Liyuncunata tiyachinan ućhcuman Danielta jaycushan
6
Unayshi shungun munaptin, mandaj tayta Darío paćhac ishcay ćhunca (120) mandäshijnincunata acraran. Mandäshijnincunawanna raquipushan marcacunata ricachiran. 2 Nircur quimsaj mayur mandäshijta acracuran waquin mandäshijnincunata ricananpäpis, imaćhüsi alli llucshipunanpäpis. Quimsajninpitana Danielta acracuran ishcaj mayur mandäshij-masintapis ricananpaj. 3 Danielna tantiyacuj runa cashpan, imaćhüpis alli llucshiran. Yarpay-sapa cayninmanga maygan mayur mandajpis, mandäshij runapis manash tincuranchu. Llapanta alli ricaycaptin, shungunćhu tayta Darío niran: «Llapan marcäcunata Danielpa maquinman ćhuräman.» 4 Yarpashanta mayarna, ishcaj mayur mandajpis, mandäshij runacunapis Danielta chiquishpan achäquita ashiparan. Chaypis juchanta mana tariranchu. Pantapacushanta jurgapayta munaptinsi, manash camäpacuranchu. Danielga mandaj tayta Darío munashannuylla llapanta ruraran. 5 Chayshi quiquin-pura parlanacäriran: «Mandamajninchi wiyacushan-janan Danielpa juchanta manaćhi taripushuwanchu. Imapäpis achäqui manash cangachu. Manchapacushan Tayta Diosninpa shiminta sumaj wiyacushan-jananćhi ichanga achäqui cangapaj» nir.6 Chaynuy parlanacuriycur, ishcaj mayur mandajwan mandäshij runacunawan tayta Daríuman aywaran. Ćhayar, niran: «Tayta Darío, imaypis allilla juyaycullay. 7 Nuwacuna juc yarpaytana yarparcaycä. Llapanï, mayur mandajwanpis, mandäshij runacunawanpis, yaćhajcunawanpis, murucucunapa capitannincunawanpis parlanacärishcä. Marcayquicunaćhu llapan runa shimillayquita wiyacunman. Nishallayquita ćharcunman. Chaymi pï runapis jucta ama manchapacunmanchu. Jucta ama jayaranmanchu. Taytallau tayta, quimsa ćhunca (30) junajcaman llapan runacuna jamllatam manchapacushunquiman. Jamllaman jayaräshunquiman. Pipis mana wiyacuptin, liyuncuna tiyanan ućhcuman jitarpaycachiy. 8 Shimiquita chaynuy aunir, papilmanpis sïlluptiqui, nishayquinuylla llapan runa ćharcunman. Media runacunapawan Persia runacunapa mandajninpa aunishantaga pï runapis imaysi mana rucangachu. Mana ushyacächingapishchu.» 9 Mayur runacuna chaynuy shacyächiptinna, tayta Darío papilman isquirbichir, sïllupuran.
10 Chay papil sïllupushan Danielpa rinriman ćhayash captin, wasinpa cuticuran. Altusninman yaycur, Jerusalén marcata ricanan rïjas ñaupanman jungurpacuran. Jungurpacuycur, Tayta Diosninchita jayararan. Allimanpis ćhuraycaran. Yaćhacashannuylla waran-waran quimsa cuti Tayta Diosninchita manchapacuj. 11 Ashipäcuj runacuna shuntacar, Danielman watgarpaycaran. Tayta Diosninta jayaraycajta tariran. Mañacuycajtapis wiyaran. 12 Chayshi tayta Daríuman cutircur, aunishanta yarpächir, niran: «Taytallau tayta, ¿manachu papilman sïllushcanqui? Mañacur, pï runapis jucta ama mañacunmannachu. Janaj pachaćhu tiyajtapis, cay pachaćhu tiyajtapis ama jayaranmanchu. Manchäga quimsa ćhunca (30) junajcaman jamllata manchapacushunquiman. Mana wiyacuj runa captin, ¿manachu liyuncuna tiyanan ućhcunman jitarpunayquipaj aunishcanqui?»
Tapuptin, mandaj tayta niran: «Au. Mayna nishcaj. Media runacunapawan Persia runacunapa mandajnin aunish caycaptin, pï runapis mana imaypis cutirpungapächu.»
13 Auniptin, paycuna niran: «Judá marcapita apamushan runa Danielga upa-tucunmi. Shimiquita mana wiyacunpishchu. Waran-waran quimsa cuti quiquin manchapacushan Tayta Diosninmanraj jayaraycan.»
14 Willapashanta wiyar, shungunpis ishquicäcuran. Llaquicushpan shungunćhu yarpar niran: «¿Imapäraj papilman sïllupushcä?» nir. Llapan shungunwanna Danielta jishpichiyta munaran. Inti jigarpunancamansi washayta munaywan sumaj yarpaćhacuranpis. 15 Chacanaycaptinmi ichanga ashipäcuj runacuna mandaj taytanman cutircur, niran: «Taytallau tayta, aunishayquita musyanquim. Media runacunapawan Persia runacunapa mandajnin aunishanta pï runapis mana imaypis cutirpungapächu.»
16 Chaynuy niptin, tayta Darío Danielta charircachir, liyuncuna tiyanan ućhcuman jitarpaycachiran. Chaypis Danielta shacyächir niran: «Imaypis manchapacushayqui Tayta Diosniqui washayculläshunqui, ari.» 17 Chaypitana läja rumiwan ućhcupa puncunta chaparcuran. Chaparcuptin, sïllunwanna tayta Darío puncuta sïlluran. Mandäshijnincunapis sïllunwan-caman puncuta sïlluran mandaj tayta aunishannuylla ćharcucächinanpaj. 18 Chaypita wasinman cutircur, llaquicushpan tayta Darío paćhantapis yargachiran. Runa shacyächiyta munaptinsi, mićharan. Warayllata mana puñuranpishchu.
19 Chaca-chacalla liyuncuna tiyanan ućhcuman tayta Darío mana jamallarshi cutiran. 20 Tiyanan ućhcuman ćhayaycur, shungun ishquicäcuptin, Danielta jayacuran: «Tayta Daniel. Cawaj Tayta Diosta manchapacuj Daniel. ¿Imaypis manchapacushayqui Tayta Diosniquiga micucuj liyuncunapitachu washashcashunqui?» nir.
21 Danielna nimuran: «Taytallau tayta, imaypis allilla cawaycullay. 22 Au, Tayta Diosnïmi washämasha. Ricay ñawinćhümi juchaynaj cä. Ricay ñawiquićhüpis manam juchallishcächu. Chaypitam anjilninta caćhacamusha. Paymi micucuj liyuncunapa shiminta amucarcachiran.»
23 Chayta wiyar, tayta Daríupa shungun achicyacäcuran. Yanagajnincunawanna liyuncuna tiyanan ućhcupita Danielta jurguchiran. Ricarna, liyuncuna mana aspishanta ricaran. Tayta Diosninman yupachicuptin, mana yataparanpishchu. 24 Chaypitash murucuncunata tayta Darío niran: «Danielta tumpajcunata charipamay. Warmintinta, wamrantin, llapanta apamuy. Liyuncuna tiyanan ućhcuman llapallantam jitarpushun. Jitarpuptinna, ućhcu pampaman mana ćhayaycaptillansi, liyuncuna charicurcusha. Tulluncunatapis capćhućhuylla ushyacurcuran.
25 Tayta Daríuna llapan runacunata cartacuran. Llapan casta runacunata, may-chayćhüsi tiyajcunatapis, juc-niraj-juc-niraj rimayta rimajcunatapis cartacurshi, niran:
Taytacuna, sumaj allilla juyaycullay.
26 Wiyaycallämay, ari.
Maquïćhu juyashpayquiga, Daniel manchapacushan Tayta Diosninta manchapacäriy.
Alli ñawiquiwan ricarna, payman yupachicunquiman.
Payga Cawaj Taytanchim.
Imaypis manam ushyacangapächu.
Imaycamanpis mandaj tayta cangapaj.
Mandaj cayninga mana ushyacangapäpishchu.
27 Payga washäcujmi. Jishpichicujmi.
Munashancunata imallatapis camacächin.
Janaj pachaćhüpis, cay pachaćhüpis camacächiyninpam imatapis ruran.
Liyuncunapa maquinpitapis Danielta washaran.»
28 Chaynuypash tayta Daríuta mandaj caynin ushyashancaman Daniel mandäshiran. Jinarcur, Persia marcapita tayta Ciro mandaj cayman ćhayaptinpis, paytapis mandäshiran.