Pugush carnitawan urgu capshita Daniel ricapacushan
8
Chaura quimsa watana mandaj Belsasar mandaycaptin, nuwa Danielga ricapacurä. Ricapacuynïga jipacajnam caran. 2 Elam marcacuna quinranćhu caycarä. Jatun-caray Susa marca wajanćhu, Ulai mayu cantullanćhu carä. 3 Ricapaycaptï, mayu cućhunćhu juc pugush carni ićhiraycaran. Wajrancuna ishcay caran. Ishcan wajrancuna chican-caray captinpis, jipacaj pashtamuj wajraga ñaupacaj pashtamujta llalliran. 4 Chay pugush carniga waquin uywacunata wacpa-caypa, janaman, uraman wishtaypa wishtar ushyaran. Mayganpis manam ićhipuranchu. Jishpiytapis manam camäpacuranchu. Chaymi pugush carniga munaynillanta rurar, sumaj juyuyaran.5 Chayćhu ricapaycaptillä, inti jigarpunan quinranpitana urgu capshi ricaramuran. Pachatapis mana lluchcallar, waracaylla shamuran. Chay capshiga ishcan ñawin ćhaupinćhu jatun-caray wajran caran. 6 Mayu cućhunćhu ishcay wajrayuj pugush carni caycashanman ćhayarga, wishtananpaj ullgush aywapuran. 7 Ricapaycaptillä, pugush carnita ćhayapäriran. Ullgush cayllawan tacariran. Tacariptinga, ishcay wajran paquicäcuran. Chapäcuyta mana camäpacurannachu. Chaymi pampaman jitashta lluchcaypa lluchcar ushyaran. Pugush carnita pipis mana washaranchu. Jishpichiytapis mana camäpacuranchu.
8 Chaura chaypita chay urgu capshi sumaj munayniyuj ricacuran. Sumaj munayniyujyaran. Munayniyuj caycaptin, jatun wajran paquicäcuranraj. Paquicäcuptin, ćhuscu wajra yapay mucmucarcamuran. Ćhuscu pachapa wiñamuran. 9 Chaypita juc wajrapita jucna mucmucarcamuran. Chican-carayta wiñacurcuran. Wichaypa-uraypa wiñaran. Cuyayllapaj ricash marcamanpis wiñaran. 10 Janaj pachaćhu cawajcunawan taripashancamanpis wiñaran. Janaj pachaćhüna wajrancunawan istrïllacunata cay pachaman jitarpamuran. Lluchcaypa lluchcar ushyaran. 11 Janaj pachaćhu mandajta taripashancamanpis wiñaran. Aparishpan, waran-waran jarashancunatapis jićhuriran. Wasintapis jućhurachipuran. 12 Janaj pachaćhu tiyajcunatapis waquinta juchacachiran. Llutanta ruraycur, waran-waran Tayta Diosninchita jarashancunatapis ushyaran. Unay yaćhachicuycunatana pampaman wicaparan. Shungun yarpashanta imatapis ruraran.
13 Chaura chaypita anjilcuna parlanacushanta wiyarä. Jucnin niran: «¿Imaycamanraj caycuna cangapaj? ¿Imaycamanraj waran-waran jarashancunata pampaman ćhurangapaj? ¿Imaycamanraj Tayta Diosninchipa wasinpis jućhuypa ushyash cangapaj? ¿Imayraj cay-jinaypa juchata aparicushapita ushyacangapaj? ¿Imaycamanraj Tayta Diosninchiman yupachicujcunatapis maquinćhu cachingapaj?»
14 Chaynuy niptin, juc-caj anjil niran: «Chacanaycajninpis, warajninpis ishcay waranga quimsa paćhac (2,300) junajtarämi ćhawangapaj. Chaypitarämi Tayta Diosninchipa wasin pichachish cangapaj.»
Ricaripushanpita tantiyachishan
15 Chaura chaycunata suyñuriycur, nuwa Daniel tantiyayta munarä. Tantiyayta munaptï, ñaupäćhu runaman ricchacuj ricacusha. 16 Chaura Ulai mayu ćhaupinpita runaman ricchacujga jayaramuran: «Gabriel, chay runa suyñushanta tantiyachiy, ari» nir.
17 Chaura ñaupäman shamuran. Ñaupäman ćhayamuptin, manchariywan jungurpacuycurä. Jungurpacuycuptï, nimasha: «Suyñushayquicunaga ushyacay junajcunapämi. Chayta sumaj tantiyacunquiman.»
18 Chaynuy nimaptin, wañucäcuräraj. Pampaman jutucäcushcä. Wañushnuy caycaptï, yataycamar, nimaran: 19 «Sumaj wiyamay. Tayta Diosninchi ñacachinan junajcunapita tantiyachishayqui. Suyñushayquiga ushyacay junajcunapämi. 20 Suyñushayquićhu ishcay wajrayuj pugush carnita ricashayquiga ishcaj mandajcunawan tincun. Persia marcapa mandajninwan Media marcapa mandajninwan tincun. 21 Urgu capshiga Grecia marcapa mandajninwanmi tincun. Ñawin ćhaupinćhu jatun-caray wajranga Grecia marcapa mandajninwanmi tincun. 22 Juc wajra paquicäcuptin, ćhuscu wajracuna wiñamushanga chay-chica marcacuna juc mandajpa maquillanćhu caycashanpita ćhuscuj mandajpa maquimanna raquicänapämi. Chaywanmi tincun. Jipacaj mandajcunaga punta-caj mandajman manam tincungapächu. Pishi callpan cangam. 23 Chay mandajcuna aywarnaga, jucha aparicuytanam jallaycungapaj. Juc mandajga pingacuyta manam yaćhangapächu. Ishcay shimiyujmi cangapaj. 24 Chay mandajga sumaj munayniyuj cangapaj. Chaymi nishan-nishan caywan mandaj cayman ćhayangapaj. Nishan-nishanmi imatapis ushyangapaj. Munashanta imatapis rurangapaj. Jinay-jinayyuj runacunatapis ushyapangapaj. 25 Tayta Diosninchiman yupachicujcunatapis ushyangapaj. Ishcay shimiyuj car, juchallata aparicungapaj. Sumaj jatun-tucungapaj. Riguichipayllapa chay-chicaj runata wañuchingapaj. Mayur munayniyujta ashiparmi ichanga, quiquillan wañuyta taringapaj. Runa mana yatapaycaptinsi, wañucäcungapaj. 26 Chay-chica cuti pacha warashantapis, pacha chacashantapis suyñushayquiga rasunpa camacangapaj. Rasunpa captinpis, shimiquita chapäcunquiman. Chaycunaga ushyacay junajcunarämi canga.»
27 Chayta wiyar, nuwa Daniel, jutucäcushcä. Callpä ushyacäcuran. Achca junaj jishya charimaran. Chaypitarämi mandamajnï nimashancunata rurapacunäpaj jataricurcurä. Ricapacushätam ichanga, mana tantiyaj-nirajpis sumaj yarpaćhacurä.