Daniel mañacushan
9
Babilonia marcaćhu «Asuero» jutiyuj runapa wamran Darío mandaj cayman ćhayash caran. Mandaj Daríuga llapan «caldeo» nishan runacunata maquinćhu purichiran. Papäninwan Darío caran Media casta runacunash.2 Juc watallaraj mandaycaptinna, nuwa Daniel unay isquirbishancunata liguiycar, Tayta Diosninchipa nishanta tantiyacurä. Willacujnin Jeremíaswan Tayta Diosninchi musyachicush caran: «Jerusalén marcaga janćhis ćhunca (70) watacamanmi ushyaypa ragäyash cangapaj» nir.
3 Chayta tantiyar, llapan shungüwanmi Tayta Diosninchita mañacurä. Jayaräcur, mana micushcächu. Llaquicushpä, jaćhga müdanata ushturcur, janämanpis ućhpata machicushcä. 4 Llapan jucha aparicushäcunapita wanacur, Tayta Diosninchita willaycurä:
«Taytallau Tayta, munayniyujmi canqui. Manchapacuypämi canqui. Manchapacujcunatam, shimiquita wiyacujcunatam aunishayquita ćharcucächinqui. Imaycamanpis llaquipäcunqui. 5 Nuwacunaga juchata aparicärishcä. Llutanta rurapäcushcä. Juyuta rurar, cawapäcushcä. Ticraparcacärishcä. Shimiquita mana wiyacärishcächu. Yaćhachimashayquicunata jaguiycärishcä. 6 Manchapacuj willacujniquicunawan shimiquita musyachimarsi, manam wiyacärishcächu. Jampaj piñapämaptinsi, mandajnïcunapis, mandäshijnincunapis, auquillücunapis, llapan Israel-masïcunapis upa-tucärishcä.
7 «Taytallau Tayta, imaypis allillata ruranqui. Nuwacunam ichanga, marca-pingayman ćhayapäcushcä. Jananpachicuj cashpä, pingay-tucärishcä. Llapan Judá quinran marcacunaćhu juyajcunapis, Jerusalén marcaćhu tiyaj runacunapis pingay-tucush ricacärisham. Llapan Israel marca-masïcunapis ticrapushushayquipita may-chay marcacunamansi jarguriptiqui, pingay-tucushmi ricacärisha.
8 «Taytallau Tayta, marca-pingayman ćhayapäcunä camacanmi. Mandamajnïcunapis, mandäshijnincunapis, auquillücunapis shimiquita mana wiyacärir, llapanï juchata aparicärishcä. 9 Ticrapacurcuptïsi, Tayta Diosninchiga llaquipäcujmi. Juchanchitapis jungaycun. 10 «Tayta Diosninchipa shiminta manam wiyacärishcächu. Manchapacuj willacujnincunawan shungun munashallanta tantiyachimaptinchisi, manam nishanta rurar cawapäcushcächu. 11 Yaćhachimashayquicunata mana ćharcurmi, llapan Israel-masintï juchata aparicärishcä. Llapanï jiwacashcä. Shimiquita wiyarsi, upa-tucärishcä.
Chaypitam Moisés isquirbichishannuylla imamanpis ćhayapäcushcä. Tayta Diosninchita ullguchiptï, manchapacujnin Moiséswan musyachicushan-jina ñacay ćhayapamasha. Juchata aparicushäpita chapata rurapämasha. 12 Chaura piñapämashpayqui, aunishayquinuylla mandajnïcunatawan ñacayman ćhayachimashcanqui. Juyupa ñacachimasha. Jerusalén runacunata ñacachishan-jina may marcatapis manam imaysi ñacachiranchu. 13 Isquirbishanćhu Moisés piñapämashan-jina ñacaycuna ćhayapamasham. Chaypis manam wanacärishcächu. Shiminta manam wiyacärishcächu. Juc shungulla cawaytapis mana munapäcushcächu. Tayta Diosninchi llaquipäcuj captinsi, alli shimilläpa manam jayacärishcächu. 14 Tayta Diosninchi michimasha. Camacaptinga, juyu ñacayman ćhayachimasha. Llapanćhümi Tayta Diosninchi allillata ruran. Chaypis shiminta mana wiyacärishcächu.
15 «Taytallau Tayta, sumaj munayniyuj cashpayqui, Egipto marcapita acracushayqui runacunata jishpichirayqui. Manchapacuypaj cashayquipita canancamanpis rimay purin. Chaypis juchallaćhu arupäcurishcä. Llutanta rurar cawapäcushcä.
16 «Taytallau Tayta, auquillücunapis, nuwacunapis juchata aparicärishäpitam jäpa runacuna asiparcaycäman. Acracushayqui marcatapis pampaman ćhurarcaycan. Chaymi amana ullgüpamaychu, ari. Ullguj cayniquiga jasacäcuchun. Sumaj llaquipäcuj cayniquiman-tupu nuwacunatapis, Jerusalén marcatapis, llaquipaycallamay, ari. Acracushayqui puntaćhümi Jerusalén marcata jatarichirayqui.
17 «Taytallau Tayta, manchapacuj runa cashpä, jayarämushäta wiyacallämay, ari. Mañacushäta ćhasquicullay, ari. Wasiquiga llaquicuypämi ragäyash caycan. Tayta Dios, alli ricash canayquipaj, wasiquitapis cuyar ricaycullay, ari.
18 «Taytallau Tayta, ashurcamuy. Wiyaycallämay, ari. Mä, ricaycullay. Marcayquiga ragäyashnam caycan. Manam alli cawapäcushäpitachu jayarämuj. Manchäga sumaj llaquipäcuj cashayquipitam mañapäcamü. 19 Taytallau Tayta, wiyacallämay, ari. Taytallau Tayta, juchäta amana yarpaynachu. Taytallau Tayta, ricaycallämay. Yanapaycallämay, ari. Nuwacunaga acracushayqui runacunam carcaycä. Cay marcapis jampam. Allićhu llucshinayquipämi, juc junajpäga ama jitapanquimanchu.»
20 Chaura Tayta Diosninchita jayaraycaptï, Israel-masintïpaj juchäcunata ushyacächinanpaj mañacuycarä. Acracushan marcanpäpis mañapacuycarä. 21 Rimaycaptï, Gabriel ricaripamasha. Ñaupataga ricaripamash caran. Chaura Tayta Diosninchita jaranan tacsha mallway caycaptin, päriypa ñaupäman ćhayamuran. 22 Tantiyachimar, nimasha:
«Daniel, Tayta Diosninchi musyachicushanta tantiyachij shamushcä. 23 Jayarämuptiqui, mañacushayquita Tayta Diosninchim juclla ćhasquicusha. Paymi caćhacamasha: ‹Alli ñawïwanmi Danielta ricä› nirshi. Chaypitam unay isquirbiraycashantapis, ricaripushushayquicunapitapis tantiyacuy.
24 «Israel-masiquicunapämi, Tayta Diosninchi acracushan marcantiquipämi, musyaycächij. Janćhis ćhunca (70) simäna ushyashancaman llapanta camacächish caycan. Chaycamanraj jucha aparicuyga ushyacächish cangapaj. Llutanta ruraypis illarachish cangapaj. Jucha aparicushanpis ushyacächish cangapaj. Chaypitarämi runacuna imaypis allillata rurar cawangapaj. Willacujninwan Tayta Diosninchi musyachicushanpis, isquirbichishanpis ćharcucächish cangapaj. Tayta Diosninchipa allinnin acracushanta cargunman ćhurash cangapaj.
25 «Musyaycächijnam. Sumaj tantiyacunquiman. Llapan runacunata: ‹Jerusalén marcata allchay. Yapay jatarachiy› nir willacushanpita-pacha Tayta Diosninchi acracushan-caj runaga mandaj cayman ćhayanancamanmi janćhis (7) simäna cangapaj. Chay wichanpita-pacha ñacapacuyćhu juyarsi, sujta ćhunca ishcaywan (62) simänapaj marcapa tumayparaj pirgashanta jatarachish cangapaj, cällincunatawan lasanta ushyacächish cangapaj.
26 «Sujta ćhunca ishcaywan (62) simäna ushyarcuptinga, acracushan-caj mandajta wañurachingapaj. Imatapis manam charangapänachu. Chaypita juc jäpa mandaj ricarimungapaj. Murucuncunawan ćhayapur, Tayta Diosninchipa marcanta wasintintam ushyaypa ushyaringapaj. Mayu ćhayashan-jina ćhayapamungapaj. Runacuna ushyaypa ushyar wañuchinacungapaj. Llaquipaypämi chapata musyaycächij.
27 «Chay jäpa mandajga waquin runacunawan parlanacungapaj. Juc simänapaj auninacungapaj. Pullan simänapitarämi ichanga Tayta Diosninchita jaracunantapis, cuyachicuyninta ćhayachinantapis mićhangapaj. Tayta Diosninchita ashllirpis, wasin puncunćhüna chiquipaypaj manchapacushan millanaypaj-cajta jatarachingapaj. Jitapashan junaj ćhayamuptinmi ichanga, ashipaj runa ushyacayman ćhayachish cangapaj.»