Tapyaćhu juc maqui isquirbishan
5
Unayshi «Belsasar» jutiyuj runa mandaj tayta caycashpan, jatun tünata rurachiran. Mayur mandäshijnincunata warangatash jayachiran micupacärinanpäpis, upyapacärinanpäpis. 2 Upyaycashanćhüna mandaj Belsasar sirbintinta niran: «Juri cüpacunatawan jillay cüpacunata aparamuy.» Chay cüpacunata papänin Nabucodonosor Jerusalén marcapita apamush caran. Tayta Diosninchipa wasinman yaycapur, jićhush caran. Chay cüpacunapita mandäshijnincunawan, warmincunawan, chïnancunawan upyayta munaran. 3 Chayshi sirbintincuna Jerusalén marcapita apamushan cüpacunata ćhayachiran. Tayta Diosninchipa wasinpita jićhumushan cüpacunata macyaran. Jaraptin, mayur mandäshijnincunapis, warmincunapis, chïnancunapis, quiquin mandajpis upyapacäriran. 4 Upyapacushpan yaya jircancunata alliman ćhurarcaycaran. Jurillapita rurashta, jillayllapita rurashta, brunsillapita rurashta, jïrullapita rurashta, jirullapita rurashta, rumillapita rurashta manchapacurcaycaran.5 Yaya jircancunata manchapacurcaycaptin, mandaj Belsasarpa wasin tapyaman isquirbiycar runapa maquillan ricarimusha. Achquipa patacninpa lädullanman isquirbiraycaran. Quiquin mandaj Belsasarpis isquirbiycaj maquinta ricaran. 6 Ricärir mancharicäcuptin, jajllanpis yurgacäcuranraj. Sumaj llutäpacush captin, jananpis jutucäcuran. Sicsicyaycashanćhu jungurninpis tacanacuranraj. 7 Japaraypana jayacuran: «Musyapacujcunata, istrïlla tantiyajcunata, ricapacujcunata pushacaramuy» nir. Ćhayachimuptinna, Babilonia marca yaćhajcunata niran: «¿Isquirbiraycashanta liguiyta camäpacunquichu? ¿Imaman ćhayanäpaj cashantapis tantiyachimayta junquichu? Camäpacuptiqui, mayur mandäshimaj cayman ćhurashayquipaj. Mandaj runapa puca müdananta jatipäshayquipaj. Juri piñitapis wallgapäshayquipaj. Mayur mandäshimajpa mandäshijnin cayman ćhurashayquipaj.»
8 Llapan yaćhajcuna mandajpa ñaupanman ćhayaycaptinsi, liguiytapis, tantiyachiytapis manash camäpacuranchu. 9 Chayshi mandaj Belsasar juyupa mancharicäcuran. Yurgacäcushpan pushïcuyacäcuranraj. Mandäshijnincunapis sumaj llutäpacäriran.
10 Chaura llapan mandäshijnintin wamran Belsasar llutäpacärishanga mamanpa rinrinmanpis ćhayaran. Chayshi tünapacushan wasinman aywar, niran: «Taytallau tayta, imaycamanpis allilla cawaycullay. Ama llutäpacunquichu. Jajllayquipis ama yurgacäcunmanchu. 11 Maquiquićhu juc runapis caycanraj. Payga manchapacushanchi yaya jircacunapa maquinćhüshi cawan. Papäniquipa mandaj tayta caycashan wichan chay runa imatapis musyapäcuj. Sumaj tantiyacuj. Yaya jircacuna yarpay-sapa caycashan-jina paypis yarpay-sapash caran. Chaypitash papäniqui Nabucodonosor mandaj caycashpan, chay runapa maquinman llapan musyapacujcunatapis, ćhajćhacujcunatapis, istrïlla tantiyajcunatapis ćhuraran. 12 Chay ‹Daniel› jutiyuj runata jutichaparan ‹Beltsasar› nir. Yarpay-sapa cayninmanga manash pipis tincunchu. Imatapis musyan. Sumaj tantiyan. Suyñushancuna imaman ćhayachinantapis musyachin. Imapis watacash caycaptin, tantiyachin. Runa llutäpacush captin, alli shimillanpa ushyacächin. Chay Danielta jayachimuptiqui, isquirbiraycashantapis tantiyachishunquipaj.»
13 Chaura maman nishannuylla Danielta jayachiran. Ćhayachiptin, mandaj Belsasar tapuran: «¿Judá marcapita pushamushan Danielchu canqui? Israel runacunata ićhipuptin, ¿papänï mandaj Nabucodonosor jamtapis pushamushcashunquichu? 14 Yaya jircacunapa maquinćhu cawashayquiga rinrïman ćhayasha. Sumajshi yanapäshunqui imatapis musyapäcunayquipaj, tantiyacunayquipaj, yarpay-sapa canayquipäpis. 15 Tapyaman isquirbiraycashanta yanapämaj tantiyajcunapis, musyapacujcunapis liguiyta manam junchu. 16 Jammi ichanga, ¿manachu imatapis tantiyachinqui? Pipis llutäpacush caycaptinshi, ¿manachu ushyacächiyta yaćhanqui? Chaymi isquirbiraycashanta liguir, imaman ćhayanäpaj cashantapis musyachimaptiqui, mandäshimaj cayman ćhurashayquipaj. Mandaj runapa puca müdananta jatipäshayquipaj. Juri piñitapis wallgapäshayquipaj. Maquiquićhu runacunata purichinayquipäpis mayur mandäshimajpa purïshijnin canayquipaj camacächishaj.
17 Danielna niran: «Mandaj tayta, cuyachicuyniquicunaga mana imanämanchu. Jina cacuchun. Jaracuyniquicunatapis jucta jaray. Chaypis isquirbiraycashanta liguipäshayqui. Imaman ćhayanayquipaj cashantapis tantiyachishayqui.
18 Mandaj tayta, Llapanta Camaj Tayta Diosninchi llapanta camacächin. Papäniqui Nabucodonosortapis mandaj cayman ćhuraran. Munayniyuj cananpäpis, alli cawayćhu cawananpäpis, alli ricash cananpäpis camacächiran. 19 Camacächiyninpam sumaj munayniyuj caycaptin, llapan runacuna may marcapita captinsi, ima casta runacuna captinsi, ima rimayta rimaptinsi, papäniquita manchapacuran. Shungun munaptin, payga waquin runata wañurachij; waquintana llaquipaj. Waquin runata alli ñawinpa ricar, alliman ćhuraj; waquintana juyu ñawinpa ricar, ashllir ushyaj. 20 Quiquinpa shungun munashallanta rurashpan, ullguj cashpan, alli-tucuptin, mandaj cayninta Tayta Diosninchi jićhuran. Marca pingaymanna ćhayachiran. 21 Marcanpitapis, wasinpitapis jargushash caran. Yarpayninpis sima uywapa yarpayninman ticrachish caran. Sima bürucuna tiyashan muntićhu juyaran. Wäca-jina jiwallata micuran. Shullayllash warämuran. Wanacushancamanraj chaynuy cawaran. Wanacurshi ichanga niran: ‹Maquinćhümi llapan runacunata Llapanta Camaj Tayta Diosninchi cawachin. Marcantinta llapan mandajcunatapis maquinćhu purichin. Payllam shungun munashan runacunata mandaj cayman ćhayachin.›
22 «Tayta Belsasar, papäniqui imaman ćhayashanta musyaycarpis, alli-tucushcanqui. 23 Janaj pachaćhu tiyaj Tayta Diosninchita apärishcanqui. Paypa wasinpita apamushan cüpacunawan upyapacärishcanqui. Paypa cüpancunawan mandaj-masiquicunata, warmiquicunata, chïnayquicunata bïnuta upyachishcanqui. Llapaniqui upyaycar, jillaypita rurash yaya illacunata, juripita rurashtapis, brunsipita rurashtapis, jïrupita rurashtapis, jirupita rurashtapis, rumipita rurashtapis allićhu jurgupäcushcanqui. Chay illacuna imatapis manam ricanchu. Imatapis manam wiyanchu. Imatapis manam musyanpishchu. Cawaycächishushayqui Tayta Diosninchitam ichanga pampaman ćhurashcanqui. Maquillanćhu purichishuptiquisi, manam allimanchu ćhurashcanqui. 24 Payga isquirbij maquita caćhamusha. Willapäcushushayquita isquirbiraycachisha.
‹Mené› ninanga: ‹Mandaj tayta canayquipäga yupash junajllapämi Tayta Diosninchi ćhurashcashunqui. Chay junajcunata ćharcucächishanam› ninanmi.
27 ‹Tekel› ninanga: ‹Allita ruranayqui cashanta Tayta Diosninchi tupushana. Pishïshushayquitam ichanga tarisha› ninanmi.
28 ‹Parsín› ninanga: ‹Marcayquicunata ishcaymanmi Tayta Diosninchi raquingapaj. Waquin marcata Media runacunapa maquinman ćhuranga; waquintana Persia runacunapa maquinmanmi› ninanmi.»
29 Chaynuy musyachiptin, yanapäjnincunata mandaj Belsasar niran: «Danielta puca müdanata jatipay. Juri piñitapis wallgapay.» Nircur, llapan wiyayćhu niran: «Cananpita-pacha Daniel mandäshimanga.»