptinga, willaran: «Tayta Amán ćhayamusha» nir. Willaptinga, mandaj Asuero Amánta jayachiran. 6 Jayarcachir, Amánta tapuran: «Tayta, alli ricashä runataga ¿imataraj rurashuwan alliman ćhurananchipaj?» nir.
Chaura shungullanćhu Amán yarpaćhacuran: «Mandajga nuwallatam alli ricaman; juctaga manam» nir. 7 Chaymi niran: «Tayta Asuero, mandaj alli ricashan runapäga 8 mandajpa achic-achicyaycaj müdananta apamuchun. Mandaj muntacunan cawalluta apamuchun. Achic-achicyaycaj cürunata ushtupächun. 9 Jinarcurga mandajpa allinnin micaynincunaraj achic-achicyaycaj müdanata ushtuparcur, intïru läsapa purichimuchun: ‹Alli ricashan runataga mandaj sumajmi alliman ćhuran› nishpan.»
10 Chaura mandaj Asuero niran: «Aman, rimashayquita ruray ari. Müdanäta apamuy. Cawallütasi apamuy. Shimiquita mana jungallar juclla purichimuy Israel runa Mardoqueuta.»
11 Chaura Amánga Mardoqueuta mandajpa müdananta ushtuparcur, cawallunman muntarcachir, purichisha intïru läsapa: «Alli ricashan runataga mandaj alliman ćhuran» nishpan.
12 Intïrupa purichiyta ushyarcuptinga, Mardoqueo cushish cuticuran mandajpa wasin puncuman. Amánmi ichanga pingacush, llaquish wasinman cuticullaran. Pingacuywan jajllanta chapacurcur aywacuran. 13 Wasinman ćhayaycur, willaparan warmin Zerestawan rijsinacushan runacunata. Llapallanta willaparan. Chauraga paycuna nisha: «Mardoqueo pampaman ćhurashuptiquiga manam jampi cannachu. Payga Israel runam. Manam ićhipunquipächu. Wañuymanpis jitarpushunquipämi.» 14 Parlarcaycaptillan, mandajpa mincaynincuna ćhayaran: «Tayta Amán, Ester yanucushanta micuj shamuyna» nir.