Daniel ćhuscu waräcuyta suyñushan
7
Unayshi juc watallata mandaj Belsasar Babilonia marcacunata maquinćhu puriycächiptin, Daniel waräcuyta ricapacuran. Puñuycashanćhu waräcuyta ricapäcuran. Riccharir, ricapacushancunata isquirbiran. Imaman ćhayananpaj cashantapis willapäcur, 2 Daniel niran: «Chacay puñuycashäćhu ricapacushcä. Janapita, urapita, wacläpita, caypita sumaj wayraycämujta ricarä. Ćhuscu lädunpita pücamuj wayraga jatun yacu püsuta büchiypa-büchiycächiran. 3 Chaypita ćhuscu waräcuy yacupita llucshiycamuran. Juc-niraj-juc-niraj jatun-caray waräcuycuna caran.4 «Puntata llucshiycamujga ancapa cäpayuj micucuj liyun-niraj caran. Ricapäriptïna, cäpanta raćhipash caran. Jinarcur, runa ićhirashan-jina ićhichish caran. Runapa yarpaynintapis camapush caran.
5 «Juctana ucumäri-nirajta ricarä. Juc-caj maquin jugarish caycaran. Quimsa custälla tullutana amurcusha. Chaypita willacäriran: ‹Jatariy. Sacsashayquicaman aychata micucarcamuy› nir.
6 «Chaypitana micucuj puma-nirajta ricarä. Pärij-niraj cashpan, wajtanćhu ćhuscu cäpayuj caran. Umanpis ćhuscu caran. Mandaj caymanpis ćhurash caran.
7 «Chay chacayga ricapacur, juctana ricarä. Sumaj sijru caran. Manchacuypaj caran. Sumaj callpa-sapa. Quirun jïrupita captin, imatapis charir, micucurcuj. Capćhupaylla ushyarij. Capćhupacushanta lluchcar ushyarij. Ñaupacaj waräcuycunaga payman manam tincuranchu. Jananmanpis ćhunca wajrayuj caran.
8 «Ricapaycaptï, wajrancunapa ćhaupinpita tacsha wajra wiñacurcuran. Quićhquipaptin, quimsa wajrata llupipash caran. Tacsha-caj wajraga ñawiyuj caran. Ñawinga runapa ñawin-niraj caran. Shimiyuj cashpanpis, mana pingacullarmi, alli-tucuycaran.»
Auquinpaj birsushan
9 «Ricapaycaptïraj, jamanancunata ćhurash caycaran.
Juc Auquinna jamaycuran.
Müdanan achic-achicyaycaj raju-jina yurajmi caran.
Ajchanpis llutpi millwa-jina yurajmi caran.
Jamacunanna warau-warauyaycaj nina-nirajmi caran.
Ruydanpis ratataycaj nina-nirajmi caran.
10 Chay Auquinpa ñaupanpita ćhayash yacu aywashan-jina ninapis pugaycamuran.
Manchapacujcunana warangaypa-warangaypa Auquin ñaupanćhu juturpaycaran.
Manchapacujcunaga yupaytapis mana atipaypämi juturpaycaran.
Chay Auquinna juchacunata jurgapayta camaricuran.
Acta librucunata quićharan allita rurashanman-tupu, llutanta rurashanman-tupu jurgupänanpaj.»
11 «Chay tacsha wajra mana pingacullar alli-tucuptinraj, ricapaycarä. Ricaycaptï, chay jipacaj waräcuyta wañuyman ćhayachiran. Warau-warauyaycaj ninaćhu ushyaran. 12 Waquin waräcuycunana mandaj cayninpita jurgush caran. Chaypis jitapashan wichancaman cawaycächiranraj.
13 «Chay chacaylla ricapacur, runa-nirajta ricarä.
Pucutay jananćhu aywaycämuran.
Auquin caycashanman ćhayaran.
Ćhayamuptin, Auquinpa ñaupanman pusharan.
14 Ćhayachiptin, mandaj cayman ćhuraran.
Alli ricash cananpaj camacächiran.
Maquinćhüna llapan runata cawachiran.
Runacuna may marcapita captinsi, tucuy casta captinsi, tucuy-niraj rimayta rimaptinsi, llap-llapanmi manchapacäriran.
Imaycamanpis mandaj tayta cangapaj.
Mandaj cayninga imaypis mana ushyacangapächu.
Mana pisi illarächingapishchu.»
15 «Nuwa, Danielmi, sumaj llutäpacushcä. Ricapacushä sumaj yarpaćhacachimasha. 16 Chayćhu juc ićhiraycaptin, ñaupanman ashurcur, tapushcä: ‹Tayta, ricashäcunata tantiyaycachillämay, ari› nir. Tapuptï, llapanpita tantiyachimaran. Imapaj cashanpis, imaman ćhayanantapis tantiyachimar niran: 17 ‹Ćhuscu waräcuyga ćhuscu mandajwanmi tincun. Ćhuscun mandaj cayman ćhayar, llapan runacunata maquinćhu purichinga. 18 Chaypis Llapanta Camajta manchapacuj runacunata mandaj cayman ćhurash cangapaj. Mandaj cayninga imaypis mana ćharcucangapächu. Imaypis mana ushyacangapächu.›
19 «Tantiyachimaptinna, nishcä: ‹Jipacaj waräcuypitapis sumaj tantiyaycachillämay, ari.› Chay waräcuy juc-niraj caycaran. Sumaj manchacuypaj caran. Quirun jïrupita caran; shillunna brunsipita. Charishancunata micucurcuran. Capćhućhuylla ushyariran. Caćhapacushancunatapis lluchcar ushyariran. 20 Umanćhüna ćhunca wajrapis caycaran. Chaypis juc tacsha wajra wiñamur, quimsata ushyarir illarächiran. Chay tacsha wajraga ñawiyuj caran. Shimiyuj cashpanpis, mana pingacullar alli-tucuycaran. 21 Ricapaycaptï, Tayta Diosninchita manchapacushan runacunata magar ushyaycaran. 22 Ićhirpaycaptin, chay Auquin allillata rurar, Llapanta Camajta manchapacushan runacunata washaran. Jitapashan junaj ćhayash captinna, mandaj cayman ćhuraran. Paycunana llapan runacunata maquinćhu purichiran.
23 «Tantiyachimajna nimaran:
‹Chay jipacaj ćhuscu-caj waräcuy, juc jatun marcapa mandaj taytanwan tincun.
Chay ćhuscu-caj mandaj taytaga llapan runata maquinćhu purichingapaj.
Juc-niraj mandaj tayta cangapaj.
Cay pachaćhu llapan runata micucurcungapaj.
Lluchcar ushyaringapaj.
Llapanta ushyar, illarachingapaj.
24 Ricashayqui ćhunca wajracunaga ćhunca mandaj runacunawan tincun.
Paycuna jatinaylla mandaj cayman ćhayangapaj.
Chaypita jucna mandaj cayman ćhayangapaj.
Payga quimsa mandaj runata ićhipungapaj.
25 Llapanta Camajta ashipar, tucuyta rimangapaj.
Llapanta Camajta manchapacushan runacunatapis ushyar ñacachingapaj.
Paycuna diyawarda tünapacuyta munaptin, unaypita-pacha yaćhacashannuy cawayta munaptin, chapacuyta munangapaj.
Quimsa wata sujta quillacamanraj maquinćhu paycunata purichingapaj.
26 Chaynuy caycaptin, Auquin-ima jutucangapaj juchanta jurgapunanpaj.
Mandaj cayninta jićhushpan, ushyaypa illarächingapaj.
27 Jinarcur Llapanta Camajta manchapacujcunata mandaj cayman ćhurangapaj.
Paycunana marcantinta llapan runacunata maquinćhu purichingapaj.
Munayniyujna cangapaj.
Alli ricashna cangapaj.
Mandaj cayninpita mana imaypis llucshingapächu.
Maquinćhu cawachishan runacunawan mandajnincunana shiminta wiyacungapaj.
Nishanta rurangapaj.›
28 «Chaynuyllata suyñurä. Nuwa, Daniel, tantiyayta mana atipar, sumaj llutäpacurä. Jajlläpis yurgacäcuran. Chaypis shungulläman llapanta ćhuracurä.»