Jatun-caray yüraman mandaj Nabucodonosorta tincuchishan
4
Juc cutishi mandaj Nabucodonosor llapan runata cartacuran:«Taytacuna, llapaniquita wamayä. May marcaćhu juyaptiquisi, juc-niraj-juc-niraj runa captiquisi, juc-niraj-juc-niraj rimayta rimaptiquisi, allilla juyaycullay.
2 Llaquipämashpan Llapanta Camaj Tayta Diosninchi sumaj yanapämasha. Camapämashancunata llapaniquita willaycajna.
3 Payga sumaj munayniyuj cashanta musyachimanchi.
Shungun munashancunata camacächin.
Mandaj cayninga mana imaypis ushyacangapächu.
Maquinćhüpis llapan runacunata imay-imaypis purichingapaj.
4 «Nuwaga, mandaj Nabucodonosor cashpä, wasilläćhu allilla juyäcurä. Puchuy-puchuy jananćhümi cawaycarä. 5 Juc chacaymi ichanga manchacuypämi suyñushcä. Ricaripämashanga sumajmi llutäpacachimasha. 6 Chaymi Babilonia quinran marcacunaćhu llapan yaćhajcunata jayachirä suyñushäta tantiyachimänanpaj. 7 Chaura yaćhajcunapis, ćhajćhacujcunapis, istrïlla tantiyajcunapis, musyapacujcunapis ćhayamuptin, suyñushäta willapashcä. Paycunam ichanga, tantiyaytapis mana atiparanchu. 8 Mana mayganpis tantiyachimayta camäpacuranchu. Chaypitana Danielpis ćhayamuran. Paytaga manchapacushä yaya jircapa jutinta ćhurar, jutichapashcä: ‹Beltsasar› nir. Munayniyuj jircacunapa maquinćhüshi cawan. Chaura ćhayamuptin nirä:
9 ‹Tayta Beltsasar, yarpay-sapa yaćhajmi canqui. Munayniyuj jircacunapa maquinćhümi cawanqui. Pï runapis imatapis tantiyayta mana atipaptinsi, jammi musyanqui. Chaymi suyñushäta tantiyaycachillämay, ari.›
10 «Juc chacay suyñurä. Cay pachapa pupunćhu jatun-caray yüra ićhiraycajta ricarä. 11 Racuyash yüra caycaran. Pucutaycaman wiñaycaptinpis, llapan runapa ricay ñawinćhu ricacaran. 12 Üjacunapis achicyaycämuj. Wayuyninpis shallmallaraj caycaptin, llapan runa micupacärij. Ćhaquinćhu sima uywacuna llantucurcaycaran. Callapancunaćhüna pichuysacuna jishucuran. Llapan uywacunapis yürapa wayuyninta micupäcuj.
13 «Suyñur ricapacuycaptï, janaj pachapita täpaj anjil jigarpaycämusha. 14 Ćhayamur, jayacuypa niran:
‹Yürata sajtariy. Callapancunata muturir muturiy. Üjancunata shipircur-shipircur quipćhuriy. Wayuyninta shillaypa shillariy. Llantupacuj sima uywacuna jishpicärichun. Callapanpita pichuysacunapis jishpir aywacärichun. 15 Tumpun sapintinmi ichanga jinallanćhu cacuchun. Llullu jiwallaćhüna jïru watuwan, brunsi watuwan watapash cachun. Shullaypis ushmachun. Purun ćhacrallaćhu sima uywacunawan micushpan cawachun. 16 Yarpaynïnaj juyäcuchun. Janćhis watacaman sima uywacunapa yarpaynillanwan cawachichun.
17 ‹Imamanpis ćhayananpäga täpaj anjilcuna cashpä, llapanta musyapacachirä. Tayta Diosninchi caćhamushan anjilcuna cashpä, willapäcurä. Llapan runa may-chayćhu juyarpis, Llapanta Camaj Taytanchipa maquinćhu cawashanta tantiyacunman. Maquinćhüga llapan mandajcunatapis purichin. Shungun munashan runataga, pampa runa captinsi, mandaj cayman ćhuranman.›
18 «Mandaj Nabucodonosor cashpä, chayta suyñurä. Canan, tayta Beltsasar, imaman ćhayanätapis tantiyaycachillämay, ari. Maquïćhu cawaj musyapacujcunaga llapanpis suyñushäta tantiyayta mana atipanchu. Jammi ichanga, jircacunapa maquinćhu cawashpayqui, tantiyachimanquiman, ¿au? nir.»
19 Nabucodonosor suyñushanta wiyar, «Beltsasar» jutichapash Daniel upatacäcuran. Sumaj llutäpacuranpis. Chaymi mandaj Nabucodonosor niran: «Tayta Beltsasar, ama llutäpacunquichu. Suyñunïpis, imaman ćhayanäpäpis ama manchachishunquimanchu.» Chaynuy niptin, Beltsasar niran: «Taytallau tayta, suyñushayquiga chiqui runa suyñushan cash captin, alli canman caran. Imaman ćhayanayquipäpis tincupacujcunaman ćhayapacuchun. 20 Ricapacuyniquićhu jatun yürata ricashcanqui. Racu cashpan pucutaycaman wiñaycaptin, may-chayćhüpis juyaptin, runacuna ricacaycaranmi. 21 Yürapa üjancuna achicyaycämuj. Sumaj wayuptin, llapanpis wawanta micupacärij. Ćhaquinćhu sima uywacuna wasichacuj. Callapancunaćhüpis pichuysacuna jishucuj. 22 Mandaj tayta, jammanmi chay yüra tincun. Jatun mandaj caymanmi ćhayashcanqui. Munayniyujmi canqui. Yüra ricacashan-jina llapan runa may-chayćhu juyarpis, manchapacuycäshunqui. Maquiquićhümi llapallanpis cawan. 23 Chaypita täpaj anjil jigarpamujta ricashcanqui. Janaj pachapita caćhamuj ćhayamur, nisha: ‹Yürata sajtariy. Ushyariy. Tumpun sapintinmi ichanga jinallanćhu cacuchun. Llullu jiwaćhu jïru watuwan, brunsi watuwan watapash cachun. Shullaypis ushmachun. Janćhis watacaman purun ćhacrallaćhu sima uywacunawan micushpan cawachun.
24 «Canan, mandaj tayta, suyñushayquita tantiyachishayqui. Imaman ćhayanayquipäpis Llapanta Camaj Taytanchi camacächishanta musyachishayqui. 25 Marcayquipita, wasiquipita jargushunquipämi. Ćhacracunaćhu sima uywacunallawan juyanquipaj. Wäca-jina jiwallata micunquipaj. Shullaytasham waräcunquipaj. Janćhis watacaman chaynuy cawanquipaj. Chayrämi tantiyacunquipaj llapan mandajcuna marcantinpis Tayta Diosninchipa maquinćhu cawashanta. Chayrämi shungun munashan runallata mandaj cayman ćhayachishantapis shunguyquiman ćhayangapaj.
26 «Chaypis: ‹Tumpun sapintin jinallaćhu cacuchun› nishanta wiyashcanqui. Chaymi maquinćhüga Tayta Diosninchi llapan mandajcunatawan marcantinta purichishanta auniptiquiraj, yapay mandaj cayman ćhurashunquipaj.
27 «Taytallau tayta, shimïta wiyacallämay. Juchaćhu arushayquipita juclla wanacuy, ari. Allillata rurar cawanquiman. Llutanta ama ruraynachu. Manchäga ñacayćhu juyajcunata llaquipanquiman. Yanapanquiman. Chayräćhi alli cawayćhu juyanquipaj.»
28 Chaypita mana aycallatana mandaj Nabucodonosorta tantiyachishannuylla änir, ćharcuran. 29 Babilonia marcaćhu ćhunca ishcaywan quilla ćharcuycaptin, jatun wasinćhu Nabucodonosor tumaycaran. 30 Alli-tucushpan niran: «Babilonia marcaga jatun-caray marcam. Cayćhümi wasinpa juyä. Munayniyuj cashpä, quiquïmi rurachishcä. Cuyayllapa marcata ricärir, llapan runapis alli ñawinpa ricamangapaj.»
31 Rimaycaptillanraj, janaj pachapita wiyaycämuran:
«Mandaj Nabucodonosor, wiyamay. Mandaj cayniquiga ćharcushanam. 32 Marcayquipitapis, wasiquipitapis jargushunquipäna. Ćhacracunaćhu sima uywacunallawan juyanquipaj. Wäca micushan-jina jampis jiwallata micunquipaj. Janćhis watacamanmi chaynuy cawanquipaj. Llapan runa may-chayćhu juyarpis, Llapanta Camaj Taytanchipa maquinćhu cawapäcushanta tantiyacunayquiraj. Payga shungun munashan runacunallata mandaj cayman ćhurashanta auninayquiraj.»
33 Chaynuy wiyaycaptin, nishannuyllash ćharcucaran. Runacunapa ricay ñawinpita Nabucodonosor jargush caran. Jiwallata micuran. Shullaytash warämuj. Ancapa lüman chuta wiñashan-jina ajchanpis wiñaran. Pichuysacunapa casha shillun wiñashan-jina shillunpis wiñaran.
34 Chaura janćhis wata ćharcuptinraj, mandaj Nabucodonosor janaj pachaćhu tiyaj Tayta Diosninchiman yupachicuran. Chayräshi yarpayninman cutiran. Llapanta Camajta allimanmi ćhuraran. Manchapacuran. Alli ñawinwan ricar, imaycamanpis cawaycaj Taytanchipita willacuran:
«Mandaj cayninga manam imaypis ushyangapächu.
Mandaj cayninga imay-imaypis cangapaj.
35 Paymanga manam pï runapis tincungapächu.
Cay pachaćhüga ićhipuj runa manam canchu.
Shungun munashanta camacächin.
Janaj pachaćhümi anjilcuna shiminta wiyacun.
Cay pachaćhüpis maquinćhümi runacunata purichin.
Manam pipis ićhipungapächu.
Manam ashipangapäpishchu: ‹¿Imanirtaj chaynuy rurashcanqui?› nir.»
36 «Chaura yarpaynï cashgallan cutiptin, llapan runa alli ñawinpa ricamaran. Taytachacamaran. Yapay mandaj cayman ćhayarä. Mandäshimajcunapis, yanapämajcunapis ashimaran. Maquïćhümi yapayna llapan runacunata purichirä. May-chayćhüpis runacuna sumaj manchapacamaran. 37 Chaypitam Nabucodonosor cashpä, janaj pachaćhu tiyaj Tayta Diosninchita allimanmi ćhuraycä. Payga sumaj munayniyujmi. Alli ñawïwanna ricaycä. Llutancunata mana camacächinchu. Manchäga allillata ruran. Shungun munaptin, alli-tucujcunatapis pingayman ćhayachin.»