Runaman ricchacujta mandaj Nabucodonosor rurachishan
3
Unayshi mandaj Nabucodonosor runaman ricchacujta rurachiran. Runaman ricchacujpa jatun caynin ćhunca pusajwan (18) ricranuyshi caran; racu cayninnash ishcay ricra. Rurayta ushyarcuptin, Babilonia marca quinran «Dura» nishan pampaćhu ićhichiran. 2 Ićhircachiptin, llapan mandäshij auturdäcunata jayachiran: «Taytacuna, shacallämuy. Runaman ricchacujpa ushyayninta rurashun» nir. 3 Chaura llapan mandaj-masincunawan auturdäcuna ćhayamur, mandaj Nabucodonosor rurachishan runaman ricchacujpa ñaupanćhu shuntacaran. 4 Willacujninwanna llapanta wiyacächiypa willacuran: «Taytacuna, may marcapita captiquisi, juc-niraj-juc-niraj rimayta rimaptiquisi, sumaj wiyaycallämay, ari. 5 Tucachincuna wajracunata, quïnacunata, arpacunata tucaptin, llapaniqui jungurpacäriy. Mandajninchi Nabucodonosor juripita rurachishan runaman ricchacujta manchapacäriy. 6 Pipis mana manchapacushpan mana jungurpacuptin, warau-warauyaycaj jurnuman jaycurachish cangapaj» nir.7 Chayshi tucachincuna wajracunatawan quïnacunata pücaptin, arpacunata tucaptin, jinan runacunapis, wajtapita shamuj runacunapis, juc-niraj-juc-niraj rimayta rimajcunapis, llapallan jungurpacaycäriran. Mandaj Nabucodonosor juripita runaman ricchacujta manchapacäriran.
8-9 Israel runacuna mana manchapacushanta mayarshi ichanga, waquin istrïlla tantiyajcuna mandajninman aywaran. Israel runacunata ñauquir niran: «Taytallau tayta, imaypis allilla cawaycullay. 10 Shimiquita willacachimar, nimarayqui: ‹Wajracunata, quïnacunata, arpacunata wagaycamushanta wiyar, jungurpacärir, juripita rurash runaman ricchacujta manchapacäriy.› 11 Jananmanpis nimashcanqui: ‹Pï runapis mana manchapacuptin, mana jungurpacuptinpis, warau-warauyaycaj jurnuman jaycurishaj› nir. 12 Chaypis waquin Israel runacuna upa-tucuycan. Babilonia marcacunata ricäshishushayqui Sadracpis, Mesacpis, Abed-negupis shimiquita mana wiyacäriranchu. Yaya jircacunatapis mana jayararanchu. Juripita rurachishayqui runaman ricchacujtapis manam manchapacäriranchu.»
13 Chayta wiyar, mandaj Nabucodonosor ullgucäcuran. Ullgushpan Sadracta, Mesacta, Abed-neguta apachimuran. Ñaupanman ćhayachimuptin, 14 Sadracta, Mesacta, Abed-neguta tapuran: «Taytacuna, manchapacushä yaya jircacunata, juripita ićhichishä runaman ricchacujta mana manchapacushayquiga rinrïman ćhayamusha. ¿Rasunpachu? 15 Chaypis yapay tucachincuna wajracunata, quïnacunata, arpacunata tucashanta wiyar, rurachishä runaman ricchacujpa ñaupanćhu jungurpacuycur manchapacuptiqui, alli canga. Mana manchapacuptiquim ichanga, juclla warau-warauyaycaj jurnuman jaycurachishayquipaj. ¿Piraj maquïpita washäshunquipaj?»
16 Mandaj Nabucodonosor chaynuy niptin, Sadrac, Mesac, Abed-negupis niran: «Taytallau tayta, manam chapacushächu. 17 Munarga, manchapacushä Tayta Dios warau-warauyaycaj jurnupita jishpichimangapaj. Maquiquipita washämangapaj. 18 Mana camacaptinsi, yupachicushayqui jircacunatapis, juripita ićhichishayqui runaman ricchacujtapis manam imaypis manchapacushächu.
19 Chayta wiyar, Nabucodonosor ullgucäcuran. Sadracta, Mesacta, Abed-neguta ullgüpashpan jajllanpis pucayacäcuranraj. Jurnutana wayllaycachiran warau-warauyaycaj cananpaj. Wapyapayllapa sumaj wayllachiran.a 20 Callpa-sapa murucuncunawanna jatirashan müdanantinta Sadracta, Mesacta, Abed-neguta watarcachiran jurnuman jaycurinanpaj. 21 Jacushta, punchushta, chucushta charircur, llapan müdanantinta warau-warauyaycaj jurnuman jaycuriran. 22 Ullgushpan: «Sadracta, Mesacta, Abed-neguta juclla jaycuriy» nish captin, jurnupis warau-warauyaypa rataycaptin, quimsanta jitarpuycaptinna, murucucunatana nina aypar ushyaypa ushyacurcuran. 23 Sadracpis, Mesacpis Abed-negupis watash warau-warauyaycaj jurnu ruriman shicwacuran.
24-25 Ricaycashanćhüna mandaj Nabucodonosor mancharicäcuran. Yaćhaj runacunata niran: «Aćhaćhau. ¿Manachu jurnuman quimsa watash runata jitarpuycushcanchi?»
Yaćhajcuna: «Aumi, tayta» niptinna, Nabucodonosor niran: «Mä, ricay. Ratataycaj ninaćhu ćhuscujta ricaycä. Caćhayllana purircaycan. Ninapis mana rupanchu. Jucmi ichanga anjil-niraj caycan.» 26 Chaynuy nircur, warau-warauyaycaj jurnupa puncunman ashurcur, jayacuran: «Sadrac, Mesac, Abed-nego, mä, llucshiramuy. Shamuyna. Llapanta Camaj Tayta Diosniquipa maquinćhu cawashayquita musyänam.» Chaynuy jayacuptin, änir, Sadrac, Mesac, Abed-negupis ratataycaj ninapita llucshiramuran. 27 Llucshircamuptin, mandajpa mayur mandäshijnincuna quićhquipayparaj jutucarcäriran. Nina mana rupashanta ricaran. Ricaptin, ajchancunallapis manash jashpashchu caycaran. Müdananpis cashgallanshi caran. Jushni-jushnillasi mana asyaranpishchu. 28 Chaynuy carcaycaptin, mandaj Nabucodonosor Tayta Diosninchita alliman ćhurashpan niran:
«Sadracpa, Mesacpa, Abed-negupa manchapacushan Tayta Diosnin alli ricash caycullächun. Quimsanin manchapacuptin, janaj pachapita anjilninta caćhacamusha washänanpaj. Paycuna shimïta mana wiyacuranchu. Wañuytapis mana manchacuranchu. Manchäga Tayta Diosnillanman yupachicäriran.
29 «Chaymi, taytacuna, llapaniqui shimïta wiyaycallämay. Pï runapis, may marcapita captiquisi, ima shimita rimaycaptiquisi, Sadrac, Mesac, Abed-nego manchapacushan Tayta Diosninta pampaman ama ćhuranquimanchu. Pampaman ćhurajtaga raćhicaćhärir wañurachishayqui. Wasiquitapis ushyaypa jućhurachishaj. Paycuna yupachicushan Tayta Diosninpa jishpichicuj cayninmanga maygan yaya jircapis manam tincunchu.» 30 Chaynuy nir, Sadracta, Mesacta, Abed-neguta mayur mandaj cayman ćhuraycuran. Maquinmanna llapan Babilonia quinran marcacunata ćhuraran.